試新餐廳？首次到訪就印象深刻！自助茶水區我懶得行出行入寧願唔要，自助易圍馬落單但網絡緩慢甚至收唔到，已有部份食客舉手投訴。 明白人手短缺全場只得兩位職員跑上跑落，辛苦了！服務⭐️雖然肥嬸嬸已笑臉迎人但整體職員表現欠佳。環境⭐️⭐️新派茶記格局。 羅宋湯⭐️室溫再被冷氣吹兩吹可以變凍湯，天氣炎熱所以唔出熱湯？淡淡的茄膏水。 洋蔥汁火腿餐肉豬扒意粉，意粉微波爐叮過熱辣辣，有股微波味道。午餐肉鬆軟不咸不油膩，火腿都煎了段時間放涼變得油咸硬。洋蔥汁酸咪咪夠開胃竟然比黑椒汁美味。 鐵扒黑椒汁美式雜扒，薄牛扒腍啤啤，醃味濃濁強烈，食不到牛味⭐️有骨豬扒醃得太利害，食不到半點天然豬甜味⭐️雞扒不過不失，入得口全熟不乾硬但略咸⭐️⭐️腸仔廉價怪味腸，起碼唔咸⭐️⭐️黑椒汁不香不辣帶澀味⭐️。茄汁意粉⭐️⭐️室溫唔熱，茄汁酸酸唔難食。

尋幽探秘兜錯路，竹林深處有人家，居然有間素菜隱蔵於非常舊式的商廈中，走上電梯陰陰暗暗，再跳入古老升降機直奔八樓﹗冷清清小貓三四隻的食客，侍應們輕輕鬆鬆高談闊論悠然自得。

原盅黃耳素翅燉椰皇⭐️⭐️⭐️湯底極素的味道，幸好香濃飽滿沒有水汪汪的感覺，足料無欺場。生煎菜肉餃⭐️⭐️油膩感十分重食不出味道來，不知道是韮菜還是薺菜，雖然外層煎得金黃焦香，但餡料非常清淡。瑤柱金菇炆伊麵⭐️⭐️菜多麵少，菜味溶入伊麵中怪怪，鑊氣欠奉而且落味單調陰沉。

點解我要食啲咁難食既早餐！仲要大汗疊細汗坐街邊食二手煙食沙塵，以為夠鐘開船急急求其食少少野。 那來的智障人渣船河搞手，十點開船叫人家九點集合又唔出聲！我還以為九點開船！等到齊人成十點半先出發，依個搞手係朋友既朋友完全唔認識。我唔係遲到既人，離晒譜！ 食物質素比疫情前一落千丈，插水式下跌的地獄料理。腸仔⭐️怪味大咸滾水烚。辣魚蛋⭐️腍啤啤滿口麵粉，辣水味只留在表面。混醬腸粉⭐️⭐️平傭普通唔難食。 滷水雞髀⭐️⭐️乾乾硬硬而不嫩滑，外濕內乾充漬普通豉油味，中咸無雞甜味，隱約的雪藏味，免強仲食得到。 滷水雞中翼⭐️嬸嬸真的十分好客，無啦啦話送多隻雞翼我食，多謝多謝。立即成隻塞入嘴仔在舌頭上打滾，皮滑肉乾大中咸，硬著頭皮吞晒，不想浪費。 豉油皇炒麵配沙嗲汁⭐️雖然看似濕腍散碎都照塞入口試試！大大咸的豉油味，甜甜的沙嗲汁有少少辣，吃不消掉去垃圾桶。

Asahi draught朝日生啤，日日係舖頭不停飲已經不太想飲，免強一杯濕濕口吧。原隻椰青，室溫？失溫？不冰凍的椰青水，不過不失。

泰式冬蔭功卡邦尼大蝦意粉⭐️⭐️⭐️⭐️⭐️雖然有誠意有質素，不過售價二百多元真心貴。先做好預備工作，將蛋黃跟意粉及芝士撈得平均，每條意粉都要掛滿汁液方算成功﹗捲起大大啖釀入嘴仔，冬蔭功汁十分濃郁黏稠，奶甜味突出而散發輕輕辣味及強力酸味，蛋黃作為平衡的角色，完成度十分高，開胃醒神。

泰式炒通菜，嚥韌帶硬的旱通，不及夏日時令淺綠水通爽甜多汁，味道狂野香濃帶辣帶蒜甜。泰式炸蝦餅，賣相不討好，油光閃閃。咬落麵包糠粗糙刮嘴，蝦膠鞋烚烚無鮮味，鬆散不起膠。

火山排骨⭐️⭐️⭐️⭐️真正的泰式火山骨﹗跟在曼谷食的都有幾分相似，全部用龍脊骨，不是豬肋骨。炆得肉質彈牙，淋上泰式酸辣汁，完全滲透骨中肉中，損得非常暢快﹗整碟只需要我一人之力便可以完全消滅。

泰式生蝦刺身⭐️⭐️⭐️大家都非常喜歡乾冰噴煙的演釋，視覺效果一定加分﹗魚露浸的即食生蝦刺身可以，及埋蒜片辣椒加上泰式酚辣汁的加特，合格。

泰式煙燻三文魚刺身⭐️⭐️⭐️⭐️本身三文魚反貨時已煙熟，上枱時再煙多次，黎招雙煙燻，做足工乎，雖然在味覺及嗅覺上沒什麼幫助，不過視覺上有加分的。綿綿的煙三文魚充滿咸鮮，有著芫荽泰汁及蒜片辣椒的助攻，比預期中美味。

基地龍蝦泰式秘醬炒飯，應該命名為泰式焗波士頓龍蝦伴基地泰式炒飯⭐️⭐️⭐️比龍蝦意粉更貴，接近三百大元﹗波士頓龍蝦真的很鮮爽彈，處理得而仲保留鮮味。炒飯完全食不出什麼秘醬那麼神化，其存在感薄弱直頭無乜味道。

本來計劃去街市世記走轉，奈何居然落雨唯有轉去首爾登陸，黃昏的早餐完成。人家專登想黎食秋刀魚，竟被取消了﹗十分慳電兼環保，關掉冷氣及音樂，熱熱侷侷靜蠅蠅，極具深圳風。

沒有阿豬媽只有陸大媽，尋找阿豬媽，換來全部都是陸大媽。第 2 次幫襯，第 1 次已經係 7 年前。說好的阿豬媽呢？ 首次遇到真正阿豬媽主廚，緣份到！侍應陸大媽講廣東話、廚房阿豬媽都講廣東話，偏偏兩個香港學生妹要係度講國語？學校規定著住校服只可以講國語嗎？

泡菜，食落正常，但聞落有股難受宿味。大豆芽，少少爽脆少少汁，再肥美一點更高興。個個韓妹都苗條動人，我都食多點泡菜先得！到底是否任食泡菜大豆芽呢？

韓式海鮮豆醬湯鍋，吱吱喳喳冒著煙送到，滾到燙嘴照飲可也，越熱越快樂﹗淺嚐一口使人懷念的味道，多年前韓遊的感覺及畫面出晒黎﹗用料豐富無欺場無偷工減料，脆肉瓜、蘿蔔、薯仔、魷魚、海蝦、沙蜆、豆腐、青椒、等等。豆醬味香濃滋味，越飲越起勁﹗落點白飯索索湯立即起動﹗黏黏飽滿的飯粒吸盡湯汁，滾燙灌入肚仔暖笠笠舒服極了﹗發現美味的秘密﹗黑色肯定唔係我，我灰色頭髮的，好彩我眼利係密密白飯中拔出來。

香煎蔬菜餅，感覺多星期無食過菜，試試蔬菜餅吧﹗滿以為係日式天婦羅雜菜餅，誰知係客家韮菜甘筍魷魚薄罉，幸好味道還算討好。微脆金黃的薄脆，濕潤嚥韌的麵團，包著爽甜的韮菜甘筍絲。乜都夾泡菜一齊食，味道竟然同帶甜蔬菜餅完全唔夾。

韓式辣泡豆腐湯，慢工出細貨，真的超高溫﹗就連豆腐都內外熾熱，小心燙到起水泡啊！最愛滑豆腐﹗用辣湯盛著再夾著爽泡菜及飽滿飯粒，開心暢快。突然感覺十分健康，多多泡菜幾塊豆腐加一丁點的肉碎，多菜少肉。正宗食法係將飯落湯，唔係將湯落飯！頭幾啖湯有點淡但越食越濃越刺激。

蔘雞湯，滾熱辣噴著煙鬼哭神號地登場﹗只有啡色蔘鬚幾條，唔係一條白蔘嗎？我喜歡整條白蔘咬的呢﹗煲湯雞肉霉鞋爛碎實屬正常。湯底甘香有雞肉味外還隱約有點點蔘味，雞湯特濃香甜，以白飯代替糯米，有別於傳統蔘雞湯。用上白飯份量剛剛好，不像糯米般膩，全部消滅無得留低，連一滴湯都無剩。飲完全身內外暖笠笠好幸福﹗

昆布湯，我生日嗎？送我昆布湯，多謝多謝。魚湯味道，似鰹魚粉清淡而舒服。燒鯖魚，首次遇到擺盤係魚肉向上而魚皮向下的，十分創新有諗頭﹗似足成條一夜乾又似豆豉鯪魚，幸好微暖香脆魚味濃，天生魚油香甜，魚肉結實。賣相單調悶悶，如果用青花瓷長方碟加棵番茜即時靚晒。咸鮮魚味濃送飯一流，居然配山葵咸豉油而不是果醋？

太陽蛋泡菜炒飯，沒有期望的泡菜炒飯，實物竟比餐牌上照片靚仔吸引百倍不只有泡菜，仲有豬肉魷魚紫菜芝士！起初還以為係魚春，食完先知係芝士，我真係太掛住魚春了﹗珍珠米飽滿嚥韌乾爽，顏色染得均勻，芝士粉甘香，有肉有菜夾雜其中，辣度溫柔帶甜。配大豆芽清爽，配泡菜惹味多汁酸辣醒神，同樣一流﹗太陽蛋拌炒飯永恆的伙伴，合拍得天衣無縫。

韓式豬手，預計之外的美味可口﹗瘦肉鬆化、豬皮膠黏、清新豉油香﹗搭埋泡菜齊齊趙十足泰式豬手，酸酸甜甜更加醒胃，好想要碗白飯撈呢﹗

太陽蛋咖哩牛肉拉麵，蛋白焗到老老的，鞋鞋的皮又硬又韌，膠感十足。仲以為會辛辣麵，點知係韓式扁拉麵，沒什麼味道，有點漿有點黏的質地，掛著淡口咖哩湯唔難食，但腦內閃過唔想食的衝動，想掉低放棄。韓式菜肉餃，扁扁平平不豐滿不脹卜卜，要更多菜才會更甜更多汁啊﹗現在只有悶悶的味道。

香腸泡菜拉麵，極高溫滾燙，連我飲慣滾油都放不到落口，真係要等一等降點溫才能享用。耐心地吹凍一點才能狠狠地暢快地吸啜﹗辛辣湯汁濃濃刺激，麵條嚥韌帶彈，夾著普通腸仔、夾著酸爽泡菜，同樣滿意非常，給多隻煎蛋會更開心﹗

安東炆雞，我一心想懷緬下當年係韓國明洞嘆過的安東炆雞，但眼前依碟完全唔對版，不是肥美香甜帶輕辣的多醬油嫩雞。放在眼前的是乾乾鞋鞋雞肉，雞胸鞋到刮口，兩三件雞髀肉免強可以，真身為麻油安西炆雞！伴以洋蔥、青椒、紅椒，最好食係粉絲索盡甜醬油麻油味，薯仔質地粉甜也不錯。

無骨甜辣醬炸雞，香口微脆，雞肉極滑濕潤多汁，滑到不似雞肉，是否用乳酪浸泡過夜？厚厚炸粉有一刻覺得食緊麵筋，濃濃甜甜十分霸道，多多杰杰的醬少少甜少少辣。

韓式蜆蛤豆腐湯煲，噴著煙滾滾送到﹗香辣湯汁燙嘴最靚的溫度，嫩滑豆腐超高溫比湯汁更熱，燙到我嘴仔了﹗識食必定係飯加湯而不是湯加飯，有泡菜有肉碎有蜆仔，好好好好好﹗全部消滅片甲不留。

韓式烤牛肋骨，無鑊氣無焦香，微溫死氣沈沈。甜味突出而蒜味緊隨，全熟但肉質鬆軟，醃汁的功效。筋位脆脆，落了不少黃糖使得我手指黐立立。

煎蛋牛骨泡菜湯麵，湯麵不是辛辣麵嗎？來的是幼幼四川白色拉麵？中文兩款都寫湯麵，英文辛辣麵寫 ramen？泡菜湯麵？還以為泡菜湯，只係放幾片泡菜係側邊。全熟微暖煎蛋，鞋烚烚老老蛋白。鬆軟牛腩碎，嚥韌彈牙掛湯白色麵，整體互補不足算合格的。

員工們面口都十分陌生，只有老闆、煲仔飯還認識。

凍檸茶走甜，清爽的茶味，淡淡然的檸味，無特別。凍檸樂，樽裝永遠係最冰凍最好飲的，無可替代的地位﹗傳統罐裝都可以，瘦長高身罐裝味道怪怪地，膠樽裝最難飲。

腐乳通菜，油香菜甜爽爽，乳香添味不咸不濁，大注大注塞入，舒服極了﹗蠔油菜芯，份量真的有點少，比預計中爽甜多汁，沾點鮮味蠔油更美妙。

瑤柱腸粉，滿口滿嘴都是蔥花，零星的瑤柱蓉存在感微弱，整條釀入口慢慢細味。油膩感覺強烈，粉皮不夠薄不夠嫩亦不夠滑。不是想當年腸粉佬的質地與味道，入口便知龍定蟲，轉眼三十幾四十個年頭，真的光陰似箭﹗

爽滑魚皮，忘記走花生啊，我們都不吃花生的。味道夾得有點單調，蔥絲薑絲生菜絲，煲仔飯甜豉油，大量花生及兩片紅椒裝飾。我年青時還以為是刺身，近年才知道煮熟後冰鎮的。

淨紫菜魚蛋魚片，魚蛋真的十分富彈性，魚片白肉滑滑搭黃皮香口，兩者趙落魚味香濃而咸香突出，配上紫菜湯更相得益彰。

爽腩伊麵，幾十年來首次試爽腩，我其實想要膀腩伊麵的呢，叔叔聽錯我亦聽錯無緊要照食。爽腩筋膜位肥位有咬口但未見膠黏滑，瘦肉位軟綿無渣散散甜美牛味。伊麵嚥韌略有發脹尚算滑滑，湯汁清澈而濃郁可口。辣椒油香辣兼備，夠咸夠辣讓每啖伊麵都混著同時吸啜，加回少許分數﹗整體色香味平均，合格食得過。

牛膀牛腸伊麵，物價飛騰盛惠 $60個大洋﹗先來幾口原味湯汁，清甜的腩汁、芬芳的滷水，熱熱醒神添味飲多幾啖﹗香口鬆化甘甜的牛膀、肥美彈滑爆汁的牛腸，伴碟的生菜可以不要呢﹗辣椒油永遠都係主角﹗狠狠地隊三大羹辣椒渣，更和味更有風味。香辣並重，讓嚥韌彈牙滑滑伊麵夾著大量辣椒渣，熱熱暢快地吸啜﹗

第一站樓下巷仔澳門清湯腩、第二站隔離商場素食店。氣氛寂靜死氣沈沈的齋舖，步入餐廳無侍應接待，連打聲招呼也沒有。侍應們坐定定自顧自的邊按電話邊用餐，幾張枱上手食客已離開，但餐具食具都未有清理，竟然我地坐低先過黎執枱。沒有介紹菜色或推介菜色，沒有任何表情或交流或對話，感覺比茶餐廳的無服務更無服務，被冷落得難受。

黑松露野菌意粉⭐️⭐️估唔到用上天使麵，餐牌沒有寫清楚。餐碟勁大隻就連薄餅都放得落，捲起大大舊天使麵準備塞入口，意料之外有點反胃感覺。有股泥味直擊喉嚨，松露味怪怪的，用開那隻牌子？天使麵彈牙長長完整但味道太寡而單調，可能係素的關係。

口水素三鮮，是辣椒豉油嗎？襯上雲耳、豆角、蓮藕，味道唔難食。娃娃菜素鯪魚球湯，悶悶的味道十分清淡，素鯪魚球都有幾分似魚肉，沾點豉油會較好食。

剛才一通關，尖沙咀死城一樣飛既飛北上既北上，空城計﹗靜蠅蠅小貓三四隻食客，街道空盪盪，間間食肆都無需排隊直接有位。套餐雖然抵食、侍應叔叔招呼又周到，不過仍然吸引不到食客。

滷水鵝例牌，骨杉杉瘦猛猛無肉食，鵝肉鞋乾瘦，掛著風乾了段長時間，雖然滷水香濃回味。油鹽水粉絲煮蟶子皇⭐️⭐️⭐️真心不錯不錯﹗不計成本大大碌，去殼快灼立即上枱，雪白鮮甜滑一滑。不是普通的油鹽水，竟然加入藥材、雜菌，使其更濃郁香甜，粉絲索盡精華跟蟶子肉不相伯仲。

啫啫通菜煲⭐️⭐️⭐️滾熱辣吱吱喳喳送到，肉碎及汁液不停跳彈十分有活力﹗通菜味濃翠嫩鮮爽多汁不得頂，加埋肉汁蝦米辣椒齊齊趙更架惹味﹗荷葉土魷肉餅飯⭐️⭐️⭐️其實寫明籠仔蒸飯較好，會以為係真正荷葉飯，原來只係用荷葉墊底裝飾。土魷香氣十足撲面而來，流晒口水﹗反而完全聞唔到荷葉氣味。落足料無欺場﹗大量土魷香噴噴，配埋滑滑多汁肉餅送飯一流，飯粒夠乾身，撈肉汁甜豉油土魷油醒神無比﹗

瑤柱花膠燉雞湯⭐️⭐️⭐️⭐️⭐️保留鳳脂使得燉湯更加甜美，細薄花膠滑滑，湯汁濃稠帶膠，那有不好飲的理由。花旗蔘燉雞湯⭐️⭐️⭐️⭐️⭐️火喉十足老火燉湯，飲得到那深沉的味道﹗花旗蔘甘而不澀的味道深深刻在味蕾中，湯汁夾雜雞甜味，真心欲罷不能﹗

辣樂脆雞，雞皮炸得微燶微啡脆脆香口，狠狠地連皮帶肉咬開﹗白肉雖然嫩滑多汁濕潤閦令令，不過脆卜卜雞皮實在太咸，吃不消﹗辣味存在感薄弱幾乎感覺不到，只食到咸味。第一次幫襯第一次食，傳聞快樂蜂炸雞唔係好好食架咩？比家鄉雞更好食？但發現強差人意、非常失望。

薯蓉，粉口膠黏微暖，黑椒汁嗎？完全食唔出。可口可樂，汽水機的味道始終差少少。舖頭中門大開走晒冷氣，高溫炸雞越食越熱，出晒汗背脊濕晒，大大啖狂啜可樂都不太降到溫。

食完鬼金棒日式譚仔麻辣拉麵唔夠飽，專程行去肥仔度補補倉。見係附近又撞啱唔洗排隊就朝一朝聖吧，肥媽個肥仔第三代？甜醬芥辣仙女散花是但求其唧？謝檸檬瘋未傳人？唔夠大埔永利兩個後生仔有美學有耐性有熱誠續串續串細心地用掃平均鋪滿每粒滷水！成敗睇細節。

整體質素味道都只係普普通通，不過不失一試無妨，香港米紙年？叫幾串都已經$80蚊，阿嬸sell我話買夠$100蚊送個盒？咩盒咁巴閉呢？無所謂就買夠$100蚊。原來只係普通膠盒。畫蛇添足拆晒出無竹簽串住，另外比獨立包裝甜醬及芥辣自己唧落膠盒一篤二篤點黎食，而浸係底浸住豉油既食物勁咸！其實要一串串續串續串輕掃薄薄豉油再平均搽滿甜醬芥辣，味道平衡先會好味架！浪費了。

真係好討厭求那其唧上甜醬芥辣極之唔平均，依舊勁多甜醬幾乎芥辣！依舊勁多芥辣無甜醬、另外舊得醬油咸到死乜醬都無！我食開大埔間永利兩個後生仔真係用掃續串掃上薄薄一層芥辣一層甜醬，這些才是有誠意。

雞腳，薄薄雞皮、爽爽腳皮，仲有趙唔到的白筋，真心無肉食，只損其腳趾咸味過下口癮。大生腸，腸壁厚而爽帶咸鮮，越食越過癮。墨魚，非常入味，嚥嚥韌韌帶墨魚鮮。火雞腎，厚身帶硬未夠爽甜。豬耳，硬硬不膠彈不爽脆，給多一點牙力吧﹗豬脷，綿綿軟塾入味多汁。生腸花，細細粒造型特別，整粒入口爆汁甜爽脆。細生腸，比大生腸美味，滑溜彈牙入味可口。