假日忽然想食茶餐廳，即刻去大渣哥試下!!!去到有10幾個人排緊隊，但係排左20幾分鐘就入到座，人流好快。入座之前有專人度體溫，無發燒先可以入店。 店鋪大，有好多位，有專人負責分配位置。坐底叫餐伙記好快手，Meun改名睇得出苟左好多心機，例如：「自由西餐」，「食物衛生焗」，香港人睇完都會回心微笑一下。 我點左黑牛黑麵 ($50)，即係沙爹牛肉麵，一黎到已經聞到好香，食落麵質雖然軟左少少，但味道係香港久違既味道，我覺得香港人一定要黎渣哥到食番個陣味，跟餐仲有煎蛋火腿同丹麥多士。另外叫左一個牛肋肉飯 ($58)，肉質好稔，醬汁好味，飯既軟硬度適中，絕對係可以一試既茶餐廳!

觀塘有好多黃店食魚生飯，依間一定係其中一間又抵又好食既! 以前鋪面較細，我同男朋友都會外賣番屋企食，外賣份量一樣好多，唔怕會減量。 依家搬左過隔離鋪大左好多，多左好多位貼文宣，店主仲放左張枱係門面俾大家寫memo紙，近排仲有白絲帶提供，支持醫護罷工!!! 我同男朋友每人叫左一個三文魚玉子蟹籽飯 ($60)，有3片厚切三文魚、6片玉子同一大堆蟹籽，魚生新鮮好味，玉子甜度適中，蟹籽無腥味，粒粒爆汁!!絕對係可以encore再encore既魚生飯!!

本來打算同屋企人去九龍城食另一間餐廳，點知原來個間餐廳係藍店，即刻轉餐廳!!! 之後係和你eat app入面搵到依間泰重閣就去食啦! 去到見到客人都已經坐到出餐廳就知道好多人幫襯待應安排我地坐係街訪等，最後等左30分鐘終於入得去食啦! 所以大家如果想去食的話，最好打電話去訂位先。 叫左好多野食，包括泰東生菜包，夠酸夠辣!  馬拉盞炒通菜同炸蝦餅拼春捲都係正正常常 雞肉串燒好juicy，推薦! 豬肉串燒少少乾冬蔭公湯夠酸夠辣，但係有好多辣椒碎碎係入面，飲落口感唔太好 蝦醬炒飯好有穫氣，推薦!!食物價錢都係around$70一個，價錢合理又好食，希望大家可以多多支持黃色經濟圈啦!!!

今次終於有機會同男朋友黎試黃店Explore Kitchen，一上到去就見到門口有文宣俾食客自取，入到去個感覺好舒服，因為裝修好文青，以白色為主調，而且樓底好高，氣氛好舒服。被安排坐係窗邊，太陽晒入黎都唔會好熱，應該係窗戶加左隔熱物料。
同男朋友分別叫左一個牛肉芝士漢堡配薯條同香煎意大利飯配蝦。牛肉芝士漢堡勁多汁，好食! 薯條炸得好脆好香口，不過可能有人會覺得乾左少少。另外，香煎意大利飯好有驚喜，外面脆卜卜，入面有意大利飯個種煙韌，口感好好又好味!!! 十分值得大家黎試下。 提提大家，lunch time同下午茶時間係唔會提供水架，記得自備水。希望大家多多支持黃色經濟圈啦!!!

同朋友聚餐，打算要去幫下告急黃店，咁岩又想食麵包之類既食物，就搵左Season's Restaurant & Bar食。 一入門口，待應已經好熱情咁款待我地坐底，過程中亦有問下我地覺得食物質素點，好nice! 不過大部份待應都唔太識廣東話，落單時可能要用英文同身體語言表達下。
叫完野食就會有餐湯同胡椒脆餅，做得好鬆脆又唔會太辣，好易入手同好開胃! 不過雜菜湯就有少少油。
我同朋友叫左兩個lunch set，分別係菠菜雞肉意大利飯 ($88) 同 butter chicken curry with naan ($72)，set lunch包一個餐湯同一杯飲品，不收加一。
菠菜雞肉意大利飯份量剛好，味道亦岩岩好，唔會太大陣菠菜味，意大利飯好煙韌，值得一試! 另外咖哩好好味，好多雞肉，雞肉唔乾juicy既，不過naan就唔夠鬆軟。 希望大家多多支持黃色經濟圈啦!!

晚餐同男朋友選擇左去小伊甸食，餐廳都幾大，有足夠座位，唔洗等位就入座。座位都好寬闊，坐得好舒服。店內有大量文宣，亦有香港製造潤唇膏買，支持本土製作! 男朋友叫左一個鹽酥大雞排台式肉燥飯 ($80)，雞排夠味，炸得好酥脆，唔會食到成口粉既感覺。白飯上面有少少肉燥撈黎食，但份量較少，如果可以多一d成個飯就好食好多。 我叫左一個綜合滷水台式手作湯麵 ($74)，滷水食物好入味，不過麵條就比較軟身，唔夠彈牙。 +$20就有其中幾款飲品，我地叫左賞茶既桂花烏龍波霸珍奶，入口有淡淡桂花香，最後有烏龍澀味，好飲!!

店舖外面文宣好靚，大力支持黃色經濟圈！去到排左一陣隊就入得😌 店員識講廣東話同英文，落餐唔困難，而且佢地都好有禮貌，笑容可掬😀雖然店鋪面積細，但坐落都舒服。我坐既位置仲對住一堆文宣，大家可以自由訂價，入完錢自取心儀文宣，支持手足。 食物方面，因為新年期間無餐可以叫，所以就點左「傳統咖喱配烤餅」$70加$16有印度奶茶Masala Tea。咖喱雖然細細碗，但份曬岩岩好，而且入面好多雞肉，咖喱味濃，唔太辣，香料味剛好！烤餅唔錯，略嫌唔夠鬆軟同較餅。 大家黎到荃灣都可以試下Baba’s station！

新黃店💛😋 店內有唔少文宣，亦都有學生優惠，一個飯加菜蜜都只係$35😍 今次叫左一個肉燥滷雞翼煎蛋飯，粒粒分明既飯，配上蛋汁同肉燥一流，雞翼都好入味！ 再叫多個10隻西洋菜豬肉餃，餃皮好薄，餡料好足，好食過XX雲集！

白湯好味！食左九宮格果醬多士，麵包鬆軟，d果醬好得意又好味！無一款係伏味😋 士多啤梨牛仔骨好大件好抵食，唔會好甜，仲有個士多啤梨果醬俾埋你，中意更甜可以再落！叫set餐最後送既甜品絕對唔hea，係一件cheese cake！ 黑松露意大利飯好正宗，每粒飯都好有咬口，味道夠濃，雖然份量少，但都夠女仔飽肚😌 店員都好nice，大家快啲懲罰佢，一齊支持黃色經濟圈啦💛

入到鋪頭，店員好禮貌問我想坐普通座位定bar枱，最後我揀左坐bar枱
坐底之後就嗌左一個招牌情人(＄68)，即系芒果雪糕雪花冰，同埋一個芒果雪糕窩夫(＄58)。
招牌情人味道比較淡，個雪花冰甚至可以講得系無味 雪花冰旁邊系芒果肉粒，但吾新鮮，好似放左落雪櫃雪左好耐甘。雪糕味道一般無乜特別，所以俾我预期中差好遠，有少少失望。
但系，佢個芒果雪糕窩夫就值得推介 個窩夫黎到既時候暖暖地，兩塊餅中間夾住凍既cream同芒果雪糕，兩者一齊食個口感好特別，一凍一熱甘好好味！而且，佢仲一位一杯細糖漿附送，中意食甜野既朋友加埋落去一定會覺得特別好食！