香港做飲食生意很難，尤其是小店，所以遇上值得推介的都應該推廣一下。 店小，十多個吧檯位，再有四間個室，主打食物是刺身，也有串燒、天婦羅等供應，但魚是此店的亮點。 刺身併盤，看圖知新鮮，尤其是赤身，是高級日本料理的水平。 再看時令秋刀。 我們一共吃了四條，新鮮，肥美，加上特價$99 一條，日本居酒屋價錢。 另一名物是煮魚，可能是全港最好的；煮魚的汁調得很好。第一條鰈魚，賣$168 ，然後那魚鮫 $268 ，比茶餐廳貴少少。 店由兩名日籍員工打理，那位女負責人會說廣東話，男的大廚年青俊俏。 這店的總店在愛知縣，不知道有甚麼吸引了他們來港開分店。無論如何，會多㸃回去，希望他們做得住。

一心想去「別天神」試試豬骨湯，點知： 侍應為坐在我隔壁（ bar 枱）的女士送上一碗味噌蝦湯拉麵，然後女士發現面前尚有一碗，一個正常又怎會一次過叫兩碗拉麵？於是那位女士便告知服務員，她只點了一碗，另一碗不是她的。

一位年青的服務員拿著那碗湯在counter 騰兩騰，成條件月bar 枱得我冇嘢食，於是她問我：「小姐你有冇叫蝦湯麵？」我話佢聽我點豚骨湯的，她目無表情擰轉面。然後，我見她將那碗多出來的蝦麵交給負責煮麵的師傅仔，那位哥哥向負責落單的大嬸查問，大嬸一臉茫然，看到那位哥哥有點黑面，又聽到他類似畀說話大嬸聽，本著不要浪費食物的心態，於是我同大嬸講，既然煮咗，咁我要啦，更因為我超級肚餓，即係有得食都是好的。 大嬸將蝦麵交給我，然後立時說：「轉蝦麵加要補返十蚊，總共一百一十五蚊。」 我並不介意多付十蚊，但我想更正她，我不是轉蝦麵，我是幫你啃了那碗煮錯了的蝦麵。

說回那碗蝦麵，湯底質素的確不錯，麵條是白色，幼身那種，在遊一輪花園之後，還沒有變得太腍，可以想像若果一煮好上枱便吃的話，效果應該更好。套餐包四隻餃子，乏善足陳，得個油字，半熟蛋就幾好，有流心效果。總體質素屬於有驚喜，若果注重一下服務，可以加強顧客返轉頭的意欲。

朋友請食飯，選址 Mini Club，銅鑼灣開了分店，叫一枝酒，送海鮮拼盤咁話，又試吓，反正都要找地方Happy Hour。 一枝酒4舊水，併盤有翡翠螺，半隻龍蝦、半隻麵包蟹，蜆、青口、鮑魚，一枝酒可以有6杯咁計，一般happy hour ＄50一杯，即係多畀一百蚊就有嗰埋海鮮，都好似幾抵。

咁就要睇吓啲海鮮咩質素。又幾好喎，麵包蟹好多膏，翡翠螺同龍蝦都有鮮味，不過龍蝦細隻咗少少，都食得過。另外點了一款生蠔，Gillardeau，體積一般，唔算大又唔太細，鮮味度都可以。食到呢度就完，件事就有80分，但之後吃了兩款熟食，要扣分。

黑松露risotto ，先忘記所謂黑松露，唔係以為真你有呀？個risotto本身好有問題，太腍，太濕，太甜，好多芝士，朋友懷疑佢加咗煉奶咁甜，唔得，要留意。另外就是pizza，如果pizza有港式的，呢個就係港式pizza，過厚而不鬆軟，唔得，結果食淨三塊。 就算唔太好食，本來都諗住帶走，但可惜店員話佢哋冇外賣盒⋯⋯ 一間食肆冇外賣盒？一係就對自己啲食物好有信心，一係就主張浪費，睇嚟都要留意埋呢一點。

地方幾好，播啲歌都幾好聽，畀多一舊水有嘢食，可以考慮來happy hour。

以前銀幕街有間潮州菜位於地庫，裝修簡陋，不過滷水嘢好好，又平，可惜執咗，好彩最近發現佢變身之後，在摩頓台開返。原班人馬加新投資者，所以身光頸靚，都多咗貴價食物，鮑參翅肚唔少得，不過普通潮州菜都仍然有，呢晚食咗好多。

滷水一樣正豬耳，鵝片，個人推介個鵝紅，十分少有，而且質素高，件件實的的，必吃。胡椒豬肚湯，冇味精，又夠熱。凍蟹，＄988呢隻，正常水準，正常價格，唔過千算係咁。

凍魚，唔記得咩𩶘，出色，夠大條，魚鮮味，肉質結實。蠔烙，個邊煎到脆一脆，蠔仔剛剛熟。
沙爹牛肉炒芥蘭，好味，但細碟。川椒雞，啲雞切得好幼，似雞片多啲，味道其實幾好。最後，再整多窩方魚肉碎粥，包晒。

雖然好飽，不過食甜品是另一回事，尤其是潮式甜品，原來有不少少粉絲，芋泥、反沙芋、清心丸綠荳爽，湯丸，叫到一枱都係。不過，除了芋頭系，其他甜品反應都是一般。

埋單三千幾，9 個人，當然比以前，但都算合理，招呼好，冇死sell貴嘢，可以再去。

太古坊有新地標，就是新落成的Service Apartment 加一連三層，賣牛扒、海鮮為主的餐廳Mr&Mrs Fox。Mr & Mrs Fox 早前己開始試業但只招呼太古集團的客戶，到九月中才正式開業，然後聽講一直full booked。 唔緊要，地下嗰層可以walk in ，不過menu所供應的食物有限，唔理，試咗先。

聞說這裡的cocktail好特別，從drink list 裡頭的描述都好有心思，就叫一杯試試，有Gin和薰衣草syrup ，味道就好似香精。飲完呢杯，改飲白酒。 點了一個cold cut platter ，份量好少，param ham 真係得兩片。 兩款生蠔 Fine De Claire 同 Normandy , 細隻但新鮮。 Scallop cechive 個汁有泰式風味，少少西柚、西瓜、辣椒、芫茜，好醒胃。 今次就係食左咁多，兩個人，每人五舊水。嗯⋯⋯

朋友生日設宴中環星記，良朋歡聚全包宴，事隔幾星期，講返起大家繼續讚，反應熱烈便分享一下。

三寶併盤 － 九肚魚、鮮魷、燒汁茄子。 先來小食作前菜，炸嘢幾味，香口而不油，旋風式食完
湯 － 杏汁花膠燉白膠肺 兩大窩燉湯，足料有火喉，每人有兩大碗。 翡翠百合炒鮮鮑角 － 鮑角即是鮑魚碎上，呢碟一般。 豉油皇中蝦 － 呢味係星記名物，蝦夠大隻、新鮮，好食。 蒸花尾球頭腩 － 一邊清蒸、一邊加蒜茸粉絲，好大碟，原本他們建議苦瓜炆，不過我改咗，因為我唔食苦瓜，負責寫菜就有呢個好處，哈哈。 生炒骨，又係名物，新鮮肉排，肥瘦適中，唔乾，好味。 輝哥煎咸雞，又係招牌菜，煎完再焗，又香又 juicy。 另外，仲有梅菜蒸菜芯、炒飯、甜品。 一場來到，同場追加煎藕餅和柚皮，藕餅比柚皮出色。 以上一席16人，不計後加的藕餅和柚皮，＄6000 全包，即是加一，茶介全免，後來加多一人，多幾舊水，你話抵唔抵？我就話好抵，而且仲有房坐，免開瓶，仲想點先？下次有人生日，一於再去啦。

有做街坊生意的舖頭在附近是一種幸福，因為價廉物美在今天愈來愈少，遇上了，要多點去。

這小店得兩張枱，一張坐街邊，一張在舖入面，舖面極細，賣的是上海麵、點心。

甚麼也不想，點了一碗雪菜肉絲麵，只賣$25，負責煮麵的是一位婆婆，只見她收到柯打後，快快手手，不消三分鐘，麵已經預備好。

上海麵當然是一早煮好的，白色，幼幼的那種上海麵，十分正宗，麵質有點腍，但還可以。雪菜肉絲用了新鮮的雪菜，份量十分之多，味道不錯，甜鹹得宜，沒有味精，幾乎是這幾年來，吃過比較好食的。二十五蚊，還可以吃到有質素的食物，要多去。

一直以來都好想食到一個雞脾意粉，雞脾係炸嘅，然後意粉舖滿橙色一堆汁，唔係因為特別好食，係因為呢種叫情懷，係消逝嘅青春，邊個學生時代冇食過呢啲飯呢？

但係，今時今日的茶餐廳都愈做愈高級，而且要扮健康，做有營食肆，所以一堆汁嘅飯真係買少見少，加上老式茶餐廳，執吓一間，執吓又一間，仲邊有人做舊食茶記食物。 誰不知竟然俾我再遇到傳說中的螢光橙嘅茄汁飯！

香江茶餐廳，喺柴灣漁灣邨，差不多兩點見冇乜人，又有卡位，就貢入去試吓。快餐有幾款，＄37有例湯同飲品，我千揀萬揀，揀了A餐，茄汁雞扒腸仔飯。完全冇心理準備之下，遇到舊朋友，一見到碟飯，不得了，完完全全中學飯盒樣，真係嘩一聲。

味道？其實真係OK，塊雞扒冇雪藏味，腸仔冇塑膠味，個汁除咗杰咗啲之外，冇其他問題，仲非常大碟。 我相信佢應該仲有螢光黃色嘅咖哩飯，大家想搵情懷，不妨去吓。

首先十分贊同之前的食家對此店的評語，食唔食到好嘢，要看運氣。本人都幾怕去一間店，Head chef 和其他師傅的食材是不同的，要由head chef serve 你才會吃到好嘢。這總括了這一餐的感覺，因為我一邊看著隔離有幾款好像很精彩的而我們沒有，而我們已經是order ＄1980一位的那個set。

前菜：三文魚子蒸蛋，凍食的，三文魚子好大粒，平常不好此味的我，也很多掃光。

混了魚肝的剝皮魚，鮮甜。 鰹魚，加了點蒜頭，好食。 新鮮八爪魚，有嚼頭，有八爪魚味。 兩款燒了的，鯖魚和太刀魚，鯖魚一般，太刀魚不見肥美，可能太細件。
炸粟米球，好食。 他們自家醃製的烏魚子 煮八爪魚，軟腍腍，很入味，想要多一片。 鮑魚配鮑魚肝醬，那個醬乾掙掙不夠滑也不夠creamy，而且份量少，可能唔夠時間啩；鮑魚愈嚼愈無味，之前在今村和Sushi Shikon 吃到的出色很多。 醃了的池魚加紫蘇 ，一般。 壽司：金目鯛、中拖羅、白蝦、拖羅、兩款海膽、兩款海鰻、蛋，還有一款忘了是甚麼魚，共九件。老實講，沒有那一款特別突出，不是不好食，又不是好好食，非常意猶未盡，見隔壁點了納豆紫蘇卷，我們跟著叫，結果那卷成了當晚的精選。 最後有湯和生果。 這一餐＄1980 ，不知道值不值，但有少少失望是真的。

初初開的時候很想試，想經常爆，訂唔到位，在差不多忘掉這間餐廳之際，又有朋友提議去，還輕易訂到位添。 Neighborhood 整個定位是casual fine dining，它在一條橫巷之內，低調、cozy ，菜式經常更換，價錢不貴，裝修有型有款，服務親切；觀乎顧客群都是ABC多，幾個女仔，幾個男仔，似乎適合三五知己聚會，不適合情侶，因為比較嘈。

yellow fin tuna confit “ventresca” 煮熟了的吞拿魚，加上青椒，橄欖做成的一道醃菜，酸味味都幾特別。 Pickled Beef Tongue /Leeks/truffle 薄切的牛脷加上大蔥，雞蛋碎，賣相好靚，truffle 唔會太多，冇搶晒其他味，好食。 Roast lobster/girolle/sweet corn 正常龍蝦味，可惜唔夠熱，同埋如果粟米可以多啲就好。 Sea urchin capellini”carbonara” 呢個唔得，以為”carbonara應該是撈勻啲海膽嗰款，但原來是舖在面在加芝士焗少少，個capellini 冇味，海膽鮮味亦差少少。 Daily meat /roast pigeon 出色，外脆內嫩，煮至medium rare ，十分嫩滑，如果唔怕太生的話要求medium rare，否則應該冇呢個效果。