早兩天在經過這裡發現這間特別的健康湯品小店，於事今晚就來試試。七時半來到發現沒人問津，店內只有三數張枱十個位左右，起初有點擔心會不會進了黑店，但之後半小時便全場爆了，虛驚一場。今晚點了瑪卡(秘魯人蔘)泡飯加玫瑰露雞翼，本以為主菜雞翼是另上的，原來是放在湯中一起上的。蔘湯很清甜，沒苦甘味，湯中有一些木耳和甘荀絲，很爽口，飯是紅米飯，的確很健康。原以為泡在湯中的雞翼會很淡味，其實依然很夠味。這是一餐很美味健康抵食的晚飯。

7月31日, 今晚難得同班姊妹去食飯~ 走到亞士厘道，見到一間叫做肚餓鳥嘅串燒店，覺得個名都幾搞笑，串燒亦啱唒我地班唔想食咁多澱粉落肚嘅女仔，於是決定一試！入到去餐廳，同一般串燒店相比環境裝修出奇地雅緻，灰色牆身配上簡潔裝飾，連同高身木造枱櫈更見型格特色~ 打開餐牌，𥚃面嘅食物亦幾特別！

::: 泰式生蝦 ::: $68
估唔到串燒店都有泰式生蝦食！蝦味不俗，生蝦汁微辣惹味，如果可以冰鎮耐啲，肉質應該可以更爽脆~

::: 芥香昆布條 ::: $28
撈昆布個汁幾有趣，有wasabi、醋、仲食到有啲美極味！昆布條幾有咬口，味道鹹酸辣兼備，而作為前菜就䶢咗啲．::: 燒鰻魚 ::: $38
鰻魚串大大條，魚塊都幾大舊！基本上鰻魚加上照燒汁味道唔會有咩失手，但魚皮燒得唔夠脆，有啲可惜．

::: 汁燒露筍 ::: $32
露筍係幼身嗰隻，難得燒得恰到好處~ 露筍軟嫰得嚟又夠爽口，咬落仲有水份唔會過乾，而清淡露筍搽上微甜燒汁更添惹味！值得推介~

::: 燒羊鞍 ::: $48
羊鞍大大件，聞落憻味十足，但食落反而又唔太覺．羊鞍係燒到全熟，肉質自然較韌，如果可以問下客人要求先再整會好好多．::: 烤冬蔭功汁黑豚肉 ::: $78
好特別嘅一道菜~ 蓋上脆皮嘅焗盤甫上枱已經令人驚喜，切開脆皮後更令人驚奇嘅係個賣相似咖喱嘅醬汁竟然係酸酸辣辣嘅冬蔭功味！黑豚肉肉質juicy，味道香口惹味，不過醬汁太多太濃味，淨食餸未免太䶢，如果配下麵包或索性嗌個焗飯會好啲！::: 鹽燒厚切牛舌 ::: $48
望落每粒牛舌都真係相當厚身~ 之但係當咬落去先發現牛舌好硬，仲要緊緊黐住支竹簽咬唔郁... 好彩用力扯出牛舌後入口發現味道都唔錯，如果唔燒咁耐應該會好味啲~

::: 吉烈蝦 ::: $28
吉烈蝦炸得超脆而且唔油膩~ 可惜炸皮略厚，蝦肉未算細條但蝦味一般．::: 汁燒娃娃菜 ::: $18
一串有五、六片娃娃菜，份量都算適中．雖然娃娃菜外表燒得較乾，但食落都還好，仲有少少菜味嘅．

::: 惹味菜芯 ::: $18
菜芯就真係麻麻... 燒得乾之餘有幾條咬落仲帶苦味... 失敗！::: 惹味燒餃子雞翼 ::: $48
其實即係明太子釀雞翼~ 雞翼外形飽滿，外皮香口夠脆，內𥚃餡料都幾足，見到有一大舊明太子，整體味道不錯．

::: 汁燒雞脾菇 ::: $18
雞脾菇超厚切，食落真係啖啖肉~ 本身味道較淡嘅菇配埋燒汁啱啱好~::: 芝士燒蠔 ::: $48
賣相吸引~ 食落蠔味一般，一定唔算新鮮，但起碼唔腥，有芝士襯托下都還可以，不過呢個價錢就未必值喇．

::: 蒜茸燒蠔 ::: $48
蒜茸燒明顯比芝士淡口，反而更能突出蠔味．可惜啲蠔本身唔夠鮮...

::: 汁燒鮑魚 ::: $88
今次個鮑魚就真係夠新鮮喇！燒汁已經完全融入鮑魚之中，味道頗有溏心鮑魚嘅影子~ 難得鮑魚夠入味之餘肉質仍然保持到鮮爽彈牙，一衆姊妹食到讚不絶口！::: 砵仔焗大蓮鮮蠔 ::: $78
開頭對呢個咁勁嘅菜名抱有頗大期望... 嚟到亦覺得賣相不俗，原砵上枱，面頭燒得焦香~ 點知食落啲蠔係苦嘅！調味料亦落得唔均勻，一啖淡一啖超䶢... 說好的鮮蠔呢？::: 18cm芝士燒虎蝦 ::: $48
名副其實18cm就18cm，呢隻虎蝦真係夠唒大隻啖啖肉！芝士亦落得足~ 芝味同蝦味兼備，幾好．

::: 蒜茸燒茄子 ::: $38
茄子開邊對切超大條！蒜茸份量十分慷慨！茄子本身係冇乜味的，全靠上面啲蒜茸同醬油吊味~ 但就算沾滿醬汁都唔覺得好油膩，連皮食亦唔會太乾，啱唒怕肥膩嘅茄子精！::: 牛油燒粟米 ::: $18
賣相滿分！！！一客會有半條粟米份量~ 仲要粒粒粟米燒得脹卜卜，牛油香而不膩~ 仲要用番啲粟米葉打個靚結，身為粟米痴的呀菲表示十分滿意！粟米迷必叫~

::: 太極焗薯 ::: $68
呢個太極焗薯都係心機嘢~ 將切片番薯蘸粉炸再蘸上砂糖，口感夠唒外脆內軟！撇除外層砂糖略多，炸皮夠脆而內裡番薯甜美，其實算係幾好味~今晚大家完全係斷咗理智咁叫到成枱都係！難得上菜速度又幾快~ 可能叫得太多，個老闆都走過嚟問我地對食物嘅意見，對於我地嘅批評亦虛心接受同埋話會改善．上嚟睇番先發現原來最近咁多喊面，我地食完又唔覺得係咁差啫~ 而且論環境坐得舒服，服務亦未見有問題，而且老闆肯聽意見，對於今時今日嘅社會實在值得支持架喇！