收到風，老字號「竹園海鮮飯店」因深受疫情打擊，近月將三間分店合拼為一，於上環重新開店。地舖門面光鮮搶眼，不難找到。門外有個易拉架介紹今期做緊盆菜及秘製潮州翅優惠。落地玻璃窗後嘅用餐大堂光線充沛，散座均以屏風間開，感覺都好企理。七人派對於私隱度更高嘅廂房內進行，有專人招待，仲有個空氣清新機，尤其衛生舒適。最遲嘅XO仔到步時大家已經食緊前菜送酒酒。好在都仲趕得切享用濃潤且極富光澤嘅流心皮蛋！秘製潮州翅（推廣價$298/位）：翅翅以砂鍋滾住上，並由經理哥哥親自續一分配。熱辣辣嘅潮州翅香濃潤滑，足料暖胃，特價期間實屬必吃之選！東星斑球（$480）：據悉東星當日啱啱新鮮劏出，應建議起肉炒球。意外地，東星斑球嘅魚皮超脆，魚肉軟嫩鮮美，吃畢舌上仍留有回香，長輩們無一不讚！正宗印度咖哩崩沙腩（$298）：厚厚嘅崩沙腩唔肥，鬆爽有咬口得黎仲一啲都唔韌。量足嘅咖哩汁少辣惹味，另配條熱手嘅法包（$40/半條）可黏盡精華，掂呀！椒鹽海檀蝦（$950）：為怕大家食得狼狽，主人家專登安排師傅將瀨尿蝦預先去殼後方才以椒鹽炒出，瀨尿蝦肉爽脆甜美，入哂味兼好夠鑊氣。如相所示，橙色嘅瀨尿蝦膏成抽成串咁好顯眼，食落鮮香肥潤，真材實料冇得輸！芝士牛油焗龍蝦（$1,120）：鮮黃吸睛嘅芝士濃汁柔滑芳香，白雪雪嘅龍蝦肉爽厚彈牙，濕潤脆口，百吃不厭，！鮮波蘿咕嚕肉（$128）：咕嚕肉酸甜醒胃，半脆半鬆潤。清炒茭白筍（$108）：色澤奶白嘅茭白筍甘香脆巧，清甜得黎一啲渣都冇，勁啱小肥口味！榴槤布甸：XO因敏感問題唔食得榴槤，不過聽見Mi哥如何形容榴槤布甸，真係忍唔住要同一眾榴槤粉分享：「望落係一個好普通嘅布甸，但咪埋眼就好似食緊一個真嘅金枕頭咁，好實在，減肥都要食！」名海鮮酒家「竹園海鮮飯店」上環新店光鮮企理，服務生誠懇有幹勁，馳名海鮮及是日推介菜式均高質美味，貨真價實，有心食肆肥肥家族絕對支持！

偶然於網上發現中環新店「Woke」大張旗鼓以大麻二酚CBD入饌，咁有話題性喎，XO仔當然係要組隊一試啦！網上訂座流程十分簡易。餐廳三層樓高，唔想行樓梯的話可以要求乘搭升降機，其中最高層為私人廂房，細佬未有參觀。入口嘅地下層為樓底高高嘅酒吧區。二樓嘅用餐大堂排出兩行二至多人合併式散座，長輩略嫌厚墊椅櫈嘅椅背唔夠高，唔係咁好坐。其中一邊有幅玫瑰花牆，似乎都幾受情侶歡迎，室內燈光偏暗應該係要製造氣氛。每天下午三點至八點均為歡樂時光，指定酒水可享歡樂優惠。面對住眼力同耳力較弱嘅年長食客，年輕嘅服務生就顯得有點不耐煩，幸好細佬早於網上參閱及了解過餐牌，方才可避免一場不愉快嘅小插曲。晚市共有兩款套餐可選，其中七道菜嘅「Boss Dinner Set」$1,388/位。未有資格做波士嘅小肥經濟又爛飲，早就揀定$588/位嘅「6 Course Dinner Tasting Menu」，貪佢平一半有多兼包咗杯酒酒飲。有別於一般高級西餐廳，店子未有提供餐包，而且餐桌上嘅自用餐具原來係用足成餐飯嘅！因未有額外嘅碟子或餐具架承載，每道菜後都要放返啲刀叉落餐墊或餐巾上；無論餐廳標榜幾新潮，似乎衛生及專業水平都未能稱得上為高級料理「Fine Dining」喎，難聽啲講句真係以為自己食緊豉油西餐囉！套餐第一道嘅「Welcome Drink」有三個選擇，酒鬼們當然係棄選無酒精雞尾酒啦！Avocado Tacos, Negitoro, Wagyu Beef Tartare：以玻璃盒呈上嘅三色墨西哥夾餅頭盤賣相精美。三塊夾餅均輕巧脆薄，應建議由左邊食起。第一件醉蔥吞拿魚味道最清，不過就欠缺咗份鮮甜。中間主角位嘅牛油果醬軟潤清新，恰到好處！意外地，第三件和牛他他完全唔會過咸，以脆卜卜嘅蒜片點綴更有提鮮之效。食完可以蓋好個靚盒等人收。Wild Mushroom & Black Truffle Cappuccino：黑松露蘑菇忌廉湯芬芳輕盈，細細杯嘅份量剛剛好。Abalone & Sakura Prawn Angel Hair Aglio e Olio：天使麵條纖幼軟腍，薄薄嘅鮑片鮮濃有嚼口，簡單味佳。Lobster Tail Linguine（另加 $198）：反而個龍蝦意粉調味偏酸，食落龍蝦肉唔得爽甜，唔值加錢去試。主菜環節其中兩個人點咗「A4 Kagoshima Sirloin 」（另加 $198），並講明要半生熟，無奈色澤紅潤嘅A4和牛真係生咗啲，唔怪得知auntie要求煮熟啲嘅。Slow Cooked Iberico Pork Cheek：牛面額就食得多，慢煮豬面珠墩好似第一次見，所以就揀咗黎試。印象中慢煮菜式多數都好腍，不過此味豬面珠墩堅韌，用刀都唔係好切得開之餘，就連叉都變哂形，蕃薯uncle最終為寶貴嘅牙牙著想而決定放棄繼續食落去。Japanese Cheese Cake + Selected Ice Cream：芝士蛋糕味道唔會過甜，唯一質感唔係好夠鬆軟，唔似心目中嘅日式芝士蛋糕。可能隻碟較暖，伴配嘅綠茶雪糕好快就溶哂。中環潮派料理「Woke」宣傳中提及到廚師為給予食客嶄新嘅高級餐飲享受運用CBD作食材，無奈集合多國食材烹調出嘅菜式質素甚為參差，小弟真係食唔出邊啲有CBD成份，亦不覺有舒緩神經之效，紅肉主菜直頭食到連餐具都扭曲埋！加上服務生略欠耐性，晚餐設下嘅價格偏高，直令XO仔腦中不停浮現出筆筆唱出「醒醒，盡快清醒」嘅片段！

長輩們為哥哥同契妹慶生，搞咗個沙田一日遊，XO仔要等到收咗工先趕去「Tom Bar & Grill」會合大隊，飯前歡樂一番。位於科學園嘅玻璃屋酒吧餐廳靠近吐露港，坐室外座最能欣賞到個靚景，無奈三十幾度高溫下，唔係人人頂得順。室內用餐大堂中央有個弧形酒吧。多人派對坐合併式散枱更為合適，配備嘅藍色厚墊絨櫈又型又舒服。契妹指出，埋位時店員建議掃一掃二維碼自助點餐，只係所派發嘅便條上嘅時間及人數資料完全錯誤，有啲奇怪。餐店嘅歡樂時光為週一至週五嘅下午三點至八點，特價限定餐飲共有兩頁之多。酒鬼們見到成枝餐酒叫都只係$200，紅白同價，反而汽酒要$250，不用多想即點咗一枝白酒黎分，不過真係冇諗過要中途一路自己斟添！小肥簡單啲要咗杯意大利汽酒，因深覺$50唔算特別平。空肚飲酒易醉，暈uncle同蕃薯uncle就從下午茶餐牌叫咗啲小食送酒。芝士煙肉焗薯皮（$98）：激愛蕃茄嘅契妹竟然食完第一口即挑起餘下嘅蕃茄粒，唔怪得知uncle試咗一件即轉交咗俾三個細路食，XO仔見勢色唔對，當然唔會搵自己嘅肚肚笨啦！串燒沙爹（$98/半打）：半打沙爹點咗三串雞肉同三串牛肉，當中牛肉還好，但係雞肉就堅嚡同乾。越式春卷（$65）：如相所示，細細條春卷唔似係用越南米紙所包出，墊底嗰塊生菜仔細到冇可能包住件春卷黎食，實有貨不對辦之嫌，其實淨叫春卷咪得囉！平心而論，春卷咬落厚身得黎偏韌，唔夠香脆，加上餡料量少，不吃也吧！近海嘅「Tom Bar & Grill」除咗有個靚景之外，點餐斟酒全為自助模式，服務可以話近乎零，送酒小食不甚討好，歡樂優惠又唔係特別抵玩，無謂嘥彈藥去試。

蕃薯uncle早排留意到跑馬地有新店完成裝修，其灰牆配玻璃木門嘅門面輕鬆優閒，單憑「Viet」個招牌都估到係食越南粉，仲影埋相相俾小肥做記錄，明顯勁期待。上週六終於等到綿發街斜坡上嘅小店開幕，中午時份即約同第一時間入去探個究竟！睇見門外擺滿祝賀鮮花及氣球，好有氣氛呀！步入餐廳，最震撼就係見到右方凹咗落去嘅開放式廚房，除咗夠光鮮企理之外，透明度高嘅型格設計令樓底望落更高，嘻嘻，好在XO仔夠早，中午到步都搶到幾個吧位坐。室內光線充沛，冷氣足，不用花巧之裝潢，牆上嘅木框鏡子及小盆栽看似小屋內嘅環境，感覺尤其寫意。埋位先有冰涼清新嘅薄荷葉檸水飲，親眼睇住服務生不停由名牌飲用水淨化過濾器斟出水水，飲得特別放心！每位貴客面前都有個靚靚嘅木托盤，比起單一張餐墊衛生同有氣質得多。點菜紙每人要填一張，中英對照，紙上注明不設加一服務費，簡單易明，可惜在限量供應嘅日本宮崎A4和牛肉眼河當日未有貨。落好單，哥哥仔隨即送上餐具、小食及配菜。贈送嘅自家醃製蕃茄仔鮮紅飽滿，以酸酸甜甜嘅醋味啫喱點綴，小食十分開胃。特級火車頭河另加雞卷（$158 + $30）：用上美國安格斯肉眼及牛小排切出嘅牛肉片肉香軟薄，唔會過熟；湯底清甜而不濁，飲落唔似有落味精；河粉麵條柔軟滑溜；雪白半透光嘅生洋蔥爽甜多汁；牛丸鬆爽彈牙；蔥同芫茜一樣足料冇得呃！如相所示，另加$30嘅雞卷集齊黑肉同白肉，意外地厚肉鬆潤，毫不乾嚡。最有特色就係兩片奶白色嘅牛胸爽，爽身兼脆卜卜，爆！配菜中嘅芽菜每條同樣肥嘟嘟、白雪雪，清爽得黎又甜又多汁，係大小雙肥食過最好味嘅芽菜，絕對屬正菜！越式小食拼盤（$148）：拼盤內含四件越式炸春卷、兩件紫蘇葉炸蝦餅及四件越式扎肉。新鮮炸出嘅炸春卷熱力十足，外層鬆化香脆，一啲都唔油膩，餡心軟嫩清甜，以生菜包住黎食，點埋秘汁即倍添滋味！切得夠薄嘅越式扎肉輕巧惹味。圓圓嘅紫蘇葉炸蝦餅爽脆芳香，厚潤鮮美，各有特色。特色越南法包（$75）：包品由師傅即場包製及切件。哥哥大讚特色法包鬆脆又鬆軟，以扎肉、豬肝醬、青瓜、紅蘿蔔、芫荽等作餡，乾濕程度恰到好處，不過一個人未必食得哂一份。媽咪留意到熱嘅越南香濃滴漏咖啡（$33）都係喺餐桌上即沖即滴嘅。凍越南香濃滴漏咖啡（$36）：凍越南咖啡則均由工作人員於廚房一旁代為滴漏、加煉奶、攪拌及加冰，淨睇都覺得哥哥專業細心，細佬出哂名雞手鴨腳，此舉梗係無任歡迎啦！凍越南咖啡香濃甜滑，掂呀！遇上人家開工大吉，幾口子仲免費獲贈拜神燒豬，鴻運當頭咁好意頭喎，當然不可拒絕。越式小店「Viet」時尚舒適，服務生親民有幹勁，傳統嘅越南小食及湯河高質美味，遲啲如果有埋啤酒飲就更加完美！新店黎講運作相當暢順，跑馬地街坊又有口福囉！

打咗半日衛生麻雀，XO仔食咗人生中的第一舖地糊，明顯意猶未盡，晚餐同班牌友要去跑馬地食埋「大四囍」先感到滿足。位於昌明街頂嘅「大四囍」灰磚拼金漆招牌嘅門面好似古裝片啲客棧咁，雙囍嘅木門尤其到題。室內並無花巧之裝潢，以木為主嘅間隔簡潔乾爽，簡單嘅吊燈同弧形木門已散發出中國風味。用餐大堂約有六張二至六人散枱，因當晚已坐滿八成食客，不好拍照。弧形木門身後原來設有兩間私人廂房，右方嗰間可容納上八人，最低消費額為$600/位。左邊較大嗰間則為$800/位。每位席上都擺有齊備嘅自用及公用餐具。十二頁餐牌早已有人上載，故電話訂座時亦懂得預訂招牌菜式。得知店子未領有酒牌，嘻嘻，暫時開瓶費全免喎，當然係放心自攜佳釀啦！金沙鮮魷（$158）：始終第一次食地糊太興奮，見人就講，電話亦忙個不停，第一道菜上枱時竟然唔記得咗影相，好在記得嗰陣都唔遲，仲有四件喺碟，Ken哥哥仲好人到轉咗隻乾淨碟話可以影得靚仔啲，認真唔話得！金沙鮮魷層炸皮香脆，鮮魷亦十分爽彈，用上嘅咸蛋黃份量恰到好處，惹味得黎完全唔會過咸。椒鹽鮑魚（$88/隻；兩隻起）：意外地，椒鹽鮑魚香口有嚼勁，一啲都唔韌，鮮味濃郁，送酒佳品也！潮州紅燒翅（推廣價$298/位）：經理Edmond哥哥推介嘅潮州紅燒翅原價$488/位，特價叫黎食份量覺得尤其足。翅翅每盅都係用蠟燭熱住上，包保熱力十足，無奈個人略嫌個紅燒湯底調味偏甜，有啲怪怪咁。鮮菠蘿咕嚕肉（$168）：咕嚕肉雖然唔係潮興嗰隻拔絲脆皮，但都皮脆肉鬆嫩，特色在於拌配新鮮味清嘅菠蘿肉而非罐頭菠蘿，食起上黎健康清新得多。甜言蜜語（$138）：契妹大讚啲菜同木耳爽脆非常，夾埋合桃變得脆上加脆。潮式蠔餅（$188）：成餐飯最失色係個招牌蠔餅，姨丈形容得極之中肯同貼切，層層疊嘅蠔餅個賣相勁得，食落去係脆口嘅，不過粉多過蠔，不禁令人覺得有少少名不副實，不吃也吧。羊肚菌燒豆腐（$138）：上枱一刻，脆嫩嘅羊肚菌已芬芳撲鼻，菌下嘅燒豆腐方磚又夠軟嫩滑溜，進化版紅燒豆腐輕盈健美，可口味佳。香醋脆皮牛肋骨（$338）：少肥嘅牛肋骨肉超級鬆軟，毫不乾嚡，而且真如餸名般脆皮，酸甜嘅秘醬更有提鮮之效，就連配角嘅蕃茄仔都咁鮮紅多汁，個人誠意推介！鮮沙薑爆走地雞（$268）：橙亮嘅沙薑雞件肉香軟滑，好夠鑊氣。生炒菜芯苗（$108）：菜芯苗翠綠清脆。濃湯海斑脆米泡飯（$198）：砂鍋中嘅泡飯夠哂熱辣辣，奶白色嘅湯底鮮甜香濃，金黃乾巧嘅脆米於上枱後先加，暖胃嘅泡飯半脆半軟腍又帶爽，極易入口。松露珍菌炆伊麵（$168）：散法出松露香嘅伊麵潤甜軟熟。四囍反沙芋頭（$118）：契妹話甜品反沙芋正正常常夠乾身。新店「大四囍」光鮮企理，服務生誠懇落力，加插咗新派元素及配搭嘅菜式有驚亦有喜，跑馬地餐廳黎講價格尚算合理，唯一飯後勁口乾，所以今次先比個OK評，希望下次廚房落味精可以輕手啲。

週三傍晚黃雨下陪伴鏡粉契妹睇姜B同阿Jer「阿媽有咗第二個」，專登要去「英皇戲院」全因有獨家紀念票送！揀埋520場依個「蒙著嘴說愛你」夠哂堅呀！最就腳嘅時代廣場全新裝修，光鮮企理得很！或許大家對疫情仍處於高度戒備狀態，小食部冇人排隊，細佬可以任影唔嬲。擺出嘅一頁餐牌簡單易明，不過奇怪在唔係全部都有英文翻譯。如需要英文版就要去到後方取餐處睇個銀幕餐牌。值得一讚嘅係取餐處除咗有齊乾濕紙巾之外仲有口罩套提供，抗疫功夫做到足。不用費神，契妹早已下訂決心要買個「細爆谷套餐」換埋套限量版角色珍藏卡！無奈爆谷居然冇哂朱古力味，結果要勉強地叫咗個焦糖味黎食。預先包好嘅爆谷又凍又腍，同以前去戲院食新鮮爆嗰啲真係差好遠，$68絕對有搵笨之嫌！XO仔點咗個「芝士四重奏熱狗套餐」，原價$79包咗杯大汽水或川寧熱茶，收咗工已屬歡樂時光喎，見有生啤飲硬係要加$49升埋級，一條龍支持姜B代言嘅1664啦！一向飲開嘅1664生啤有信心嘅保證，不過個芝士四重奏熱狗就唔係咁得啦！熱狗個麵包皮脆包鬆軟，可惜個命脈腸腸粗身得黎又粉又腍，完全唔爽，加乜芝士都救佢唔到！熱狗盒面講明睇緊戲時食已經會覺得好味咗，咁如果唔睇戲嗰陣食時咪。。。唔敢想像囉！時代廣場新開間「英皇戲院」又靚又舒服，最正係有獨家紀念品送，只恨外賣嘅高價小食質素低，最基本嘅爆谷熱狗失敗透，幸好有冰涼嘅生啤搭救，好戲感人嘅情節賺人熱淚，堅持風雨不改真的看得見幸福哦！

早幾回提到萬年大廈有孖舖上陣，七月頭品嚐過靈魂烹鳥後，深覺「希鳥」嘅割烹料理高質豐盛，一收到消息連體嘅姊妹店「うしどき」（Ushidoki）於月中啟業，即使只有午市十二點一輪，用餐時間仲要成兩個半小時，肥肥家族都要盡快抽空週六一試。網上訂座全英語操作，只需填上少少個人資料，包括聯絡電郵及電話，不用預繳訂金，簡易得很！餐廳中午準十二點正開門，拉開黑色木門再行經日式布簾即可安心進場。兩間店舖間隔相似，除咗有間可容納六人嘅私人廂房（最低消費額為$10,000）之外，用餐大堂都係以吧位圍繞著開放式廚房，務求貴客可直接觀賞師傅嘅手藝。不同之處在於「うしどき」嘅座位只有十三個，亦即少「希鳥」五個位，光線更充裕，配上正常高度嘅椅櫈感覺自然地比高櫈端莊。室內裝潢簡約，圓圓嘅燈籠帶有傳統和風氣息，牛牛畫品及以店名繪出嘅靚碟則時尚雅致。唯一不知是否外出炎熱嘅天氣影響下，冷氣溫度唔係幾夠凍，連一向唔怕熱嘅媽咪都滴哂汗。每位席上都擺有齊備嘅自用餐具、口罩套及餐牌。用上嘅牛牛筷子座菂薂到題。入座後即有熱毛巾及熱茶，睇清楚啲原來茶杯係分咗男女版架，細緻得很！餐店剛剛取得酒牌，開瓶費設為$400/樽普通裝紅、白、汽、清酒及$1,000/樽1.8L清酒，定位拍得住酒店。中午飲得唔多，五口子最終決定從四頁酒牌點選。XO仔頭腦比較簡單，眼見其中一款清酒「犇」（$680/樽）嘅英文譯名恰巧跟店名相同，諗住唔會衰啦，可惜酒酒唔係咁啱自己同家人口味，而且個冰盆完全唔實用，啲倒汗水流到成枱都係樽酒都唔係幾夠凍，頗為失望。反而識郁嘅靚靚清酒杯有特色得多！日英對照嘅餐牌右方印出午市唯一一款嘅八道菜廚師發辦套餐，$1,300/位，另收加一服務費。左方則道出餐店「由脷到尾」嘅概念，以特選鹿兒島小田牛融入節令嘅食材及獨特嘅烹調方式，帶領貴客進入新派懷石料理嘅感觀世界。每道菜均由日籍掌舵人長谷川師傅親自操刀及呈上，一絲不苟；雖然好多時未必聽得明哂佢啲日文，幸好有年輕落力嘅大風妹妹同小冬妹妹即場翻譯，場面方可零尷尬。冷鉢 - 冷しゃぶ　土佐酢ゼリー Chilled shabu-shabu, Tosa vinegar, Sprinkle Karasumi：為午宴揭開序幕嘅冷盤中，呈粉紅色嘅和牛件經過低溫煮熟，味清軟潤，拌拼嘅節令時蔬含爽脆尤甚嘅蕃茄、翠玉瓜及秋葵，進食時撈入閃亮透光嘅土佐醋啫喱、墊底軟綿綿嘅山芋泥及鮮黃嘅烏魚籽粉末即為和牛沙律倍添清新。座付 - 牛タンスープ 順菜 柚子Beef tongue soup, Water Shield, Yuzu：金碗中嘅牛脷熱湯外表毫不混濁，清香又清甜，據悉湯品除咗係以小田牛煲咗三個鐘之外，仲溝埋咗隔離店「希鳥」以鹿兒島走地雞熬上六個鐘嘅雞清湯，這碗牛雞清湯組合新穎得黎好協調。因內臟入口管理限制，湯中嘅兩片和牛牛脷源自澳洲而非鹿兒島；意外地，半厚身嘅牛脷極之軟腍嫩滑，差啲可以同伴配嘅解暑冬瓜比拼，加上芬芳嘅柚子皮入饌，直令清湯變得醒神開胃。温物 – すき煮 玉葱 温泉卵Sukiyaki, Soft boiled egg：師傅於動手前先展示紅白紋理分明嘅靚靚和牛西冷薄片，視覺效果相當震撼！上枱前一刻喺細佬身旁刨出芳香撲鼻嘅黑松露，嗅覺效果都營造埋。相中隱約應該睇到兩三成熟嘅和牛壽喜燒鮮紅潤澤，於大碗中正享受緊以牛雜、日本洋蔥、日本頂級太陽卵及醬油秘製而成嘅溫泉蛋浴。應建議將深啡色嘅洋蔥碎捲入和牛片中，再黏上鮮美燈亮嘅秘醬，和牛壽喜燒柔潤軟滑，入口迅即化於舌上，和牛卷中嘅洋蔥爽脆惹味，蛋蛋秘醬香甜滑溜，刺身級蛋蛋果然有料到，味覺效果絕對誇啦啦！托盤上，跟和牛壽喜燒仲有一羮白飯。創作力量同幻想會嚇人一跳嘅廚神媽咪真係叻，未有人介紹已經估到個設計係將剩餘嘅蛋汁秘醬淋喺白飯面，嘩，連食客都可以善用食材，依招超掂！觀察入微嘅大肥留意到靚羮只適用以右手揸住黎食，不過遇上粗野嘅XO仔左右手用齊都倒唔出汁液，結果師傅就提議掉轉黎將白飯倒入碗中攪勻黎食，依個方法其實更能索盡精華，果然有腦！箸休 – 柚子ともものソルベYuzu and peach sorbet：午餐去到中段，每人面前都有個大頭造型小鉢，藐嘴男同大面珠女兩個版本都一樣咁搞笑。鉢中頂面塊柚子乾尤其消滯，桃拼柚子味冰沙微甜微酸，清涼得黎剛巧為味蕾洗滌一番。替鉢 – 赤ワイン煮 根菜いろいろBeef cooked in red wine, root vegetables：紅酒醃煮嘅和牛塊鬆潤香濃，以傳統日式茶碗蒸嘅形式煮出嘅紅棗蛋白層甜滑得黎輕盈健美，用蟹肉勾出嘅湯芡鮮味灌溉，此道和洋海陸菜式口感同調味均相當豐沛！焼物 – サーロイングリル 季節の野菜Grilled sirloin with seasonal vegetables：色澤粉嫩嘅炭燒和牛肉質鬆軟且肉汁豐盛，可自選8字形銀碟上嘅三款調味，當中個人覺個柚子醋最唔夾，綠色嘅柚子胡椒鹽又太搶，反而白色嘅生西洋山葵帶絲微辣勁，同油潤嘅和牛最和洽，夾埋脆卜卜嘅蒜片食簡直係冇得頂呀！伴碟嘅時蔬中有枝豆、粟米仔等，最有驚喜係竟然係最唔起眼但超甜嘅楊梅，日文名同桃一樣都係叫「もも」（momo）！食事 – 本日の握り寿司 冷やし素麵 テールジュレToday’s beef sushi, Chilled-noodle, Tail gelée：單尾係飯麵齊集嘅和牛壽司拼牛尾啫喱素麵，建議由生食到熟。船碟上嘅兩片配菜望落好似蘿蔔咁，食落先知爽潤微辣嘅山芋薄片原來係師傅以山葵混製出嘅日式泡菜，又幾得意喎。外表粉紅透白，看似為全生嘅和牛壽司其實係以低溫熟成過，和牛面嘅魚子醬有提鮮之效，微量嘅檸檬鹽足以成功化解和牛嘅油脂，和牛壽司食落柔軟不油膩，！第二件輕輕火炙過嘅和牛壽司以紅酒煮蘋果蓉點綴，洋化嘅水果和牛配搭清爽和諧，毫不溜滯。新舊交融嘅分子料理元素於接近尾聲時續一展露，真係冇諗到會遇到喺電視劇見過嘅「要用叉飲嘅湯」！冷麵上嘅啫喱居然係用上牛尾熬製，確真奇妙！凍食嘅素麵麵條白滑軟身，撈入舖面嘅北海道海膽、三文魚子、櫻花蝦乾碎及牛尾啫喱，麵品頓即添上濕潤及巧脆，海材同牛尾嘅鮮濃好似凍火山咁半爆半溶於口腔，何其精妙！煞尾嘅甜品登場前由貓頭鷹夫婦送上熱茶暖暖個胃。水菓子 – 最中アイス 特製プリンMonaka Ice Cream, Ushidoki special pudding：甜品二重奏右邊嘅雞蛋布甸香滑甜美。左邊嘅DIY最中餅雪糕終於要客人們親自動手，每食一口可有儀態地續少將雪白軟滑嘅豆腐味雪糕及紅豆蓉塗上櫻花形最中餅上，巧甜涼快嘅最中餅雪糕鬆化到索索聲，結果甜品連觸覺及聽覺都觸動埋！疫情下勇敢開店嘅「うしどき」環境開揚，服務貼身周到，午市廚師發辦懷石料理選用高質嘅鹿兒島小田牛作主題，「由脷到尾」淋漓盡致地演繹出傳統及潮派烹飪可如何融合，正如餐牌上所述，八道菜「犇向牛懷」之旅當真五感玩盡，精湛細膩得令人拍案叫絕！

父母結婚週年紀念日，結晶品之一嘅XO仔早就睇中咗「Pâtisserie Tony Wong」個招牌玫瑰蛋糕，訂蛋糕時發現原來港島區分店近日剛剛於銅鑼灣開幕。店子門面嘅透明玻璃設計雅麗鮮明，位於地鐵站旁尤其方便。新張期間，購物滿$200或以上即獲贈$20禮券，限定禮盒仲有七折優惠添。室內裝潢簡約大方，透明雪櫃陳列出精美可愛嘅糕點。架上則擺出禮盒系列。收銀部旁亦可揀選菂薂嘅蠟燭襯返靚靚嘅蛋糕，配套齊備。「Pink Rose 粉紅玫瑰蛋糕」必先預早三天前落單，共有一磅（$500）及兩磅（$1,000）兩個尺寸可選，免費包埋朱古力牌。可能因為哥哥取蛋糕時太趕，大家到切蛋糕時先發現祝賀結婚週年嘅字句「Happy Anniversary」被寫錯成「Happy Birthday」，幸好小插曲被家人當作笑話，帶來更多歡笑聲。蛋糕嘅玫瑰花造型粉美逼真，驚艷四方，配埋枝心形蠟燭，顏值絕對爆哂燈！意外地，以白朱古力製出嘅玫瑰花瓣軟薄香甜，一啲都唔硬，藏於花瓣下嘅芒果忌廉蛋糕微甜芬芳，果肉甜美豐沛，糕身鬆彈軟潤，吃畢亦不感絲毫溜滯。「Pâtisserie Tony Wong」銅鑼灣新店光鮮企理，服務生友善好客，招牌粉紅玫瑰蛋糕高雅嬌美可口味佳，雖然價格略為偏高，節日慶典選作為甜品卻有效製造氣氛並掀起高潮，本地品牌值得支持！

Quand il me prend dans ses bras
Qu’il me parle tout bas
Je vois la vie en rose

話說小肥因記性不敵大肥，疫情下在家中晚飯時竟然輸咗場賭局，注碼為評審都有份享用嘅品嚐晚餐配特選香檳，遇上晚市遲遲未開放，細佬結果索性將父親節嗰餐合併埋一齊，與家人一試酒店意大利餐廳「Giacomo Ristorante」。皇冠假日酒店位於銅鑼灣核心地段，傍晚嘅交通已不像從前咁擠塞繁忙，位置尤其方便。步進酒店及餐廳，印象最深刻就係高高嘅樓底及廣闊嘅空間締造出嘅無形氣派，接待處擺出大型嘅酒櫃都仲覺得有好多位剩。用餐大堂一眼睇哂，圍牆半梳化式嘅散座及中央嘅四人枱隔得都幾開，簡單嘅洋畫及圓柱足以散發出歐陸情懷。七人被安排入座私隱度最高嘅私人廂房，晚餐最低消費額為$15,000，唔洗擔心聲浪會影響其他食客，舒適得很！弧形嘅天花上吊有華麗嘅水晶燈照明，極富藝術感。最有安全感就係見到房內設置嘅空氣清新機。每位席上都擺放著齊備嘅自用餐具、口罩信封及餐牌。以海鮮為主材嘅五道菜品嚐菜單「Degustation Menu」基本價為$1,580/位，可另加$780/位配埋餐酒。顧客如有意自攜佳釀，紅酒、白酒、汽酒之開瓶費為$700/枝標準裝及$1,000/枝雙瓶裝，最多限帶三枝。為晚餐作序先有暖手嘅麵包籃，當中肥肥脹脹嘅酸麵包外脆內鬆軟。脆卜卜嘅芝士麵包條送酒最啱。Amuse Bouche：藏喺底嘅北海道帶子外脆內嫩，配上薄薄嘅茴香片及風乾咗四十八個月嘅伊比利亞「黑蹄」火腿成功為餐前小食帶來清新開胃嘅咸香。King Crab with wild fennel and Oscietra caviar：彩艷亮麗嘅頭盤面層有兩件鮮嫩厚潤嘅挪威皇帝蟹肉，盤底以香草及蕃茄油浸住嘅蟹餅混入咗爽脆嘅青瓜及芹菜根粒粒，口感極具層次，頂面以豐沛嘅魚子醬點綴則有效地提升菜式嘅鮮濃度，！Warm White Asparagus with Pata Negra ham, yogurt white asparagus emulsion：經油封過嘅節令白露筍源自北海道，粗粗壯壯，咬落質感相當爽脆，舖面白色嘅生白露筍片亦好清脆，反而紅色嘅火腿片似乎口味過重且偏硬同乾。Black Truffle Tagliolini (另加$350)：經理哥哥重點推介嘅黑松露意大利粉由佢自己親自於桌旁帶上白色手套新鮮刨出，以示其真材實料！如相所示，芳香撲鼻嘅黑松露份量十足，自家製嘅意粉麵條柔韌軟彈，美味可口。Beef Cheek Agnolotti with foie gras and Parmesan foam：方形嘅意大利雲吞仔勝在唔會太厚皮，只係中間嘅澳洲和牛面額肉唔係好突出，有對比下碟中嘅鵝肝方磚更顯得軟滑香濃，連同墊底嘅洋蔥溶一齊食則份外惹味。Red Prawn Spaghetti Chitarra with basil and Datterino tomatoes (另加 $320)：鎮店招牌菜嘅紅蝦成隻碟咁大隻，建議先將蝦頭拆開並撈入意粉一齊食效果方最佳。意大利粉柔潤鮮濃，或許因期望過高吧，紅蝦體積雖大，食落厚厚嘅蝦肉似乎微微偏實，未能做出鬆彈爽脆嘅口感，大蝦嘅缺點當真不易克服。Mayura Beef Tenderloin with braised mushroom and beef jus：主菜其中可選澳洲和牛牛柳。配備嘅牛扒刀鋒利之餘仲印有隻牛頭。Roasted Kinki Fish with clam jus and sweet peas：大家冇睇錯，小肥主菜揀咗食魚魚，因為當晚廚師極力推薦！輕輕煎過嘅喜之次橙色嘅魚皮脆薄香口，皮下嘅魚肉幼嫩白滑，黏上深綠色嘅雜菜蜆汁令魚味更鮮甜，吃畢亦覺輕盈健美。French Peach, fresh almond and verbena granita：甜品上枱後由專人續一淋上馬鞭草糖漿。已預先切成一片片嘅法國白桃清爽微甜，帶有檸檬香嘅馬鞭草冰沙輕巧清新，屬炎炎夏日嘅消暑佳品也。Cherry Baklava, vanilla, port, and cherry sorbet：同傳統嘅baklava蜜餅粗糙嘅賣相好唔同，車厘子甜品形如花朵般艷麗，其色調、外型、口感、味道均明顯地有層次得好細膩。舖底嘅法國車厘子果肉爽甜多汁，中間以手指餅及妃樂酥皮疊出嘅蜜餅酥脆鬆化，夾上奶油忌廉及車厘子雪葩不單毫不溜滯，且足以加添香滑及清涼。Homemade Petit Fours：結尾嘅迷你紅莓朱古力甜筒筒皮巧脆，忌廉餡心軟滑甜美。請留意，品嚐晚餐並未有包餐茶或咖啡，如揀飲咖啡的話，每杯$70。酒店意大利餐廳「Giacomo Ristorante」環境優雅大方，服務生體貼專業，集合節令及招牌菜式嘅品嚐晚餐用材高質，份量輕型不溜滯，唯一價格高企，置身於檢疫酒店內難免會令生意率下降，建議可考慮推出如免開瓶費或抗疫九折等優惠吸引大眾。