小肥舊年做咗「LUBUDS」會員，年尾就用哂啲分黎換現金券。因每次只可以用一張，而且要九十天內使用，週四晚即帶同家人一試集團旗下位於時代廣場食通天嘅日式料理「鮨穴」。餐店正門右方圍住紅帶，相信入夜後會排哂長龍，好在計劃周詳嘅XO仔早已於網上訂座，不過大家要留意用餐時間限定為九十分鐘。排隊等位時可參閱左旁嘅海報推介及多頁中、日、英對照嘅彩圖餐牌（資訊亦可於餐廳官方網頁下載）。室內前方位置嘅水吧可見多樽日本清酒及證書。用餐大堂樓底高高，十分開揚。最右方為壽司吧位。四口子被安排入座左方巨魚牆下嘅半梳化式圓枱，夠哂鬆動。經驗較淺嘅年輕服務生態度尚算良好，遇上問題都會搵上司幫忙，完全冇敷衍了事。家人都好滿意食物唔會一窩蜂咁出，傳菜姐姐都勤奮有禮，唯一最唔衛生就係個時令精選推介餐牌，舖哂塵之餘仲好油！特上壽司拼盤（$458）：拼盤共有十二件大路嘅壽司款式，包括軟潤嘅赤身同三文魚壽司、肥美嘅拖羅壽司、爽脆嘅牡丹蝦壽司、鮮嫩嘅火炙左口魚裙邊壽司等，四人分黎食可各取所好。靜岡產高糖度蕃茄佐黑松露鹽（$88）：大肥爸爸大讚蕃茄片爽甜多汁，點上鹽粉更有提鮮之效！蔥吞拿魚腩薄脆（$58/兩件）：小食底層塊米餅脆卜卜，無奈色澤粉白嘅吞拿魚腩蓉食落唔得鮮潤之餘，其霉霉嚡嚡嘅質感欠缺幼嫩，失色得很！日本產黑毛和牛刺身（$328/六片）：或許紅白紋理鮮明嘅和牛刺身切得唔夠薄同未解凍得夠，和牛冰硬得黎感覺就好似食緊片牛油咁，不吃也吧！燒安心雞配柚子蘿蔔漬（$138）：燒雞肉偏乾同嚡，最正只有脆巧嘅雞皮。照燒佐賀和牛（$468）：三成熟嘅和牛方磚紅潤鬆軟，連同金脆嘅蒜片更覺香濃惹味，比起之前嗰味和牛刺身可口得多，伴配嘅麻醬沙律亦清新爽脆，實屬整晚之最。天婦羅菜式均配三色鹽粉及天婦羅汁。野菜天扶良（$108/七本）：野菜天婦羅嘅炸漿脆薄鬆化，唯一有點失望嘅就係七件中冇一件係菇類。活蝦天扶良（$248/五本）：分開炸出嘅蝦頭橙美香脆，而且一啲渣都冇，不過金黃亮麗嘅蝦身咬落卻偏腍兼唔得爽脆。「鮨穴」舒適企理，服務優良，日式料理水準甚為參差，商場餐廳黎講價格唔算平，不過對可享優惠嘅會員黎講相信可以比多次機會嘅。

疫情嚴峻期間，正當不少食肆早已支撐不住時，港內仍有餐廳可保持一位難求嘅狀態，其中一間就係中環名店「Caprice」，肥肥家族都係因為有熟客迷人Uncle及美人姐姐邀請方才有幸一訪。酒店餐廳樓底高高，簡單嘅門面設計好自然地已流露出高貴嘅氣派。歐陸式嘅裝潢以閃閃發光嘅水晶燈飾照明，感覺富麗堂皇。最當眼位置擺出名牌法國甜酒巨型嘅酒樽及酒塞，好有氣勢。用餐大堂寬廣開揚，正中央嘅開放式廚房內可見多位帶住高帽同口罩嘅廚師忙碌地工作。走廊通道左邊嘅散座全配上紅色嘅厚墊絨櫈。右手邊低半級嘅一排則襯上較低調嘅黑色皮櫈，好等客人欣賞落地玻璃窗展出嘅維港靚景。餐桌上擺有靚靚嘅紅玫瑰。難得疫下仍可同枱午聚，主人家早已備好瓊漿玉液。中英對照嘅午市餐牌共有三頁之多。第一頁午市套餐「Menu de Dejeuner」可自選四道菜（$988/位起）或五道菜（$1,098/位起），分別在於前者只有魚或肉一個主菜，後者則有齊魚同肉；大家要留意部份菜式係要另外加錢嘅。第二頁嘅招牌餐單「Menu Signature」（$2,480/位）共有八道菜，顧名思義均為鎮店名菜，不過限定要全枱人一同點選。最後一頁列出魚子醬嘅選擇。點好菜，年輕嘅服務生先呈上即日新鮮焗製嘅五款麵包並作出簡介，唯一念口簧式嘅說明同星級餐廳嘅形象就唔係好夾囉。伴配麵包有兩款咸味及原味牛油。小肥自問冇本事食盡五款包包，結果應推介試咗兩款。下圖左方啱啱新推出嘅杜蘭麵包Semolina煙煙韌韌，都幾得意；右方嘅人氣芝麻包則清香軟熟，輕盈討好。餐前小食翠綠輕巧，圓圓嘅餐碟以青豆粒粒墊底，黃色一片片嘅原來係咖喱味嘅煎魷魚，配搭清幽爽潤。法國生蠔伴芹菜頭蓉配青蘋果啫喱：頭盤主角兩隻肥嘟嘟嘅生蠔軟嫩滑溜，伴配微微酸酸嘅青蘋果啫喱巧妙地突出蠔隻嘅鮮味，中間夾入嘅芹菜頭蓉意外地唔覺澀之餘仲毫無衝突。澳洲和牛他他拌法國生蠔配特級魚子醬（另加$550）：以金箔點綴嘅菜式層次分明，凹凸不平嘅碟盤令外觀尤其吸睛！海陸組合鮮濃香潤，量足嘅魚子醬倍添貴氣。湯湯環節只有媽咪一人揀選「青豆湯伴甜蒜火腿汁配田雞腿」。鴨肉清湯配鴨肝雲吞：整頓午餐最失望就係此碗清湯！或許因為碗中嘅鴨肝雲吞唔夠熱，即使清湯於桌上斟出，飲落仍覺湯品熱力欠奉，最大問題係意大利雲吞入面嘅鴨肝餡料及鴨肉清湯均過咸，失色得很！法國大餐必備嘅魚魚共有三款可選，大肥大讚「時令鮮魚配海鮮圓米伴藏紅花汁」好襯相中睇唔到嘅蕃茄飯，當中散發出嘅果香清新尤甚。法式魚肉慕絲伴海鮮配香檳汁：橢圓形嘅魚肉慕絲質感柔軟得黎入口卻好似食緊牛油咁溜，而且冇乜鮮味，唔講真係食唔出有魚嘅成份囉！香煎海螯蝦伴芒果配北海道海膽汁（另加$650）：最正必選白肉橙紋、厚肉鮮甜、爽脆無比嘅蘇格蘭海螯蝦，咬落啲肉喺個口入面仲彈吓彈吓咁堅架，黏上海膽汁即鮮上加鮮，就連伴碟嘅芒果肉都甜美軟潤過人，冇得頂呀！香烤黃油雞腿配法國白蘆筍伴梅子汁：肉類主菜四款中，XO仔只係試咗兩味，外表較平庸嘅黃油雞腿雖然大大球，但圓圓嘅雞肉竟然毫不乾嚡，一刀切落去已感受到雞腿肉嘅肉汁豐沛，食埋入口即覺其皮脆肉軟嫩，綑邊嘅白蘆筍粒粒清脆冇渣，真係雞不可以貌相。法國羊肉伴萵筍及鷹嘴豆泥配燒汁（另加 $450）：法國羊肉紅潤粉美，香嫩軟熟，唯一喺要加錢嘅情況下，個人會情願食香烤黃油雞腿而已。甜品大肥點咗大路嘅「杏仁梳乎厘配雲呢拿雪糕」（另加 $150）。法式搭丁蘋果批配焦糖雪糕：師傅喺脆卜卜嘅餅底同爽潤嘅蘋果片中間夾入幾層巧薄嘅酥皮，頂面唧上軟滑嘅忌廉再加球焦糖雪糕，並以薄如紙張嘅脆片圍邊，造出嘅千層蘋果批清涼微甜，口感極富層次，可口不溜滯。結尾要咗杯特濃咖啡。配送嘅三款精美甜點擺放於靚靚嘅化妝盒上，高雅得有頭有尾。六星級酒店之三星法國餐廳「Caprice」氣質非凡，服務水平雖有點參差，但當中嘅專業在於其變通能力，午市菜式用材高質，極具立體感嘅擺盤十分精美。平心而論，$1,098/位起嘅五道菜午餐看似價廉，但如果選擇加強版配搭好容易就變成三倍嘅價錢，計落條數$2,480/位嘅招牌套餐似乎抵玩得多，不過係咪好到要專登等幾個月去食呢就見仁見智啦！

近日確診人數激增，節日飯局唔係取消就縮減，上週為姨丈慶生嘅蛋糕都唔敢一早訂定，結果等到食飯當日先喺公司附近間「麵包秀」揀咗個現成嘅。源自台灣嘅西餅店寬廣企理，除咗麵包之外，透明玻璃雪櫃陳列出不少原個及件裝西餅款式。一人身兼多職嘅收銀姐姐友善且效率高，選定蛋糕迅即以餅盒及紙袋包裝好。薄荷之戀（$198）：粉綠色嘅薄荷朱古力蛋糕鮮麗奪目，配備嘅金色蠟燭亦好高雅，美中不足就係店子冇提供即場唧製朱古力生日牌嘅服務。層次分明嘅朱古力蛋糕鬆潤甜美，混入脆脆嘅朱古力碎成功增添口感，薄荷味忌廉清新芳香得很。連鎖餅店「麵包秀」光鮮企理，服務優良，誠意推介清新可口嘅薄荷朱古力蛋糕「薄荷之戀」！

契妹剛剛外遊返港，玩完「零加三」即相約晚聚解放一吓，兩口子就揀咗間可網上訂座儲分嘅樓上西餐廳「Bacchus」。餐店門面嘅金漆招牌及綠葉天花就好似一個花園咁。室內光線柔和，間隔開揚，白式牆身嘅凹凸花紋極富歐陸式風彩。兩排餐桌隔得夠開，配上嘅厚墊絨櫈舒適高雅。入座後即亮起羅曼蒂克嘅枱燈，好有氣氛。桌上擺有金色嘅自用餐具。飲品牌共有兩頁。晚市套餐及小食餐牌則以底面分中、英文版。點好菜，年輕嘅服務生隨即送上暖手窩心嘅麵包。兩款包品外脆內軟熟，最欣賞就係伴配嘅松露蜂蜜醬，芬芳潤甜。巴馬火腿沙拉卷：前菜翠綠嘅沙律清新爽脆，部份以薄薄嘅巴馬火腿包住，成功添上微咸嘅肉香，簡單可口。法式洋蔥湯：深啡色嘅洋蔥湯甜而不膩，內含嘅洋蔥軟腍甜美，湯面件芝碎多士索盡湯湯嘅精華後即變得惹味香潤，整體甚為輕盈。鵝肝義大利飯（$458）：主菜形似火山嘅立體碟盤十分精美！飯面大大件香煎鵝肝外脆內軟嫩，芳香濃郁。加伴香脆嘅露筍，感覺十分健康。蘋果金寶：以綠色聖誕葉點綴嘅蘋果金寶散發出節日氣息，上枱一刻已令人分外興奮！甜品外觀及口感同樣層次分明，舖面嘅蘋果薄片香甜爽口，底層嘅餅碎就脆卜卜，中間夾入清涼微甜嘅雪葩，效果清爽得很！套餐仲包咗杯「自家調香料紅酒熱飲」，話就話大部份酒精都揮發哂，不過小肥揸咗車車，結果都係唔敢飲。銅鑼灣樓上西餐廳「Bacchus」優雅有情調，服務優良，菜式價格合理且精美輕巧。

收到風舊年「家全七福」部份職員被拉攏往灣仔開設另一高級中菜廳「灣悅賞．中菜」，九月份終於有緣一試。極俱氣派嘅餐廳全店舖有厚厚嘅吸音地毯，接待處及走廊通道闊落通爽。圍繞內牆嘅酒櫃內都係名貴佳釀。不得不提嘅就係洗手間區域除咗全電動及以動態感應操控之外，男女廁均為獨立房間，衛生得很！左邊嘅用餐大堂午市主要做飲茶散客，夜晚好多時都會間成大小不同嘅獨立房間，亦歡迎貴客打通哂黎包廳，最低消費會因應佔用嘅面積而定。右手邊一列則全為「梗房」。八人派對就係被安排於其中一間內進行。光線充裕嘅私人廂房空間感足，有專人貼身招待，私隱度高，十分舒適。餐桌中央嘅琉璃擺設晶瑩剔透，特顯豪華高雅嘅氣質。開瓶費設於$300/樽標準裝紅、白、汽酒。桌上擺有齊備嘅自用及公用餐具。菜單早已訂好，餸菜均由服務生續一分配。前菜先以拼盤呈上。其中一款「桂花脆鱔」小肥唔敢食。滷水醉鮑魚：預先切好嘅鮑魚片潤甜得黎酒味唔會過火。雞子戈炸：熱辣辣嘅功夫點心外層巧薄帶脆，雞蛋餡心幼嫩軟綿，細膩之作！椒鹽田雞腿：田雞腿望落雖則唔油，但食落就過腍同偏咗少少韌，唔夠香脆，甚為失色。大紅片皮乳豬：限聚令下一圍只可以坐八人，一隻乳豬真係冇可能食得哂，真係要讚一讚餐廳夠靈活變通，喺咁特殊嘅情況下容許貴客叫半隻。每人一份調味醬料，仲夠哂衛生添！燒至紅紅嘅乳豬皮不單零脂肪，入口鬆脆無比，最緊要係化於舌上，超！分完乳豬皮後，姐姐即穿上手套，於側旁熟手地手撕二道。手撕出黎嘅乳豬肉幼嫩軟潤，實滋味無窮！鮮蓮冬瓜盅：冬瓜盅原盅上，配料嘅蟹肉、燒鴨肉、青瓜舖哂喺面，夠哂真材實料！大大件冬瓜半腍半爽，高湯底亦鮮味香濃，湯料中嘅蟹肉厚潤甜美，燒鴨肉嘅肉汁豐沛而且完全唔乾唔嚡。蟹肉桂花炒海虎翅：金黃亮麗嘅桂花翅好夠乾身，海虎翅粗長透光，混入芽菜炒製足以添上爽甜。雞粒荔芋角：傳統點心嘅蜂巢外層鬆脆酥化，毫不油膩，芳香軟潤嘅芋蓉包住嘅雞肉粒粒都好潤甜。薑葱龍蝦球炒腸粉：如相所示，以砂鍋上嘅龍蝦球炒腸粉熱到出哂煙！龍蝦球爽脆彈牙，伴配嘅腸粉更加係入哂味。灣悅炸子雞：紅卜卜嘅炸子雞皮層香脆，連一向最嚡嘅雞胸肉都軟嫩潤滑，好雞也！棗茸糕：層次分明嘅棗茸糕煙韌有彈性，微甜不溜滯，簡單可口。高級中餐廳「灣悅賞．中菜」環境優雅有氣派，防疫措施尤其到位，服務稱心周到，懷舊粵菜高質味佳，絕對做得到店名喻意著嘅於「灣」仔喜「悅」地欣「賞」傳統「中菜」。

哥哥最愛旅遊，疫情下滯留咗喺香港都有潮玩Staycation，不愁寂寞。今季新試嘅「香港萬麗海景酒店」仲誠邀佢預先品嚐「萬麗咖啡室」月中先推出嘅聖誕主題自助晚餐（成人八折優惠價連加一約$700/位），呵呵呵，細佬當然係好樂意去做跟班啦！位於酒店閣樓嘅餐室光猛開揚，四周擺出金銀紅綠嘅聖誕樹、聖誕花、雪人等裝飾，節日氣氛濃厚。試食一角就連餐桌都花下心思去佈置，態度相當認真。多國菜式琳瑯滿目，望落都好企理衛生。最受歡迎嘅冰鎮海鮮區有龍蝦、麵包蟹、鱈場蟹腳、螺、蝦、法國生蠔等。最中央位置有芝士、沙律及凍肉頭盤。沙律可自選配搭。亦有撈製好嘅款式，當中西柚香橙紅菜頭沙律尤其爽甜，泰式海鮮沙律都好清新。凍肉則以相中最右方醃過嘅三文魚薄片最為惹味突出。日本代表有壽司、即切刺身、串燒牛肉及章魚小丸子。個人鍾情肥美滑溜嘅火炙三文魚壽司。麵檔今期做緊台灣牛肉麵，嘻嘻，疫情下冇得去台灣玩可以食住黎頂癮。熱湯共有三個選擇，中式嘅蟲草花淮山燉排骨最清，西式嘅椰菜花湯就較易飽肚；最啱小肥口味係中西合璧嘅蟹柳南瓜羮，厚滑甜美得黎內含嘅素翅、雲耳絲、豆腐絲等成功為湯品增添口感嘅層次，灑啲芫荽喺面更有提鮮之效！熱食均有暖爐及熱燈保溫。西式原條原隻嘅有烤魚、燒雞、羊肶、牛扒。分批焗出嘅芝士焗龍蝦新鮮熱辣辣，當然最搶手啦，所以見到都會即攞，唔會嘥時間影相，以免停頓時惹起後面排緊隊嘅食客不滿嘛。亞洲菜有咖哩雞、蟠龍鱔、清酒煮蜆、燒味、羅漢齋、生炒糯米飯等。今期聖誕大餐嘅主角係燒火雞同蜜汁烤火腿！佳節美食每件都係由大師傅帶上手套親自切出。意外地，健美嘅火雞胸肉毫不乾嚡，哥哥大讚除咗因為火雞唔係太大隻之外，其實最考係師傅嘅廚功同耐性，二人食完再攞，明顯食過返尋味！火雞填餡特別在被煎過，食落更為香口且冇咁溜滯。伴配嘅抱子甘藍好易入口，軟綿綿嘅甜蕃薯都十分討好。據悉，聖誕自助餐將加推任食馬來西亞大蝦及燒紐西蘭羊架，平安夜同聖誕節兩日仲會每人有一隻蒸焗龍蝦，升呢菜式鮮味無窮！甜品有大路嘅名牌雪糕、正氣嘅生果、滋潤嘅紅棗糖水。仲有不同口味嘅原個蛋糕。自己反而鍾意細細杯嘅款式，感覺份量好似冇咁邪惡。節慶系列包括鬆軟芳香嘅意式麵包布甸、聖誕香料酒、濃滑嘅熱朱古力等。當中以色彩繽紛嘅栗子蛋糕及聖誕樹頭朱古力蛋糕嘅造型最可愛精美。XO仔人就大大隻，但愛好嘅卻係菂菂薂薂嘅雪人綠茶提拉米蘇，嘩，同杯暖胃甜濃嘅熱朱古力簡直係絕配呀！感激「香港萬麗海景酒店」邀請旅遊達人哥哥率先於「萬麗咖啡室」體驗聖誕大餐，細佬有幸參與其中實感榮幸萬分！酒店服務團隊上下一心，以禮相待，雖則為試食活動，主廚大廚都完全冇架子，服務生加水、收碟等功夫一樣做到足，自助晚餐豐盛高質，好睇又好食，為表謝意，哥哥仲規劃好下星期再訪酒店添！

眼見限聚令續步放寬，大食會為三位長輩慶生專登豪啲，揀咗去高級酒店食府「文華廳」晚膳，生日蛋糕順便喺同酒店間「文華餅店」訂埋，方便之餘仲可以慳返$270切餅費，嘻嘻，XO仔係咪好精明呢？！西餅店位於酒店閣樓層，前方為咖啡廳，中央有棵金色嘅鐵樹，設計獨特有風格，色調仲襯埋剛剛踏入嘅秋季，甚有詩意！收銀處嘅透明玻璃雪櫃內陳列出多款精美嘅件裝西餅。小肥早就同契妹商量好要訂文華聞名嘅招牌芝士蛋糕「1963 Mandarin Cheesecake」（$488），遇上年輕有禮嘅店員有效率，幾分鐘即搞掂。由於蛋糕安排直接送上酒店餐廳作為飯後甜品，所以唔係太清楚平時會點包裝。圓圓嘅蛋糕厚薄適中，除咗芝士味芳香豐沛，每一口均可嚐到質感細膩，厚潤濃滑嘅芝士蛋糕，唔怪得知蛋糕名要刻意加上「1963」啦，因上網查證過此乃酒店創辦之年份，經典蛋糕配方咪即係早過細佬出世？！始終傳統芝士蛋糕比較溜，直徑15cm嘅招牌蛋糕作為十二人飯後甜品份量剛剛好。中環名牌酒店嘅西餅舖「文華餅店」環境雅緻有格調，服務優良，招牌芝士蛋糕「1963 Mandarin Cheesecake」散發出高貴嘅氣質，實屬傳統芝士蛋糕之典範！

六月份收到city’super電郵，告知超市將開設第一間日本餐廳「味蔵 by city’super」，特選會員九月前去幫襯可享九折優惠，嘻嘻，小肥當然係立即組隊一試啦！餐店位於銅鑼灣糖街一幢新食廈內，新上加新。以木為主嘅裝潢時尚得黎和風味濃。樓底高高嘅用餐大堂十分寬廣，中間位置嘅卡位式設計尤其闊落。六人被安排入座私隱度更高且有景睇嘅私人廂房，舒適得很。據悉，八人房最低消費額設為HK$6,000，當晚因疫情限聚下暫時括免。餐桌上擺有自用嘅餐具及口罩套。如店名所示，廚房所選用嘅食材均由超市city’super供應，貨源主要係日本。中英對照嘅厚本餐牌首頁先道出「味蔵 」嘅來由及理念。內頁當然少不了為四個獨家品牌「山形牛」、「博多屋豆腐」、「RF1素材」、「茅乃舍百年高湯」作出簡介。十二頁散點項目大多都附有彩圖參考。最後一頁為飲品及甜品。因深覺$300起嘅開瓶費唔係咁值，諗住飲啤酒會抵玩啲，點知當晚未有生啤提供，結果就應推介點咗兩枝日本清酒配和食。博多屋豆腐沙律（$78）：以青瓜片、生菜、薯仔等混製嘅沙律豆腐味其實都幾香濃，只係自己唔係好鍾意攪爛咗嘅豆腐偏嚡嘅質感。博多屋豆腐山芋蓉鐵板燒（$98）：熱辣辣嘅鐵板燒物堅大碟，豆腐山芋蓉嘅組合都好軟滑，唯一個人略嫌味道過淡。名古屋雞翼（$78/兩隻）：如相所示，薄薄嘅雞翼比較瘦，色澤金黃嘅皮層尚算香脆惹味，無奈肉質卻偏硬同韌嚡，甚為失色。大分縣名物雞肉天婦羅（$98）：一客六件嘅雞肉天婦羅層炸皮唔算厚，但咬落內外都一樣偏硬同唔得鬆脆，淨睇最愛香口食物嘅大肥唔洗加料就知麻麻啦！喜知次一夜干（$228）：一夜干每日限量供應，席上嘅魚王魚后嫌喜知次燒得唔夠燶，未為最香口。鍋物均以桌上嘅電爐即場煮製。經理Isabella姐姐親自煮理前先提到店子所用嘅特製木盒每個成本要成四千多元，認真唔講得笑！山形縣產A5和牛Mikura特製蒸鍋（$798）：別號「黑毛和牛女皇」嘅山形和牛紅白紋理分明。薄薄嘅和牛於特製木盒以純天然無添加嘅茅乃舍木魚湯蒸煮，靚肉極之軟熟，而且毫不油膩。北海道產黑豚肉博多屋豆乳鍋（$488）：創作涮涮鍋嘅湯底應推介揀咗獨家品牌之一嘅博多屋豆乳。白雪雪嘅豆乳湯底幼滑得黎當真零油脂，輕盈健美之選！或許因有比較下，黑豚肉即使半肥瘦都顯得有點粗嚡，所以最後追加嘅全為牛肉。美國安格斯肉眼（追加價$280）：肥膏不多嘅安格斯牛肉薄就夠薄，不過肉質嘅軟滑度始終難以跟和牛相比。山形縣產A5和牛（追加價$580）：女皇級和牛嘅雲石紋理粉嫩吸睛，半溶於口腔實滋味無窮，似乎真係要叫返招牌山形和牛先可體驗到和牛同豆乳滑上加滑嘅效果！和田萬黑芝麻布丁（$42）：甜品黑芝麻布丁芳香微甜，柔滑輕巧。名牌超市新開之「味蔵 by city’super」寬廣企理，食物水準雖有點參差，但勝在服務生專業落力，誠意搭救。超市選以自己獨家代理嘅品牌烹調菜餚，可以免費做埋宣傳，真係夠哂諗頭。

同蕃薯Uncle歡樂暢飲到大肥放埋工，一行四人決定喺鄰近嘅「彭慶記」晚膳。跑馬地街坊小店嘅金漆招牌及門面十分光亮，不難認出。正門嘅圓柱木門設計及室內嘅吊飾都好有中國色彩。用餐大堂一目了然，左右擺出兩排二至六人餐桌，簡潔企理。牆上掛出嘅米之蓮牌匾及海報彷彿正要提醒食客中菜廳已連續十年獲選為星級食府。中文餐牌共有四頁之多。留意到開瓶費一率$150/樽，都非常合理。黑板則列出廚師推介精選。蒜茸粉絲蒸蘇格蘭空運鮮味蟶子皇（$65/隻）：即叫即蒸嘅蟶子皇爽脆鮮甜，滑溜嘅粉絲更索盡精華。脆皮炸美國肥美筒生蠔（$45/隻；四隻起）：炸至金黃嘅生蠔外脆內嫩，蠔隻本身夠肥美厚潤，雖然上枱時唔見有煙，不過大家真係要睇熱！糯米釀炸雞翼（$75/隻；兩隻起）：已去骨嘅雞翼脹卜卜，外層嘅雞皮香脆不油膩，皮下混入咗瑤柱嘅糯米飯煙韌鮮濃。士多啤梨生炒骨（$168）：生炒骨偏硬同嚡，當真冇諗到最期待嘅廚師推介反而最為失色。椒鹽鮮魷（$148）：大大件椒鹽鮮魷咬落鬆脆有嚼勁。肉絲炒河（$128）：河粉同肉絲一樣軟滑，當中嘅芽菜又夠爽甜，簡單可口。跑馬地中菜「彭慶記」面積雖小，但勝在店主及服務夠親民，毫無星級架子，鑊氣小菜即叫即煮，新鮮熱辣，四人晚餐嘭嘭聲咁一粒鐘內搞掂，效率極高，唔怪得知越夜越多客。