譽宴 (已結業) 查看

正所謂冬大過年, 做冬最緊要一家人齊齊整整食餐飯, 呢日我哋預早做冬，由公公請客。翅: 有肉絲，少少漿糊口感，略腥，好在有d醋中和下d腥味，不過真係唔係我杯茶囉。 燒鵝: 上枱時熱辣辣、鵝香撲鼻，食指大動，唔好講笑，即刻夾返件先。皮未算脆，不過都算燒得幾香，皮下脂肪多左少少，鵝肉有咬口，點埋酸梅醬一齊食，巧味道。蒸魚打孖上：叫多條特價，作為精打細算師奶仔，梗係叫左先。魚都算新鮮，無咩腥味，係蒸老咗dd，魚肉鞋鞋地，勉強咁叫合格。蟲草花梅菜蒸菜遠：呢味餸嘅配料有蟲草花丶肉碎丶梅菜，加埋個豉油汁，好咸，掩蓋菜心嘅清甜，over左。韓式豆腐：勁！呢個充滿阿豬媽風味嘅韓式豆腐，味道真係特別到唔知點形容，事關我放佢入囗之後有一下稔過佢d材料係唔係變壞左。炸豆腐釀蝦膠正正常常咪幾好，做咩要佢喬裝成章魚小丸子呢？何必呢⋯香煎蛋角：充滿蛋香味，煎到恰當好處，老少都岩食。清炒豆苗：夠鑊氣，豆苗碧綠，水油平衡口味滑溜，無渣。酥炸乳鴒：乳鴨較瘦，無咩肉，亦略欠香囗。八個人，食左千二，每人百幾，坐得舒服唔趕客，今時今日一家人食的話幾經濟實惠。