金潮小廚

營業中

休息中

如果係葵芳要食小菜，一定會去金潮，鑊氣夠，又多款，不過要早去攞位，如果係食飯時間先去攞位，一般要等差唔多一個鐘，要有耐性，先可以食佢。山楂拔絲咕嚕肉，咕嚕肉外皮好脆，入口啖啖肉，酸酸甜甜，好開胃。胡椒蜆湯，胡椒味好濃，好辣，蜆肉都好新鮮又無沙，不過唔知道個煲太大，定蜆真係太少，總覺得胡椒湯好多，蜆仔好少，但係個湯真係好好飲，不過講真叫依個餸，為咗個湯多過個蜆。欖菜肉鬆四季豆，食小菜一定叫，欖菜鹹鹹地，少少辣，配埋個肉碎同四季豆，係一個好惹味嘅小菜，好啱配白飯一齊食。青炒白菜，鑊氣夠，入口爽脆，清清地，雖然無乜特別，但又真係幾好味。金潮嘅小菜味道真係好好，雖然價錢有d貴，但係份量比足你，唔會細細碟，但要有心理準備服務真係麻麻地，同埋如果少人就有機會要搭檯，會好嘈同好迫，所以我平時都會避開食飯時間先去，唔會比人催你走。