和藏 (已結業)

一連兩晚食自助餐，之前一晚食左一間好好味既酒店自助餐，禁不住用封筆已久既帳戶寫返食評，估唔到第二晚食既呢間位於工廈餐廳仲正。呢間野其實想試好耐了，近1-2年都見到有團購，食評又唔錯，今次終於忍唔住買左來試，呢個似係半自助餐，有8個餸陸續送上。自助區域方面，放係出面既熟食只有3-4款，仲有丸類，菜，烏冬等打邊爐配料放係度俾人放落粥底火鍋，仲有冷盤：凍蝦，青口，螺，對我來講都唔太啱食，反而吸引我就有羅宋湯（推介），有好濃郁既蕃茄味，令到平時唔太鍾意飲呢款湯既我都飲左兩碗，可惜果晚無我最鍾意既中湯，湯隔離就係魚生櫃，由於頭盤已經食左，所以都無乜留意，魚生櫃隔離就係我最鍾意既即開生蠔（推介），呢個都係食呢間既重點，當晚款式係法國生蠔，每次只可拎2隻，有海水味但味道唔算太重，唔使加檸檬或醬都夠晒味，而且大隻過出面以$10/隻做招萊的餐廳。開蠔隔離有幾個韓式爐係度燒雞串，虎蝦，扇貝，生蠔俾大家任攞，d海鮮都好新鮮，睇得出老闆既不計成本。連加一$350左右有8道高水準料理，魚生，燒佐肩牛片，即開生蠔，燒海鮮，豆腐花，雪糕，韓國汽水任飲，而且樣樣都做得好出色，真係唔讚唔得，絕對有下次！