更多
2011-08-20
799 瀏覽
拖咗半年嘅食評，本來一食完就好想快啲寫好佢，不過當時忙於搞去旅行嘢，放埋咗一邊，就係咁擺吓擺吓無晒火去寫。最近，同依班死黨又有飯局打鞭爐，重提番依餐蛇宴，講開大家都好想今年再搞番轉，所以，先「的」起心肝要寫埋佢。其實，有班中學死黨，加部份波友，「枕住」都有出嚟食飯，一年都好幾次，不過次次都唔會齊人，所以舊年尾就諗住入秋搞大啲，包個房，整圍蛇宴，結果約嚟約去就要到今年二月下旬先搞成，但係無減大家出席嘅熱誠。而揀嚟多彩，因為依度有我哋唔少嘅回憶，仲係中學年代時，我哋大部份都係晌大坑東讀書，住晌深水埗一帶，晌偉智街打完波就去南昌食大排檔，大排檔拆咗之後，嗰時各人都出嚟做嘢，就開始升格去多彩，週六食完食一齊睇英超，幾開心呀！雖然依家人大咗，各散東西，各有各忙，波亦無踼喇，睇波食飯就仲有嘅，乘機呻吓工作嘢，呻吓屋企嘢咁囉。故此，今晚齊晒人成圍枱，真係近年難得架。綿繡燒味大拼盤燒味包括有油雞、叉燒、分蹄、燒鵝、海蜇，晌度幫襯咗十幾廿年，佢嘅燒味都OK架，雖然唔及得一啲出名中菜館嘅出品，但食落有感情。七彩炒鴕鳥柳大堆頭製作，以紅椒、青椒、西芹爆炒鴕鳥絲，鴕鳥肉係近年新興，網上資料指鴕鳥肉含較多鐵質同
其實，有班中學死黨，加部份波友，「枕住」都有出嚟食飯，一年都好幾次，不過次次都唔會齊人，所以舊年尾就諗住入秋搞大啲，包個房，整圍蛇宴，結果約嚟約去就要到今年二月下旬先搞成，但係無減大家出席嘅熱誠。而揀嚟多彩，因為依度有我哋唔少嘅回憶，仲係中學年代時，我哋大部份都係晌大坑東讀書，住晌深水埗一帶，晌偉智街打完波就去南昌食大排檔，大排檔拆咗之後，嗰時各人都出嚟做嘢，就開始升格去多彩，週六食完食一齊睇英超，幾開心呀！雖然依家人大咗，各散東西，各有各忙，波亦無踼喇，睇波食飯就仲有嘅，乘機呻吓工作嘢，呻吓屋企嘢咁囉。故此，今晚齊晒人成圍枱，真係近年難得架。
綿繡燒味大拼盤燒味包括有油雞、叉燒、分蹄、燒鵝、海蜇，晌度幫襯咗十幾廿年，佢嘅燒味都OK架，雖然唔及得一啲出名中菜館嘅出品，但食落有感情。
七彩炒鴕鳥柳大堆頭製作，以紅椒、青椒、西芹爆炒鴕鳥絲，鴕鳥肉係近年新興，網上資料指鴕鳥肉含較多鐵質同蛋白質，較少脂肪同膽固醇，確實都幾好食，質感、肉味都似牛肉，係啖少少，不過炒得夠鑊氣，又夠晒大碟。
太史鮑絲燴五蛇羮預咗兩大窩，咁先夠皮嘛！阿姐話蛇羮唔係佢哋酒樓嘅出品，係托附近蛇鋪交嚟，深水埗都有好多蛇鋪賣蛇羮，睇落就好足料。席上，阿姐原窩再翻熱，果然，非常足料，啖啖鮑絲、蛇肉，味道唔錯，湯底鮮甜，阿姐仲放低一大兜薄脆，驚死我哋唔夠分。我哋食完一窩，隔多陣至再食第二窩，一窩絕對夠分12-13碗。
流沙白花蛇丸蛇肉同蝦膠打成丸，裡面再加鹹蛋黃蓉，然後黐啲米粉酥炸，蛇丸本身做得爽彈，流沙效果又OK喎，鹹鹹香香咁！
菜膽蛇汁龍崗雞雖然係街坊酒樓，但餸菜賣相一樣做足，依個菜膽蛇汁龍崗雞，菜膽用上娃娃菜，砌好伴碟，不過個人覺得用上小棠菜夠綠就仲搶眼。龍崗雞斬好砌番成隻「雞樣」，加少少玻璃獻，成個菜就完成。雞肉入味而肉嫩，皮下脂肪又少，甚有水準。
豉汁蒸蟠龍鱔依個蟠龍鱔做得出色，原條大黃鱔輕輕鎅開一截截屈成蟠龍咁形，加配大量豆豉蒸，上枱後由阿姐切番散一件件。一來條鱔蒸得恰到好處，肉質柔嫩帶少少煙韌感；二來鱔肉滿有油香，係就係肥咗啲架啦，但咁先好食丫嘛；三來，豆豉蒸，絕對係中菜惹味嘅表表者。
蛇汁灼唐生菜唐生菜加咗蛇汁灼，食唔出有咩特別，不過，生菜灼得爽脆，但賣相樣衰咗啲，一堆亂菜咁款。
枝竹羊腩煲天寒地凍，整煲羊腩煲就最合時，一大窩枝竹羊腩煲滾住食，咁就最正，枝竹索晒羊腩汁，份外香，而羊腩炆得夠晒諗，唔韌，帶少少羶。本來原先個菜單跟個臘味糯米飯，但識食嘅老死話轉窩白飯仲好啦，因為白飯撈腩汁食，仲滋味過食臘味糯米飯，又唔使嘥晒成兜腩汁，佢又有佢個道理喎，所以就嚟咗窩絲苗白飯喇。除咗撈腩汁，亦可以撈蟠龍鱔啲豉汁，同樣咁正！
蛇汁炆伊麵同個蛇汁灼唐生菜一樣，雖然加咗蛇汁，食落同平時食嘅乾燒伊麵真係唔覺有咩分別，唯一可以講係個伊麵本身炒得幾好，唔太油膩。
多彩多數都係街坊生意，服務比較隨便啲，晌石硤尾都稱得上大酒樓一間，過時過節都例爆，嘢食都見得人，唔失禮，而且，價位唔貴，好似今晚圍菜，包茶芥加一，12罐汽水，送埋生果盤，全包價都係$1,980，食得成圍12個大男人都飽晒。
張貼
