韓城 (已結業)

韓城一間位於旺角樓上放題任飲任食韓燒店，店內裝修新，感覺舒服。 燒烤食材種類多，先講熟食，有熱辣辣炸薯條，饅頭，春卷，腸仔，炒麵等等，仲有幾款菜。湯類亦多，有冬陰公，羅宋湯，中湯。唔係講笑，熟食有任食大大件三文魚頭，魚腩，幾款小炒。未開始燒，老闆仲送上新鮮大蝦同扇貝，好野味。 肉類就多啦，各款部位牛豬羊，不同醃法都有，包羅萬有。 新鮮牛舌，肥牛，牛仔骨，一口牛肉粒，各款脂肪比例都有。豬肉有醃同不醃，亦有五花腩。串燒雞肉仲好惹味好正。冷櫃都好吸引，有任食三文魚刺身，各款壽司，仲有啫喱甜品，新鮮水果。總括而言，係一間性價比高的放題餐廳。