太平洋咖啡 (已結業)

朗豪坊真係長期好多人，有時想搵個位坐下，以前都會搏一搏走上四樓星巴克或者food court睇下有冇位坐，但而家唔會嚕，寧願慳番啲腳骨力囉，因為9成9冇位。某日約左朋友喺朗豪坊等，收到佢訊息話要遲30分鐘左右，由於我唔想喺度齋企傻等，我只好搵個地方坐。（對，我係唔會行街的，因為一行就驚大出血，畢竟對女士黎計，太多誘惑）我只好落去太平洋睇睇有冇位，比起四樓，呢度有位嘅成數都會大啲，始終位置都多啲，而且我一枝公，又唔怕搭枱，都唔難搵到位置。當日係平日，差唔多到晚飯時間，仲咁好彩可以獨自坐一張枱添。雖然都係打算歇一歇等朋友，都要循例買杯飲品。個人就麻麻地喜歡黃昏時間飲咖啡，所以只係剩番沙冰呀、抹茶、朱古力呢啲選擇。雖然我唔係抹茶控，不過醒起自己都冇飲過，都可以襯個機會試下啦。所以點左抹茶拿鐵，出乎意料之外味道都唔錯喎，唔知其他人覺得點，始終口味好個人化，我就覺得幾啱我飲。抹茶味都有，幾明顯，回甘咁誇張就冇，奶味唔算好重，不過鐘意佢唔算話太甜，面頭又有啲核桃咁，有少少口感。輕鬆坐一陣，又有wifi，果然最適合等人。