Munch (已結業) 查看

男朋友生日，佢想食西餐，上openrice揾到哩間餐廳，之後book台，book窗口位，順便book埋甜品，因為可以寫上男朋友個名，希望比驚喜佢。上到去環境唔錯，好有情調，適合情侶。今次點咗蜜瓜火腿，蟹餅，鴨肶意大利飯同大蝦牛扒，我仲點左香蕉雜果沙冰。蜜瓜火腿一般，蜜瓜唔算甜，火腿有d過鹹。蟹餅好味，啖啖蟹肉，外面脆入面多汁，加埋個汁一齊食更好味，個汁酸酸地，令蟹味更出。鴨肶意大利飯又係一個好味之選，鴨肶外皮好鬆脆，但唔油，鴨肶肉好嫩，一d都唔鞋，仲有味道啱好唔會太鹹，但個飯好濃芝士味，好易膩。另外，大蝦牛扒必食，大蝦煎到好香口，肉質彈牙，牛扒要咗半熟，外面煎到有少少脆口，入面仲保持到半熟，切開見到有牛肉汁流出，但唔會有血水，肉質好嫩無渣，好有肉味，好好味。杯沙冰都唔錯，食到果肉，味道天然。