武士拉麵 (已結業)

星期六，朝早趕住去跑步上training只食咗一嚿包，揼完骨行响街著住羽絨哂住太陽都因為太餓覺得好凍，諗住食碗熱辣辣拉麵，記起呢間店。雖然接近兩點但門口冇人排隊店內只得一兩個客，似乎繼 1/1食咗元氣壽司，已注定食神暫時唔記得我。叫咗織田將軍拉麵(鹽味豬骨湯底)。湯底濃稠略膠口帶豬骨味，加咗店長推介嘅特製魚油就即時提鮮。麵應屬中太麵(18號)，揀硬身亦合預期彈牙，黃身但冇鹼水味。叉燒表面以火槍灼至微焦，肥瘦相間，肥膏非我最愛入口即溶鬆軟但爽身，瘦位尚算腍身有肉味。配料只有木耳絲冇京䓤細䓤，勁唔開心。溏心蛋調味過鹹且湯底太滿浸過頂，幸好天氣冷未至於熟哂變硬，吃時仍是半熟軟軟的。綠茶是熱，但面前一叠三隻杯全部杯底有水，伴麵的匙羹都有水，又唔知係生水定熟水。廚房好多雜物，煮煮下嘢有百力滋盒跌落水，仲有個麥當勞紙袋唔知有冇嘢食响架上。店員普遍熱心又會問客戶啱唔啱食，但問到魚油落幾多其中一個又答唔知要搵另一個。拉麵軟硬係個人口味，但麵條粗幼配搭湯濃淡、配料落乜應有optimal之配，由客人完全自由選擇，似乎冇咗店家對自家出品嘅堅持執著性格。