新東記火鍋店 (已搬遷) 新店位置

今日係同一個做左好耐既同事farewell, 大家都想揀間食得舒服而食物又有少少質素既火鍋店，聽朋友請新東記可以book 房，我地一連十幾人浩浩蕩蕩上左去食。好彩book左位咋，全部房間已經爆滿。放低袋後唔理三七廿一就點野食，一睇張點菜紙，超多款式，淨係牛肉都有7款。點好火鍋料後，侍應忽然遞上一碟象拔蚌刺生及龍蝦刺身，原來我地老闆已經事先留左刺身比大家，仲宣布公司接左單大生意，食少少貴野慰勞大家咁話。象拔蚌刺生鮮甜彈牙爽口，夠哂凍，點埋wasabi豉油簡直一流！龍蝦刺生白雪雪，放係碎冰上面完全睇唔到，肉非常新鮮不過較嫩，個人喜歡象拔蚌多啲。想推介牛白肉，佢係碟上面時係好好似魚片咁，我地個個都比佢呃左，食落先知佢係牛肉黎，肉質好爽，咀嚼時有陣陣牛油香飄出黎，正到唔想呑。仲有想推介鮮蠔，隻隻都好似手掌咁大！放落去就算烚左5分鐘都唔會變左蠔仔！超級鮮甜！最衰咁大隻啦，如果唔係我一定會偷偷食多幾隻 其他火鍋料都不過不失啦，原來佢仲有個露台，可以係果度呼吸一下！