Savoye Bistro (SB) (已結業)

踏入猴年，緊係要同同事去食餐好喇。今日黎到天后既Savoye Bistro (SB)。一睇Menu已經俾佢個Burger Set吸引住，等我試下佢先！餐湯 + 沙律 + 法式蒜蓉包‧ 餐湯夠"杰"身，飲完已經飽左一半。‧ 沙律份量唔算太多，2、3啖已經食完。不過個沙律唔知有D咩菜，苦苦地，再加埋我本身唔好黑醋，對我黎講唔係好岩口味 ><‧ 法式蒜蓉包 + 原粒蒜蓉，由於我係唔食原粒蒜蓉，所以俾左同事食，雖然佢話係好好味，哈哈，不過我都係唔敢試。但係個法式蒜蓉包就好好味，夠脆，同埋佢搽左好多蒜蓉汁去焗，所以個包好香口。陽光牛肉漢堡配薯條牛肉漢堡入面包左好多料，芝士、牛肉漢堡、番茄、生菜、原塊菠蘿，再加埋個千島醬，真係不得了。我都幾鐘意個漢堡有咁多蔬菜，好似感覺無咁膩。不過美中不足既係，塊牛肉唔夠肉質，好"鞋"好散，又乾身。 如果唔係因為有蔬菜同埋原塊菠蘿去中和返，我諗我未必食得入口。餐後點左杯餐茶 - 凍橙茶，少少甜再帶少少苦澀，為呢一餐開年飯劃上完美句號。