皇庭匯 (已結業)

由於最近睇到有其他食評畀負評話食物出品同服務態度差劣，同埋我們最近都無去過食飯，所以我們一家四口今晚再去「皇庭匯」旺角店食晚飯！由於係即興嘅關係，所以我們無訂位同預訂食物！一去到門口就已經見到有超多人排隊等位，我們起碼等咗半個鐘或以上先有位，入到店內見到全場爆滿，所有店員都好落力去招呼每檯客人，但好明顯睇得出員工嘅人手唔夠，所以希望「皇庭匯」嘅老闆可以盡快請多啲人手，以免招呼不周！香茅脆燒BB鴿係每位嚟食飯嘅人客都可以免費贈送半隻，鴿皮燒得好香脆，肉質亦好鬆軟！京式片皮鴨「一食」嘅薄餅皮好煙煙韌韌，包著鬆脆多汁嘅鴨肉一齊食，真係好滋味！醬汁三杯骨平日食開都係三杯鷄，第一次食用排骨嚟做嘅三杯骨，感覺都幾有創意，排骨吸收晒秘製醬汁嘅味道，味道好惹味同唔會好油膩！馬拉盞芥蘭煲嘅芥蘭好青嫩無根，馬拉盞嘅鹹香味，令到味道更加惹味！濃湯豬骨鷄煲翅嘅湯底非常鮮味濃郁，翅同湯料嘅份量都相當足料！