更多
2014-03-09
1363 瀏覽
二月份因為要去親戚屋企拜年,所以星期六放工後要入大埔晚飯,時間尚早,不如早o的入去大埔行下,當日中午放工後第一站諗住黎大埔熟食中心欽記粉麵食招牌魚蛋粉大埔熟食中心雖然落成好多年,但係之前都未上過去,當日中午放工入到大埔已經要1:30pm,見到熟食中心有多達80檔 ,可能係全港最大規模,熟食中心通道會有其他檔口店員叫你食其他野架! 我係專程黎欽記粉麵,梗係唔會坐低啦,週圍睇下先搵到欽記粉麵,好彩黎到見到仲開檔其實呢個熟食中心有七至八檔賣魚蛋粉,大埔街坊話欽記及洪記最巴閉,欽記做左幾十年,佢地o既招牌只有粉麵兩字,冇寫"魚蛋",證明佢地唔會刻意標榜魚蛋係佢地招牌食品,相信識食o既人先會黎食黎到欽記見到週圍都坐滿人,唔太識得點分邊張枱屬於邊間,檔口旁邊有人排隊,第一次黎到有o的不知所措,點解要排隊呢?佢地又唔似買外賣,唔通搵到張枱坐低後要再出去排隊落單? 見到兩位阿姐好專心地輪流用一個鐵盤將粉麵送到食客枱上,於是問阿姐邊張枱係屬於佢地,聽人講落單後要等幾耐先有得食,咁就梗係快o的搵到位坐低落單,如果唔係魚蛋真係會賣晒架! 好彩我只係一個人黎,阿姐安排我坐遠處一張枱,真係估唔到原來o個張枱都
大埔熟食中心雖然落成好多年,但係之前都未上過去,當日中午放工入到大埔已經要1:30pm,見到熟食中心有多達80檔 ,可能係全港最大規模,熟食中心通道會有其他檔口店員叫你食其他野架! 我係專程黎欽記粉麵,梗係唔會坐低啦,週圍睇下先搵到欽記粉麵,好彩黎到見到仲開檔
其實呢個熟食中心有七至八檔賣魚蛋粉,大埔街坊話欽記及洪記最巴閉,欽記做左幾十年,佢地o既招牌只有粉麵兩字,冇寫"魚蛋",證明佢地唔會刻意標榜魚蛋係佢地招牌食品,相信識食o既人先會黎食
黎到欽記見到週圍都坐滿人,唔太識得點分邊張枱屬於邊間,檔口旁邊有人排隊,第一次黎到有o的不知所措,點解要排隊呢?佢地又唔似買外賣,唔通搵到張枱坐低後要再出去排隊落單? 見到兩位阿姐好專心地輪流用一個鐵盤將粉麵送到食客枱上,於是問阿姐邊張枱係屬於佢地,聽人講落單後要等幾耐先有得食,咁就梗係快o的搵到位坐低落單,如果唔係魚蛋真係會賣晒架! 好彩我只係一個人黎,阿姐安排我坐遠處一張枱,真係估唔到原來o個張枱都屬於欽記 之後有個女人問我飲乜野,原來佢係欽記粉麵隔離茶水檔店員,佢地專賣飲品,而欽記及其他檔口就專賣食物,基本上熟食中心o的枱已經分配好邊幾張枱屬於邊個檔口,大家會見到邊張枱多人坐,專賣咖啡奶茶飲品檔口,一定要俾其他食客用屬於佢地o既多張枱,相信冇乜人黎熟食中心純粹飲杯野,不過我呢位食客專心食粉麵唔叫飲品,可能會令茶水檔失望
我搵返欽記職員落單,問佢係唔係有得食鴛鴦,或者大家會覺得奇怪,係唔係飲呀? 鴛鴦有得食咩? 鴛鴦唔係咖啡奶茶,原來係指河粉同埋麵兩溝,呢種食法幾特別,可以同時食河粉又成麵,唔洗選擇食乜野餸呀! 之前聽過人講,黎呢度個個都係食同樣o既餸,每碗都有齊魚蛋,炸魚片及魚皮,一次過可以試齊三樣野 唔似得其他粉麵舖,欽記只係賣呢o的野,冇雲吞,水餃,牛腩或牛丸呢o的餸
欽記o既枱上係冇餐牌,睇到檔口牆壁貼左張紙,大家可以選擇淨粉麵米$17,粉麵米$26,加底$28,加餸$31,淨餸$32,加餸加底$35,所以話大家基本上冇乜選擇,最適合有選擇困難症o既食客幫襯
之前都知道落單後冇咁快有得食,不過唔緊要,可以利用電話上網消磨時間 欽記每隔一段時間就o係廚房整好幾碗,由阿姐用一個鐵盤將粉麵送到食客枱上,坐係我對面兩位食客問點解咁耐仲未有得食,欽記係慢功出細貨,即叫即整,好多都市人都唔能夠接受等待係生活o既一部份 等多大約10分鐘,我o個碗鴛鴦黎到,真係估唔到我會快過同枱幾位食客,佢地都早過我落單,全部都係叫河粉,真係整好一碗魚蛋粉都唔知佢地邊個要先,可能因為我點左鴛鴦,比較特別,所以排另一條隊,快o的有得食
每碗粉麵都落左唔少蔥花,見到湯底幾清,一於先飲為敬,飲落o的湯好清甜呢碗粉麵有五粒魚蛋,魚蛋有魚味,唔會腥,魚蛋真係超細粒,好似臭丸咁大,欽記係用新鮮門鱔及鮫魚做魚蛋,呢o的手打魚蛋每日限量供應
除左魚蛋有幾塊炸魚片,炸魚片好食,魚片係超薄,不過粉麵撈埋o既口感好得意
另外有大約四條魚皮,每碗粉麵都有架! 炸魚皮係用細條門鱔,魚皮淺啡色,同平時見到黑白色魚皮係兩回事,門鱔近鰭部份幾多骨,所以食前要浸一浸湯,若果就咁食就好似食薯片,魚皮炸到脆晒,一咬就可以食,但大家食落去小心o的,唔好大啖食,咬碎先好食粉麵質素一般,大家要記住佢地賣點係魚蛋
最特別係有碟辣椒油,相當好食,唔似得其他粉麵檔,每張枱都放一樽任人落,佢地係每碗粉麵跟一碟辣椒油,同枱有食客唔落辣椒油,所以叫店員拎返走,我就落左o的辣椒油,唔會辣到好犀利,唔洗飲水解辣雖然咁多人都覺得欽記魚蛋好食,不過佢地係冇得外賣生魚蛋俾人拎返屋企打邊爐,因為每日製作魚蛋數量都唔夠賣,除非你真係長期熟客,佢地先肯賣$30十五粒魚蛋俾你,雖然好細粒,但真係好好食!
欽記粉麵作風比較低調,主要做熟客街坊生意,唔洗乜野宣傳,檔口冇餐牌又冇寫有乜野餸有得食店員會抹乾淨枱面,不過黎得熟食中心食野,大家唔可以對環境有乜要求,偏偏香港好多美食只會o係熟食中心先至有得食!
當日問過店員,佢地通常下午三點就關門,不過星期六,日比較多客人,大約兩點就會賣晒魚蛋,所以大家有心黎食一定要趁早,如果唔係白行一趟!
成間舖只係單靠賣魚蛋就可以吸引咁多人去食,盡可以賣晒提早收工,真係巴之閉! 若果以香港$26食到一碗魚蛋粉黎計,欽記粉麵係好好食,日後有機會再去大埔,都可能會再返去食
題外話/補充資料：
欽記係家族經營,收銀係大家姐,令人窩心係佢地會同街坊傾計,大埔老街坊話以前試過連續兩三日冇開,街坊以為佢地結業,但有一日檔口大家姐坐o係茶水檔唉聲嘆氣,街坊以為佢地家人不和,原來係冇新鮮魚黎,做唔到魚蛋向街坊交代,大家姐就向邊位想食魚蛋客人講聲唔好意思,呢一份精神大家要學,真係令人欽佩,有o的舖頭冇新鮮魚就揾雪魚代替,又或者冇門鱔就用其他魚造魚蛋
(以上食評乃用戶個人意見 , 並不代表OpenRice之觀點。)
張貼
