八妹雞煲 (已搬遷) 新店位置

雞煲同打邊爐一樣有鋪癒，耐唔耐就要食一次。朋友一半食辣一半唔食，所以叫一個醉雞同一個中辣雞煲。醉雞滿佈紅棗同杞子，雞件亦有好多，一上枱酒香四溢。中辣雞煲都幾有入味，不過唔算太辣唔夠過癮呢。食完一輪雞就急不及待點打邊爐食材，八妹有唔少食材選擇，連貴少少嘅牛肉類都有。肉類方面，豬肉望落平平無奇，但淥熟之後都好得，半肥瘦吸收埋辣雞煲嘅湯汁，正。牛肉就有牛柳粒、美國肥牛同本地手切。牛柳粒勁鬆化，吸埋啲湯不得了。美國肥牛我就麻麻，因為佢切得比較大舊，反而本地手切細細舊，入口即溶。跟住就係我嘅邊爐必點，豆卜烏冬薯仔片，仲有冬瓜冇影到。食一個咁入味嘅湯底，如果冇呢類吸味嘅食材就唔夠物盡其用啦～幾欣賞烏冬係日本扁身烏冬，薯仔片仲過鑊炸過，口感幾得意！丸類都係我至愛，大過粒乒乓波嘅叫台灣棒球貢丸，大粒得嚟仍然好juicy，不過食一粒兩粒都好飽嚕。墨丸都非常彈牙。