大同老餅家 (已搬遷) 新店位置

喺健之堡實惠睇啱咗張油壓椅，打算買俾亞仔，老公問我仲有無其他嘢想買先返屋企，突然想食老婆餅，便叫老公陪我行去北角道嘅大同買，途中當然少不免被老公潤兩句，話你啲女人，為咗食想食嘅嘢，行幾遠都唔怕攰，唔怕腳軟，真無晒你乎。算啦，鬼叫自己為食咩，一於置若罔聞，照去買。因為老公唔鍾意食呢啲零食，所以只係買俾我同亞仔食，買咗 原味老婆餅 ($3.5@) 及 豆沙老婆餅 ($4@) 各兩個。拿上手仲感覺到有少少熱，回到家即刻切開嚟食，兩款老婆餅嘅外皮都甘香鬆化，不過個豆沙餡味道略為甜咗少少，反而個原味老婆餅裏面嘅糖冬瓜餡，清甜唔膩，非常美味，我覺得大同嘅老婆餅比恆香更好食，唯一可惜係銷售點太少了。