更多
2012-04-12
37 瀏覽
記得今年三月初o既一個朝早我睇緊頭條日報時, 無意中睇到一篇關於介紹呢間餐廳o既報導. 最給引我o既, 係除o左佢地主打傳統o既酒店英式西餐之外, 佢地o既印道菜 / 咖哩食品係由曾效力尖沙咀「爵樂」多年o既大廚主理. 要知道「爵樂」係香港數一數二最好o既印度菜館, 而呢度 - 即使係位處加州花園 - 能夠搵到爵樂o既前任大廚坐鎮主管印道菜一定有睇頭, 令我好想去試. 咁o岩我公司有同事係o個度o既街坊, 佢話呢間餐廳o的o野好好食, 好多街坊同街外客幫襯, 仲話逢聖誕、復活呢o的大時大節, 會搞半自助晚餐益o下顧客. 於是我預早一個星期前訂位, 係4月8號晚走o左去o個度試o下個Easter Semi-Buffet Dinner.鑒於上載相片o既數量所限, 以下所見到o既全部都係食物相片. 有一點我必需要提及o既, 就係呢度好大, 包哂成個場坐80 - 100 人應該冇難度. 今晚主打Semi-Dinner Buffet (HK$208), 係每客包一個主菜同一杯餐飲, 而頭盤、沙律、餐湯同甜品就自助任食. Buffet檯o係餐廳o既中央, 右邊檯放o左各式頭盤同沙律 (見下圖):而
鑒於上載相片o既數量所限, 以下所見到o既全部都係食物相片. 有一點我必需要提及o既, 就係呢度好大, 包哂成個場坐80 - 100 人應該冇難度.
今晚主打Semi-Dinner Buffet (HK$208), 係每客包一個主菜同一杯餐飲, 而頭盤、沙律、餐湯同甜品就自助任食. Buffet檯o係餐廳o既中央, 右邊檯放o左各式頭盤同沙律 (見下圖):
而左邊檯就放o左多款甜品同水果 (見下圖):
就只係呢o的配角已經咁大陣容, 我對呢個 Buffet 更加期待. 呢度水吧有各式酒類供應, 先o黎一杯 Long Island Iced Tea (HK$68; 見下圖):
酒味唔錯, Rum 同 Tequila o既味道突出又不失作為 ”凍檸茶” o既特質, 水吧師父o既功夫值得一讚. 嘆完酒, 跟住就向Appetizer進發. 第一輪, 試勻多款開胃小食, 包括 (見下圖):
- 煙三文魚: 又軟又滑, 煙薰味夠, 配埋希臘青瓜蒜蓉醬(Tzatziki)真係一流! - 蝦Cocktail: 細細隻, 鮮甜爽口.
- 蟹肉釀青瓜: 初頭望落去以為係吞拿魚, 原來係拆o左o既蟹肉, 好鮮甜, 仲有蟹子係面, 做得的式又好味.
- 燒矮瓜/青瓜條: 烤得o岩o岩好, 軟韌適中, 唔錯.
- 蜜汁燒雞中翼: 蜜汁味唔搶, 做到應有點到即止o既味道. 讚!
- 煙肉薯仔沙律: 新鮮做起, bacon 煙韌好味.
我專登留起我o既至愛係呢張相描述 (見下圖), 佢地係:
- 巴馬火腿伴蜜瓜: 肉同油分佈均勻, 薄薄一片; 蜜瓜好鮮好甜, 配搭天衣無縫. 我食o左好多件, 乜都抵番晒. - 煙鴨胸伴黑醋汁: 未曾試過o的煙鴨胸整得咁軟咁滑o既, 加埋含蓄o既煙薰味同鹹味, 完全唔需要黑醋汁點綴, 正! 我又係食佢食到唔停手.
至於個黑醋汁, 我用o左落個田園沙律度 (見下圖):
沙律o既菜新鮮, 又有露筍, 配酸甜味適中o既黑醋汁, 係美妙o既配搭. 此外, 頭盤仲有 antipasti, 係沙樂美腸同埋coldcut, 沙樂美腸尤其好味! 因相片所限未能刊出, 請見諒.
餐湯係什菜湯 (見下圖):
用左青瓜、紅蘿蔔、椰菜同蕃茄. 足料, 味道清新, 唔係一般茶餐廳式o既 “紅湯”, 有心思之作. 食到咁上下, 我點o既主菜出場. 主菜分西式 (燒西冷, 燒春雞, 煎三文魚柳) 同印式 (香草羊肉, 馬沙拉雞, 鑊仔蝦) 6 揀 1. 因為我係慕「爵樂」前大廚之名而來, 所以我揀o左最簡單又最考大廚功力o既菜式 - 香草羊肉 - 試試呢度o既手勢如何.
香草羊肉 (Roganjosh) 跟 印度黃飯 (Pullao Rice) (見上圖): 好o既香草羊肉, 要訣係 ”細火慢煮” - 慢火o既烹調令羊肉嫩滑, 醬汁香濃. 呢個美好經驗係我以前o係「爵樂」所食o既Roganjosh得到. 眼前呢個香草羊肉, 功力實在同「爵樂」o既不煌多樣 (見下圖):
佢汁香、肉味濃、羊肉唔騷, 經長時間o既文火烹煮, 嫩滑到一撕即開, 每一件咬落無渣, 差唔多啖啖都係享受. 呢個香草羊肉做到「爵樂」o既高水準, 我全力推薦! 相比之下, 跟羊肉o既印度黃飯略嫌遜色, 水份較多, 令煮出o黎o既飯唔夠傳統印度米飯咁結實, 似係食緊中國白飯. 如過黃飯能做得稍為乾身o的, 同香草羊肉會係絕佳o既配搭.
享受完主菜, 最後輪到甜品時間 (見上圖). Buffet檯上o既甜品數埋都有六、七款咁多. 以下逐一介紹, :木糠布甸 - 香草味濃, 軟滑非常. 正! 好多人食完再添, 好快無晒!
士多啤梨/朱古力mousse – 兩款都好的式, 好滑好好味.
Panna Cotta (見上圖): 傳統西式口味. 濃郁cream 味同質感, 鋪面o既薄薄一層朱古力漿好rich, 好味到我食o左兩樽.
Cheesecake (見上圖): 唔係硬掘掘o個種, 而係軟滑, 入口即溶, 芝士味足, o岩晒我口胃. 最後因為太飽, 我無嗌到餐飲, 有Long Island Iced Tea, 呢餐我已經好滿足.
總結: 埋單連另叫o既 Long Island Iced Tea, 都不過係 HK$276 加一. 三百零蚊度就可以食到一流酒店級水準o既美食, 實在係物超所值. 即使我唔係呢度o既街坊, 只要佢地o既食品繼續發揮到咁高o既水準, 我都會繼續返黎幫襯, 仲會叫埋我o的親戚朋友一齊黎開餐添!
題外話/補充資料：
1. 問過呢度職員, o黎食之前最好先打電話訂位, 即使係呢度加州花園o既街坊, 都同樣要訂位.
2. 職員又補充, buffet 係 special event, 唔係成日有. 平時o黎食set meal, 印式主菜大約係HK$80, 而西餐据扒就大約係HK$100-150左右, 聽落都幾抵.
3. 除o左食物好之外, 呢度最值得我讚o既就係地方寬闊, 環境清靜, 即使係buffet, 坐、食同氣氛都相當自在, 無壓迫感, 冇話週圍都嘈喧巴閉. 當晚食得咁開心, 呢度o既環境應記一功, 讚!
4. 佢地都有自己o既網站, 裡面就反而冇upload呢個 semi-buffet dinner 或其他呢類特別 event o既資料 (呢個buffet都係全靠我o個位街坊同事話我知咋!). 我希望佢地o既 website 可以有多o的呢類o既 update, 又或者透過 Facebook 呢類方便o既社交平台, 使多o的食家知道同幫襯, 咁就更益大家啦.
(以上食評乃用戶個人意見 , 並不代表OpenRice之觀點。)
張貼
