更多
2016-04-25
6258 瀏覽
之前參加左朋友囡囡嘅一歲生日派對,小朋友生日party通常都係麥記攪,係鏞記攪我就真係第一次見。第一次黎鏞記貴賓廳,印象唔錯喎!地方高雅寬敞,仲放到backdrop同氣球做影相區!生日宴菜單上第一道菜前,先黎一碟溏心皮蛋同自家製酸薑,作為開胃菜一流!第一道菜係炭燒家鄉雛鵝乸,表面睇係隻炭燒燒鵝,但其實係有香菇釀左入燒鵝裡面,充滿炭香同香菇味,皮香肉嫩,侍應話呢個菜式係需要預訂先有得食!主人家果然豪爽,呢個鍋仔花膠燒排翅,一人一鍋,感覺好矜貴。排翅份量足,一夾起個個都「嘩嘩」聲,花膠仲又厚又嫩滑,而且湯底濃郁,真係無得輸呀!蝦子冬筍明蝦球,蝦球大大粒而且爽口彈牙,至於冬筍我就唔食嘅,不過旁邊親友都大讚冬筍味道清新,最後成碟清哂,我估應該都唔錯。原條清蒸大紅東星斑,咁大條魚蒸到啱啱好,魚鮮肉滑,師傅掌握火候嘅功夫真係好掂!荔芋鮮明帶子盒,外層酥脆,芋泥中間包住大大粒帶子,香口得黎唔會太滯,係好考功夫嘅傳統手工菜之一。食完煎炸嘢,黎個清清地嘅銀杏三耳(黃耳、榆耳及木耳)扒豆苗,簡單菜色,味道清新,而且炒得夠火喉。八寶紅鱘,最初以為紅鱘係魚配糯米飯,原來係膏蟹,呢隻紅鱘單係蟹蓋已經大過我隻手掌
呢個煎堆皮薄餡靚,外面炸得香脆,裡面包住熱辣辣嘅奶皇餡,咬落煙韌,甜度適中,正!
最後黎一碗合桃露湯圓,應該係用生磨合桃,所以合桃味好濃,食落好滑又唔係好甜,啱晒我口味。
好耐冇食過咁豐富同好味高水準酒席,大滿足!下次屋企人有party 都一定會諗起黎鏞記!
張貼