東莞佬粥店

營業中

休息中

好耐冇黎過上水街市，今日想食粥，於是就終於有機會黎試下呢間東莞佬粥店。一睇餐牌，忍唔住：哇！咁抵既！$22有粥有粉麵油炸鬼配仲有豆漿/菊花茶飲？！咁我就想試下啲未食過既粥，要左碗豬什粥，本身諗住食炒米，但可惜冇，佢就同我轉左炒河，咁就飲豆漿。我幾中意佢加左啲油炸鬼碎係碗粥面頭，幾好香幾好食。碗豬什粥食落就有豬腸、豬肚、豬皮，都係覺得豬皮難逃有陣漂水味既命運，同埋我自己嫌碗粥淡味左少少。之後試下碟炒河，本身仲諗緊點解佢會咁好肯俾碟跟餐冇得叫既炒河我食，點知…好難食，啲河粉碎哂，夾都夾唔起，仲要又係好淡口，完全唔掂，最後淨係食左碗粥，飲左杯豆漿就走人。係就係抵，不過俾碟咁既炒河我，有啲失望，下次有機會可能我會翻黎食翻碟炒米既。