泰國人海南雞 (已結業)

出街食一餐飯，我認為味道好壞都係其次，最基本要做到乾淨衛生，至少食完唔會肚痛肚痾貼錢買難受。今次食完呢間泰國人海南雞真係大開眼戒，食飯食到一半成日曱甴死屍浮上面，即時反胃兼想嘔，打電話去分店投訴，呀姐話要打比上頭問下，一等就等足幾十分鐘。管理層處理自家餐廳衛生情況簡直令感到心寒。首先，從頭到尾冇一句道歉，只在乎我地幾時拎返碗湯返去退返錢就想不了了之成件事。其次，從來冇問過我地拎任何相片，對產品出現問題彷彿毫不驚訝。又只著緊我地食左幾多，要多於一半先可以退回整餐飯既價錢，但試問食飯食到一半先見到有曱甴，又何來可以將一半以上既飯菜拎返分店退錢呢？我地都好反胃，好想將一半以上既飯菜嘔返出黎退錢呀！高層無疑係不近人情，不將食客感受、健康情況放係首位，更毫無同理之心，完全冇誠意去為食客解決問題。好難想像我地當日飲到有曱甴既冬陰功湯有幾多位食客同樣中招，又或者直頭係飲左落肚而不知情！該店既衛生情況同對待客人投訴既處理手法真係令人心寒。我自己食完後第二日仲有反胃同肚痾，亦需要停工一日！所有情況均有圖片作實，亦已報食環。各位食客自求多福！

晚飯我地經常會叫佢地既外賣黎食，一般會揀四人餐，今次進食到一半發現湯內有曱甴，即時打電話要求退款，最後一位自稱公司營運部馬先生的人回電。我地要求好簡單，全單退款，自問合理，請問大家飲飲下湯有隻小強，全隻有觸鬚有頭有身，大家仲會食得落飯嗎？！可惜營運部馬先生態度極差，語帶調笑，捉人字虱，兜黎兜去，一直稱只能退冬蔭公湯的錢，因為小強只出現係湯內喎，更不斷要求我們把所有產品在夜晚十點大半夜把產品全數拿回分店，才能退款，毫不合理。舖頭一向野食水準可以保持，奈何衛生問題真的需要改善，已經不止一次食到頭髮、發泡膠、膠紙，今次仲有小強，加埋完全不願意處理問題，永久blacklist吧。

叫左冬陰功湯海鮮金邊粉，黎左米線，說好的金邊粉呢，同職員講，佢串77話呢d就係金邊粉，仲串咀話米線係圓嫁，好明顯你地上既咪係圓既米線咯。。。最後叫佢攞去俾廚房睇先肯換返金邊粉俾我地，無見過人錯態度仲要禁差，野食又難食，想中伏可以一試

叫2個濕炒河 點知好乾 一d 係真係一d味 都冇 呆左 58蚊竟然可以難食到咁 完全冇味 d雞 牛好乾 又係冇味 真係好嬲 真係以後唔會再去食 勸大家唔好叫呢個河 真係真係會後悔！！！！！

新蒲崗夜晚九點無乜餐廳仲開，唔想食翠華嘅情況下揀咗泰國人海南雞。叫咗個set dinner 喇沙扎肉魚旦湯金邊粉 - 不過不失，金邊粉唔算太入味，魚旦比較可取，好彈牙，扎肉普通，湯底味道適中。個餐加$18可以飲泰啤，呢樣我幾鐘意

買外賣自取海南雞飯+蝦餅+菜，返到屋企先發現佢漏咗個菜，打電話同佢講佢搵人送返俾我。之前都食過泰國人海南雞嘅其他分店，我都覺得幾好食，但呢間就真係與別不同，眾所週知海南雞飯通常都有三隻醬，紅色/豉油/薑蓉，但外賣佢淨係俾盒，陣味仲要怪怪地，雞尚算可以，除雞翼外其他都去骨。蝦餅口感還可以，但個醬有d似蜜糖，唔係泰式辣醬，感覺差d。泰國鋪頭竟然無晒馬拉盞，轉咗咸肉炒菜苗，炒出嚟碟菜仲要梅梅地。成張單兩舊水，完全below average!

叫左海南雞飯。雞肉大概有7-8件, 雞肉夠滑, 有白肉位, 亦有紅肉位雞油飯幾香。有雞油的咸香味。 未至於好油, 幾好食。個醬酸酸甜甜幾醒胃, 同d 雞幾夾, 但我覺得唔加醬都好食。佢地d 檸茶好怪, 唔係檸檬味,係梅子味...不過呢度上菜幾慢....

Happy Friday 搵位好難, 唯有去啲唔使等位嘅地方，因為唔想諗食乜嘢，所以叫咗個二人套餐，第一次幫襯，其實冇咩期望，因為只有幾枱客就知道。冬陰公湯，味道可以，有蝦、番茄及勁多秀珍菇。春卷及蝦餅，春卷皮唔夠脆囗、蝦餅好味，夠蝦味及彈牙。泰式鳳爪，數量不多，味道可以。咖喱牛腩，未食前夾起牛腩覺得硬，食落都OK，我本身好鍾意食椰汁，呢個落咗好多椰汁，撈飯吃一流。忘記影個油飯，油飯唔係好油，有點味道，鍾意食濃味應該唔啱。主角去骨海南雞，雞好滑，唔食雞皮嘅我、都忍唔住食咗一件，入味好香。加＄10要了一杯青檸梳打少甜、加$28叫了一個椰青。冇期望下都不錯。姐姐服務很熱誠，係本身環境比較污糟啲、地下好多食物殘渣。

突然好想食個冬陰功湯粉 之前去過灣仔分店覺得麻麻地 所以新蒲崗分店經過好多次都無食過 今日太想食唯有博一博叫左個冬陰功湯金邊粉 賣相非常好 味道都ok但實在有啲咸 最美中不足係啲蝦 我預左唔靚但無諗過咁霉仲有天口熱叫多個柚子沙律消消暑 依個都偏咸 但勝在柚子都解渴

去完新蒲崗PARTY ROOM玩, 8點鐘散場有D餓...就係附近搵野食~~因為呢排都好想食海南雞!!以前元朗有間叫鄉川小廚好好食...可惜執左2個人叫左半隻雞+碟椰菜苗!雞有JELLY 雞都幾滑無骨, 但係無乜雞味醬如果可以辣多少少就更好啦,依家係偏酸少少~最近食D椰菜苗個樣都唔係一粒波果種既, 不過都夠爽口, 好食!加多個油飯 埋單就$158~因為有D唔開心無咩胃口食!結果2個人雞又食剩菜又食剩.....

好耐無食喇~ 😆 黎懷念下先得~ 🤓✨ 😂 初時見 menu 個鳳爪有 2隻辣辣 🌶🌶 驚驚地, 上枱出奇地零味道... 係我好彩嗎!? 😂 不過, 佢唔止唔辣, 而係完全無味 得啲水味... 係忘記了落調味汁嗎? 海南雞 味道 同嫩滑都係 keep 到嘅, 只係雞比以前細同瘦得多了... 好卦住以前大啖大啖嫩滑香雞肉喔!!!炸蝦餅合理味道, 係薄咗啲 口感爭啲咁...咖哩呢, 汁就中規中矩 而個牛腩 係韌到點扯點咬都係咬唔開嘅... 我選擇棄權...個椰子水係成餐最好味嘅, 椰香味十足 甜度剛好!個芒果糯米飯... 我真係一食啲芒果就呆掉... 一入口 要即吐番出黎... 真 係 激 酸 呀 大 佬!!! 😂😂😂 食吾到呀 梳蓮...

通常比較少食泰菜，見到個裝修門面咁新淨靚仔，就食下。好耐冇食過冬蔭公，格外懷念個味道，於是就叫左個冬蔭公雞金邊粉。但我估唔到，會係咁......首先，冬蔭公湯落太多椰汁了，幾乎冇冬蔭公湯個種獨有嘅酸辣味道，好難飲。金邊粉掛湯唔係好得，我個人都唔太鍾意食，唔評價。個雞完全係雪雞，冇味，好似飲水個種冇味，而且乾到一食就變哂粉狀。碗內仲有秀珍菇，唔爽脆之餘，仲有啲醙味，碗野非常難食，食左一半就完全食唔落。唉，真係搞唔掂，可能佢其他野好食啲，但我已經冇信心再試。

今日lunch time 過左黎食，海南雞飯要68蚊都唔平，叫左個泰式雜綿金邊湯粉，$50蚊，黎到得三粒丸，一片扎肉食水都幾深下！ 粒魚蛋一咬就散開，無味，另外兩粒普通牛丸貢丸，湯底無乜特別，係個金邊粉幾有咬口，唔會太淋。不過呢個價錢真係超級唔抵，我去隔離食碗面都係30蚊，仲有杯熱檸茶，個茶濃到成杯野個味好怪，飲兩啖都唔想飲

依間野之前係車仔年代，顧名思義係食車仔麵，但係區內有其他更平更抵食既車仔麵。而家就岩岩新開左間泰國人海南雞飯，就過去試下好唔好食。午市既餐差唔多由60蚊到80蚊不等，在這區既價錢算係幾貴。由於新開張，唔少人都過來一試，人潮頗多。入座後，我們是兩個人，分別叫了海南雞飯，同埋一個豬頸肉飯。很快便有野食，首先到既係海南雞飯。依個飯麻麻地，雞肉全部是雞胸肉，一塊脾肉都沒有，而且雞皮做得唔爽，醬料只有一種泰式醬而非常見嘅三色醬。如果說近80蚊嘅招牌飯是這種質素，我不如行三分鐘去街尾嘅聚寶食個40零蚊嘅海南雞飯，好食好多。豬頸肉飯算是較正常的，但份量比較少，而且豬頸肉的蒜味特重，只能算是正常可以入口，但不算好食。埋單兩個人一百二十幾蚊，每個人60蚊，我會揀去食31蚊三餸連野飲既車仔麵。

其實泰國人海南雞, 之前已經食過天后同荃灣果2間!感覺都係唔錯~ 係附近打完波, 由彩虹道行去新蒲崗行經又見到大大間"泰國人海南雞, "朋友問到有咩好食, 就一於推介比佢地!4個人分別叫左海南雞飯、青咖喱雞飯、冬蔭功海鮮湯粉、喇沙魚蛋湯金邊粉同一份青木瓜絲沙律!冬蔭功海鮮湯粉就係我點既, 酸辣味適中, 仲有好多海鮮配料比你咁既價錢黎講, 相當唔錯!!食物水準都仲保持得好好, 唔會話第2間分店就第2種口味!!! good 朋友都說唔錯~~今次見到呢間仲多左d泰式小菜同海鮮, 仲有咖喱炒蟹同明爐魚食!!下次如果夜晚再黎開呢頭, 一定試埋佢d小菜同海鮮!!!!