2
0
0
電話號碼
2814 5482
營業時間
星期一至五:12:00-14:30,18:00-22:00; 星期六:11:00-15:00,18:00-22:00; 星期日及公眾假期:10:00-15:00,18:00-22:00
付款方式
現金
座位數目
220
其他資料
酒精飲品
食評 (2)
殿堂食家 2015-06-27
674 瀏覽
富貴好友約我一聚,帶我來到深灣遊艇會,有幸可以踏足一個非常尊貴只供會員享用的地方。中菜廳叫海天閣,陳設得典雅和有氣派,比三、四星酒店的中菜廳還要華麗,透過落地玻璃看著香港仔避風塘景色,悠然自得,相信在這裏吃碗白粥也是愉快的。好友與我都很關注體重,飲食都不敢放肆,但好友不會讓我吃白粥,點了這裏馳名的蜜汁叉燒,兩碗生麵,炒碟芥蘭,加個點心,以午餐來說,寫包單天天這樣吃也願意。最先送來的是叉燒,看賣相非常吸引,堆砌得像小山丘,肥瘦豐腴兼備,邊位還有些燒焦,入口鬆化而帶蜜甜的肉汁,誠是極品,而墊底的是黃豆,味道似是兒時吃過的零食,蠔油豆,很腍,很入味,甚喜歡,還勾起兒時回憶。生麵有些少雲腿絲放面,令一碗淨麵加添點色彩和身價,然而,麵本身卻不濟事,(主要是貨源問題),鹼水味重兼麵不夠爽,可能少煮兩分鐘會較好。薑汁清炒芥蘭,以這裡的格調,當然是挑選了最好的部份才用,青綠如翡翠,菜莖爽嫩,多吃也不怕牙軟。所點的點心是鮮蝦腐皮卷,炸得細緻精巧,顏色均勻,沒半點過火,外皮脆得可人,內裏餡料好味動人,相信其他的點心也應該不錯。最後以杏仁茶作甜品,雖然我是杏仁怪,但這個杏仁茶未能令我傾心。 繼續閱讀
(以上食評乃用戶個人意見 , 並不代表OpenRice之觀點。)
殿堂食家 2011-03-14
328 瀏覽
在下並非深灣遊艇會會員,有幸被邀請到來慶祝萬聖節心情覺得好興奮。會所周圍既裝修都好華麗,好有氣派。今次兩圍既私人派對係喺會所入面既其中一間貴賓廳內。房內有個客廳比大家一邊飲酒一邊唱卡拉OK,D歌都好新吓架。到處一塵不染,家私餐具都亮潔如新,衛生指數爆哂燈。服務大致上ok啦,所有食物幫我地分好哂,唔洗我地夾黎夾去。不過顧得食物就顧唔倒飲品;唔知係咪我個樣唔夠重要呢,我入左房成十分鐘都冇人問我飲乜野,搞到我要好樣衰地自己去攞;另外因為uncle同auntie們飲得實在太爽快,哥哥們加酒速度配合唔倒,好多時都要主人家自己斟添。海天閣既食物質素算高,好味之餘重好睇得,都可以稱得上係色香味俱全。 鴻運乳豬全體(Barbecued Whole Suckling Pig):乳豬皮薄但唔夠脆,而且有少少韌;肉層厚得黎帶少少硬;味道偏咸;肥膏唔係好厚,所以都冇刻意用刀切出黎;整體黎講可以做得更好。 蒜油焗珍寶大蝦皇(Baked King Prawns with Garlic):雖然隻蝦好大隻,不過肉身一D都唔嚡,最難得既係蒜香冇搶走蝦肉既鮮甜味,認真一流。好多人食完依味咁溜既菜式已經進入左半飽狀態,當然小弟重有大把貨。 冬瓜盅(Double-Boiled Assorted Meat and Seafood Soup in Whole Winter Melon):冬瓜燉得好夠腍,個湯都好足料,不過因為太多鴨肉,所以咸左少少。 蠔皇原條遼參扣鵝掌(Braised Whole Sea Cucumber and Goose Webs and Garden Vegetables):長長既遼參非常爽滑,配汁既味道好夠濃;大大隻既鵝掌又滑又腍又軟熟,無得彈! 清蒸東星斑(Steamed Whole Spotted Garoupa):雖然條魚喺出面分,但係埋到黎都好夠熱,讚賞一。據媽咪既烹調心得所知,蒸東星唔同蒸立魚,原來好講技巧,因為如果時間掌握得唔好,條魚會好容易老,肉質就會變得嚡。當晚既東星魚肉嫩滑,咁應該代表師傅D功夫好洗得啦,讚賞二。蒸魚豉油教得好好味,有少少甜甜地,好食到爸爸要叫碗飯黎餸汁,讚賞三。 玫瑰花鹽焗雞(Baked Chicken with Rock Salt and Rose):雞做得夠乾身,唔油膩,皮算脆,肉質唔嚡不過有少少韌;只係一D都冇玫瑰花或鹽味,所以唔係好明個名點黎。 高湯煎粉果(Pan Fried Shrimp Dumplings Served in Superior Soup):小弟最近認識左位高人,經佢指點先知乜野叫"高湯"。原來一煲上湯好講究既:第一批煲好既上湯叫做"頭湯",係用黎做翅既;用頭湯既料再煲一批用作烹調其他餸菜既湯就叫左"高湯";再加水煲出黎既第三批湯先叫左"二湯"。而家終於知道點解叫"高湯煎粉果"lu。粉果餡個味道教得咸甜適中,只係個皮有少少硬,不過浸過湯就好容易解決左。粉果係我最喜愛的單尾,因為太耐冇食,所以當晚一氣食左八隻。主人家見我咁欣賞依味餸重比哂其餘既我攞返屋企食添;嘻嘻,今次係攞正牌"又食又拎"。 雜菌炆伊麵(Braised E-fu Noodles with Assorted Mushrooms):伊麵既份量非常好,因為大家都已經食到好飽,一人一細碗,望落去起碼唔會覺得滯先。伊麵炆得唔油,味道唔會咸;成餐飯食左好多肉,所以伊麵用雜菌炆好恰當。 八寶蓮子茶(Doubled Boiled Red Dates with Dried Longan):一款和暖既糖水,好甜,唔知係咪加冰糖時重手左,定係八寶本身就係咁甜?!其中一寶係龍眼肉,媽媽話會幫助睡眠,唔知係咪飲得太多,所以我訓得好好,每朝都唔願起身返工。 美點映雙輝(Chinese Petits Fours):美點一之千層糕唔夠熱,夾心既鹹蛋黃好多粒粒,有D人會話有口感,不過自己就覺得整體唔夠滑。美點二係涷食既椰汁粟米糕,好清又唔會太甜,做得好過千層糕。當晚比人請,所以價錢不詳,請大家見諒;不過也正因如此,心理上覺得好低,多謝哂主人家。 繼續閱讀
(以上食評乃用戶個人意見 , 並不代表OpenRice之觀點。)