【情人節系列】蛋糕代表我的心

生日要切蛋糕慶祝、父親節母親節又要切蛋糕慶祝、情人節都要切蛋糕慶祝（好似係）。如果自己識嘅，梗係最好自己落手落腳整返個送畀BB豬啦，但係呢個世界總有幾個地獄廚神，明明跟足晒材料同食譜整都係會失敗嘅，就不如考慮買返個靚靚嘅情人節蛋糕啦，BB豬收到一樣會咁冧豬嘅。

粉紅色蛋糕可遇不可求 東海堂

可能係咁啱呢段時間就係士多啤梨當造，又可能咁啱啲士多啤梨成粒心心咁，Anyway咩原因都好，總之士多啤梨就好似做咗情人節嘅symbol咁，任何食物加粒士多啤梨落去就好似加咗個心心落去咁。而東海堂就為一眾情人預備咗由日本直送嘅白色士多啤梨嚟做蛋糕。白色士多啤梨白裡透紅，又甜又多汁，又有少少酸微微咁幾重口感，呢個「日本白草苺慕絲蛋白蛋糕」再配埋滑捋捋嘅牛奶mousse同輕飄飄嘅蛋白蛋糕，淨係個樣都贏咗。而另外嗰款「日本草苺忌廉蛋糕」就係用日本赤苺嚟整嘅，中間嗰層仲夾住咗啲士多啤梨啫喱㗎。

性格蛋糕好pure好naughty 美心西餅

你個BB豬是咪成日問你鍾意佢啲乜？唔使煩喇，送返個代表佢性格嘅蛋糕畀佢，咪唔再問你囉（暫時係）。如果你個BB豬係好true好pure嘅，一於就買呢個#pure啦。成個蛋糕都係粉紅色，本身已經好fancy，仲要上面鋪滿晒啲粉紅色朱古力同粉紅色忌廉，仲仲仲要有一粒粒銀珠糖，會唔會太sweet池？嗱，又如果你個BB豬係行狂野不羈路線嘅，就可以揀呢個#naughty嘞。綠茶慕斯蛋糕上面淋上啲似漏非漏嘅朱古力流漿，唔知是咪代表甜到漏呢？不過就真係睇見都好想食囉。

心心蛋糕即變心心眼 DALLOYAU

另一個BB豬常見問題就係「你愛我有幾深、幾分、幾真？」，呢個情人節，唔使直接答佢哋，用蛋糕答佢哋啦。呢個紅色心心Petal de Rose蛋糕，啲mousse係用時令紅桑莓同士多啤梨嚟整嘅，個餅底就係椰子奶油，有外表又有內涵，仲唔係101分嘅答案？

手工蛋糕精巧貼心 2/3 Dolci

CUPID士多啤梨雲石芝士蛋糕同ROSA心型玫瑰雪芳蛋糕兩款都係細細件嘅手工蛋糕，食飽飽再食都唔怕食唔落。唔講唔知，原來前者一切開，就會有士多啤梨流心㗎喇，而後者呢，食落就有啖啖玫瑰嘅花香，係幸福嘅味道。不過，你唔係諗住食咗個蛋糕就當送咗玫瑰呀嘛？

文：Kar

隨時接收最新資訊
讚好OpenRice專頁！