 | 環迴深圳 04年開始撰寫網上食評， 在不同飲食界網站發表近二千篇文章，亦曾為飲食雜誌介紹本地食肆及撰寫深圳飲食小冊子，足跡遍及深港澳。fb專頁：foodiephilip |
在深圳出入多時，好的差的餐館都試過，各地菜色都有機會接觸，但其中有一款是個人絕不建議。
香港人實在太喜歡Buffet，不論去到任何地方都趨之若鶩，從不考慮眼闊肚窄的問題，白白做成浪費。
或者大家會覺得往海鮮區鑽就可以回本，老實說一句，在深圳是行不通的。
深圳的自助餐，日式放題抽起不算，大概可分為本地薑及酒店Cafe。
先說說本地薑，以四海一家及金錢豹最為人所熟悉，兩者位處深圳南北兩端，但都是以大推頭取勝，店內不單座位多，食物種類更是閒閒地上百樣，收費大概是$260左右人仔，算來超過$300，只不過閣下若想找到回本位，恐怕大失所望。
以最常見的海鮮區來講，選用的花蟹只不過拳頭大小，食足一斤都不用多少錢，燒蠔在東門10蚊已經有幾隻，稍為好少少，白灼鮑魚，閣下食得幾多隻？其他海鮮更是蝦毛級別，望見都覺可憐。
算了，如果硬要找點可取的地方，鐵板燒及飲品區尚可值得一提；鐵板燒以羊架、豬扒及手掌大小的鯧魚為主，全都是即叫即煎，夠新鮮，至於飲品區由果汁到紅酒都有，閣下喜歡，大可整枝拿回檯慢慢喝。
甜品一向是深圳弱項，好彩少少，會遇上哈根大師，多吃兩球來滿足一下心靈。
也許你會說有團購或信用卡優惠，但香港人幾多個會有帶定用吖！
本地薑已經差，外國品牌又如何?
個人曾先後光顧過瑞吉、星河麗思卡爾頓、喜來登、君悅、馬哥孛羅好日子及香格里拉酒店，部份價錢比起香港是過之而無不及，由$350人仔到$500人仔都有，相信是食材的不足，就算有龍蝦往往只提供半隻，就算是大閘蟹都只限每位一隻，跟香港任食的情形是天淵之別，所以經常聽到有海鮮偷運返內地真是不足為奇。
同樣是刺身，還是在酒店吃得安心點，至少是即叫即切。
由酒店的餅房提供甜品，個人認為是最優勝的地方，品種及質素都會有保證。
如果把服務及景觀都算入內，酒店級別還可以接受，但不必專登在深圳走一轉吧!
※上述內容純屬作者個人意見，不代表本網立場。※