夏天係唔少鮮果當造嘅季節,包括唔少甜品Fans最愛嘅芒果。平時要食芒果甜品都唔平,有得去主題甜品自助餐任食當然爽,而且其中一間仲要加埋一都係$100有找!
1+1 吧 香芒x燕窩夏日熱情甜品自助餐
沙田呢間酒店餐廳以清甜芒果搭配養顏燕窩嚟做下午茶自助餐主題,最吸引嘅一定係香芒燕窩千層酥,用法國牛油製作嘅酥皮特別香口酥脆,三層酥皮同兩層芒果忌廉夾心已經夠吸引,再加上芒果肉同燕窩更加無得輸。
另外港女大愛嘅芒果椰子馬卡龍,平時食一個都要幾十蚊,食多兩個回本都快啲。玫瑰荔枝凍餅、香芒燕窩忌廉蛋卷同香芒燕窩芝士餅都可以一試。最後記得留肚食佢地嘅自製窩夫配雪糕。
供應日期:即日起至2016年9月30日
供應時間:2:30pm - 5:00pm
價錢︰星期一至五每位$88,星期六、日及公眾假期每位$118,另收加一服務費
馬哥孛羅咖啡廳 香芒下午茶自助餐
如果覺得沙田太遠嘅話,亦可以考慮呢間尖沙咀嘅酒店餐廳,一樣係芒果主題嘅下午茶自助餐,特別選用菲律賓芒果。最有東南亞度假Feel嘅係椰汁芒果西米布甸,將椰汁同芒果呢個絕佳配搭加埋有粒粒口感嘅西米,雙重滋味。而焦糖芒果杯就細細杯得嚟層次分明。
芒果甜品都包括有芒果拿破崙、芒果芝士餅、士多啤梨芒果乳酪凍批、芒果蛋白瑞士卷同芒果楊枝甘露,睇到張相隔住個Mon都好似聞到陣芒果香味呀。
供應日期:2016年9月1日起至10月31日,逢星期六、日及公眾假期
供應時間:3:15pm - 5:15pm
價錢︰成人每位$258,長者每位$208,小童每位$188,另收加一服務費
隨時接收最新資訊
讚好OpenRice專頁!