鴻星 佛跳牆糭
如果你以為佛跳牆只能夠一盅盅咁食，少年你真係太年輕。講過你知，佛跳牆仲可以融入咗落隻糭度，一隻隻咁食！用料一樣係原隻鮑魚、海蔘、花膠、瑤柱同金華火腿等等，夠晒鮮味！
想食清清地，或者食開齋嘅朋友，一樣有糭食。「五彩素糭皇」同「糙米蕃薯糭」都冇嗰嚿肥豬肉㗎，而且全隻糭嘅用料都係素食材料，例如前者嘅五彩，就係糯米、栗子、紅腰豆、綠豆同粟米，而後者就當然係加咗蕃藉啦，唔油膩之餘仲好清甜同健康添。
訂購電話：2628 0080
帝京 黑松露芝士龍蝦糭
帝京酒店嘅蛋糕同甜品一向都好吸引，嚟到端午節，佢哋嘅糭都唔輸蝕㗎，其中有兩款新口味，可能係你諗都冇諗過嘅配搭。先講「黑松露芝士龍蝦糭」，用嘅係巴馬臣芝士再加瑞士車打芝士，一聽就知芝味十足，配埋鮮甜嘅龍蝦尾肉同埋清香嘅黑松露，就好似碟西菜咁，感覺好新鮮！
鍾意韓風嘅就可以試下呢隻韓國泡菜和牛糭，呢隻糭混合咗糯米同紅糙米，健康得嚟又唔會太寡，事關啲酸酸辣辣嘅泡菜充份滲入晒成隻糭同埋厚切和牛度，係有風味嘅。
訂購日期：即日起至6月6日
美心 台灣古早味肉糉
想懷舊少少嘅，有呢隻台灣古早味肉糉，用咗古早製法嚟整，加埋秘製嘅台灣醬，成隻糉嗒落就係好台灣，好係以前嘅味道。
至於怕肥，又或者怕啲糉太大隻、食完會好滯嘅朋友都唔驚，有款精緻裹蒸粽，一人份量得嚟同樣足料，原粒瑤柱無誤，仲加埋燒鴨肉添，細細隻當午餐都幾滿足。
訂購電話：2101 1333
鏞記 燒鵝糭
講起鏞記，大家都一定會諗起燒味。今年佢哋就將燒味融入糭裡面，首創咗兩隻「燒鵝糭」！兩隻糭分別係「至尊燒鵝裹蒸糉」同「上品鮑魚燒鵝糉」，呢啲是咪叫「糭嘅價錢，燒鵝嘅味道」呀？端午唔使斬料加餸啦，買呢兩款糭咪得囉~
訂購日期：即日起至6月6日（需4天前預訂）
東海堂 紫薯紫米糉
潮流興食紫薯，蛋糕又紫薯，latte又紫薯，而家連糉都有紫薯味，啱晒你哋啲紫薯控啦。呢隻紫薯糉由內到外到返內都係紫色系，出面嗰層就係糯米加紫米，煙煙韌韌咁，包住中間都幾幼滑嘅紫薯蓉，甜甜der變晒心心眼啦。
另外呢隻糉，就將平時嘅肥豬肉變奏咗做鹿兒島黑豚肉，肥膏少咗，肉味濃咗，想食返傳統少少但又想有啲啲轉變嘅話，可以諗諗佢。
訂購電話：2101 1333
奇華 藜麥肉鬆糉
都話紫薯大熱㗎啦，奇華都有紫薯糉。呢隻紫薯糉就係混埋桂花入糉嘅，兩種材料都係香香甜甜，食落仲有驚喜㗎（你哋冇喇，因為我劇透咗，哈哈），入面有桂圓肉添呀！
另外一款新口味嘅糉，亦係非常之咁迎合潮流，就係藜麥肉鬆糉嘞。紅藜麥纖維多，口感相對煙韌，撈埋浸過米酒嘅肉鬆，另外仲有粟子、紅蔥頭等等材料，夠晒健康呀。有咁多材料嚟提味，就算藜麥本身比較淡口，都唔怕寡呀。
訂購電話：2628 0080
九龍香格里拉大酒店 宇治抹茶紅豆糉
有紫薯點會冇綠茶吖？九龍香格里拉大酒店今年都出咗幾款新口味嘅糉，其中一款就係宇治抹茶紅豆喇。用嘅仲係宇治百年老店嘅綠茶粉，抹茶控又要出動喇，夾埋抹茶最好嘅朋友，紅豆蓉，呢隻糉應該都冇得輸。
抹茶控你哋仲有另一個選擇，唔想要糯米，可以揀水晶糉皮都得㗎。用水晶粉做替代嘅糉一樣有抹茶味（十勝紅豆抹茶）揀，fyr，其他水晶糉仲有鹿兒島紫甘薯同柚子芒果味，食落應該冇傳統嘅糯米咁滯，口感軟韌，個賣相仲好靚添。
訂購電話：2733 8483
文：Kar
隨時接收最新資訊
讚好OpenRice專頁！