散水餅派乜好？ 5個西餅以外的選擇

今時今日，散水要派散水餅好似已經成為咗常識，唔派嘅話，唔多唔少都會聽到啲同事閒言閒語或者周圍唱。雖然話真‧散水啫，但呢個世界好細，好難保，有日你哋會再聚頭，都好難保，原來佢識你新公司啲同事……當然，派散水餅其實都一種禮貌，叫做多謝返呢班合作過、教過你、（或者跣過你）嘅上司、同事。唔好再問「邊個發明要派散水餅」呢啲問完都冇答案嘅問題喇，諗下散水餅派啲咩仲實際啦。

個個都派西餅呀、蛋糕呀、馬卡龍咁，係正路呀，不過平嘅又會畀人話cheap，貴嘅又買唔起（其實係唔想買），而且冇啲新意，食得多都悶㗎。特別撞啱啲離職潮，喂，真係隔日食cake都咪話唔滯。其實，邊個話散水餅一定要派西餅㗎？派呢啲都得嘅：

泡芙

Photos by fangfiona & bageladdiction
介乎鬆餅同蛋糕之間嘅泡芙，有鬆餅鬆脆嘅酥皮，亦有蛋糕軟滑嘅忌廉吉士醬，凍食熱食都得。細細件唔會太膩亦唔會太飽，喺散水餅最佳派發時間，即係下午茶時間食，啱啱好。而且每個泡芙都有獨立包裝，可以逐個逐個老細、同事一人一個，既方便又衛生。原味、朱古力味、抹茶味等等任君選擇。

同事開心度：****
自己方便度：****
經濟實惠度：***

蛋撻

Photos by dexarrius & 戀食旅人
作為地道嘅香港小食，蛋撻當然有佢一定嘅價值，以及一班忠實嘅fans。散水餅唔買蛋糕，可以考慮買蛋撻。滑嘟嘟嘅蛋加鬆化嘅撻皮，又有蛋香又有牛油味，而且方便易食，一定唔會食到好邐迆。不過最好就夾啱新鮮出爐嘅時間，熱辣辣嗰陣即買即派！鍾意嘅仲可以買埋另一款懷舊小食：鬆軟得嚟又有啲脆，外層鋪晒砂糖嘅沙翁，而家唔係好多地方食得到㗎咋！重點係，平！如果人工唔太高嘅打工仔，認真諗諗佢啦，誠意搭夠呀！

同事開心度：***
自己方便度：***
經濟實惠度：*****

曲奇

Photos by 為食奴隸獸 & meal alone
曲奇餅都係散水餅一個唔錯嘅選擇，識整嘅可以自己整，簡簡單單得嚟又突顯心思。唔識整嘅都可以出去餅店買，多款吖嘛，牛油曲奇、咖啡曲奇、朱古力曲奇等等，好似可以同時間食到幾款口味咁都幾開心。另外再買啲細細個嘅獨立包裝袋，幾塊幾塊曲奇咁後期自己人手加工包裝，更見心意。

同事開心度：***
自己方便度：***
經濟實惠度：****

零食

Photos by Winniebb2009 & four_month
直情跳出「糕」同「餅」嘅框框，送零食啦！你認真諗下，平時你office啲同事，個個嘅櫃桶都收埋收埋好多零食，無論咩時間都可以喺度食緊嘅。其實送零食一定實用囉，薯片呀蝦條呀百力滋呀餅呀朱古力呀糖呀……而且個好處係，唔使好似蛋糕西餅咁，就算飽都要畀面你而即時食，啲零食佢哋鍾意擺住喺度幾時食都得。自私食又得，開心些牙食又得，咁樣就算你派餅嗰陣唔喺office嘅同事一樣受惠度，皆大歡喜！你怕你一抽二袋拎唔晒返去？傻豬嚟嘅，可以好似叫外賣咁，叫啲零食送上門㗎！

同事開心度：****
自己方便度：*****
經濟實惠度：****

雪糕

圖：Haagen Dazs
講到最開心嘅「散水餅」，當然係送一年四季都啱食嘅雪糕啦！同事又開心，自己又方便，喺是但一間便利店、超級巿場都可以買得到。唔使用腦，每隻味都執啲就得，最緊要數返齊咁多個人頭咁多隻杯啫。不過，漏咗都唔緊要，立馬落街補買返！不過係你個荷包痛啲囉。

同事開心度：*****
自己方便度：*****
經濟實惠度：**

文：Kar

隨時接收最新資訊
讚好OpenRice專頁！