雖然開飯仔都知道唔少香港人都好「葡萄」葵涌嘅居民，因為葵涌廣場真係有好多平靚正掃街小食，仲要耐唔耐就有新餐廳...不過咁，其實只要認真搵，唔同區都有好嘢食嘅。例如藍田匯景廣場都有唔少小食店，有食家仲話呢度簡直就係九龍東版嘅葵廣！即跟開飯仔一齊嚟睇掃街攻略啦。
高CP值芝士烤大啡菇 Foodies
圖：肥寶貝
近年多咗港人鐘意食烤菇，連帶有烤菇賣嘅小食店都越開越多（鐘意食菇嘅你睇咗呢篇7間餐廳比拼未先？）佢地嘅特色大啡菇有4款口味：焗芝士通心粉、忌廉芝士菠菜、流心蛋配巴馬火腿同芝士肉醬番茄。焗芝士通心粉夠飽肚，芝士肉醬番茄亦相當惹味，最緊要係啡菇非常Juicy，而且價錢相宜！
平價手卷玉子燒 手卷屋
老實講，無論件手卷睇落去幾澎拜都好，如果啲刺身唔新鮮或者無味嘅就無意義啦係咪？放心藍田呢間手卷屋就唔會有呢個問題。三文魚同海膽水準都唔錯，鰻魚同軟殼蟹手卷都係推介。記得嗌埋佢地嘅厚燒玉子，即叫即燒，少少燶嘅玉子燒加埋醬汁，甜香同焦香都啱啱好。
任你搭鹹甜Crêpe Crepe Station
食完小食開始想食甜品？無問題，呢間主要賣Crêpe，有齊鹹甜唔同口味，例如大路嘅香蕉朱古力、芒果朱古力，或者比較少見嘅咸牛肉生菜沙律。食家大讚士多啤梨同咸牛肉口味都非常足料。而且小店仲畀大家加唔同配料，甜嘅可以加雪糕球或者燒棉花糖，鹹嘅就有得加芝士，果然小店彈性比較大。
呃Like鐵塔窩夫 Gogogo
呢間就主要賣唔同水果口味嘅Gelato同鐵塔窩夫，鐵塔窩夫係長條三角形，望落似鐵塔而且亦方便一邊行一邊食。無論金莎榛子餡配手打忌廉，定係特製斑蘭餡配朱古力醬都外脆內軟有蛋香，賣相又可以呃Like，一舉兩得。而Gelato都可以一試，配方經過店方改良，食落比普通雪糕煙韌又唔太甜。
懷舊撈麵+抵食小食 美味樂園
唔好扮細個啦，相信唔少八九十後都會食過呢啲一包包嘅撈麵。雖然唔算係咩神級美味，但自己揀完配料加埋蒜蓉辣醬撈埋，又真係香口到忍唔到口。呢啲撈麵買少見少，雖然衛生依然非常一般，不過配料仲係幾蚊一包，咪當食返次「那些年」嘅懷舊小食囉。唔單止撈麵，佢地嘅魚蛋燒賣都係幾蚊雞有交易，學生哥最愛。
暖胃香口臘味飯 吉吉魚蛋
無錯，雖然佢店名係魚蛋，而且佢都的確有魚蛋腸仔等小食，但如果小食無辦法滿足肚餓嘅你，就要嚟呢度買盒臘味飯啦！佢地臘味飯大大盒，而且吸收哂臘味精華，單係果陣香味就叫人難以抗拒。有錢嘅話記得加條膶腸，係就係肥咗少少但真係好香口。到咗夏天唔想食臘味飯嘅話，仲有碗仔翅同生菜魚肉等嘢食。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
1. 牛頭角特色食店攻略
隨時接收最新資訊
讚好OpenRice專頁！