食晚飯當然加甜品，係門口見到啲cut cake都幾靚，所以加咗件好少見嘅哈蜜瓜伯爵茶蛋糕。 當然正常menu 上嘅野食係無問題，但係件蛋糕真係唔好食，又無伯爵茶味，哈蜜瓜味都有，但係個texture 就好怪，整體就大甜，所以我覺得唔值得食。

今日4點零行完街特登黎食個tea, 兩個人叫咗一個蝦大阪燒，一個丸久小山園焙茶烤蛋糕同一杯抹茶豆乳。 大阪燒足料唔係多粉果種，當然蝦係細細粒果啲，但切開6件，每件都會食到。 焙茶烤蛋糕嘅焙茶醬好好味，好濃，連伴碟嘅香蕉都有做焦糖面，好有誠意，蛋糕應該有少少芝士，因為食落係鹹味蛋糕，食落雖然唔漏，不過一定要兩個人食，因為好大個，一個人實食唔晒。 抹茶豆乳就正常水準。 不過一定要有耐性，因為全部都係即叫即整，廚師只有一位，出餐時間比較慢。

之前生日一直想試，可惜成日都full.因為人日想食中菜，難得又book 到，終於如願。 6點坐底啱啱可以睇咸蛋黃落山，又坐得舒服，仲可以去戶外影相。 我地4個人都有好多野想試 首先每人點咗一款茶，我點咗桂花烏龍，不過略嫌淡味。 前菜手撕脆皮雞，塊皮真係最好食，脆卜卜好香口。雞肉雖然不太夠雞味，但都嫩滑，加上青瓜同金柚粒，味道清新。 第二道北海道牛乳龍蝦炒蛋白，賣相十分好，牛乳炒蛋白夠滑，可惜我覺得龍蝦肉不夠多。 點咗份拍蒜黑醋津菜芯，松露黑豚叉燒撈生粗麵，甜品試桃膠同茉莉花茶味奶凍係必食。 招呼不錯，天黑在戶外影相，店員都會主用幫手，並提供打燈，環境不在話下

成日經過見到人排，搵日又去排下 第一次4個人食左福建炒飯，飛天通菜，爆漿牛丸，豉椒炒蜆，炸豬手，黃金白飯魚，樣樣都好好味。 必食係爆漿牛丸。 食過就反尋味，因為呢頭真係無乜好野食。之後再去就試左小炒蝗，炸大腸炒米粉，蒸魚云同椒鹽九肚魚，真係食到lam lam 脷。 最後仲可以叫佢送蕃薯糖水，食埋就好滿足，又唔收加人，但係侍應態度非常有禮貌。 如果唔想等咁耐，建議17：30一開門就去，或者21：00後去，如果唔係可能要等1個鐘。

朋友仔同我慶祝生日，知我鍾意食牛，特登揀呢間。 我哋都好早放工book左6pm,去到都有幾枱客。我哋3個人，佢俾左個角落頭3個位，隔離有對情侶食緊，其實佢仲有大把吉枱，咁嘅安排好怪囉！ 佢係單點，但係限時90分鐘，食落真係好趕。我哋叫左豪華盛盒，壺漬牛肋條，燒野菜盛盒，和風拌飯同3個汽水。 豪華盛入面嘅牛肩係好味，有牛味又嫩，厚燒牛舌都ok,其他就一般。$688就貴左啲。壺漬牛肋條都脆口，味道一般，燒野菜盛盒其中錫紙包住原來係蒜頭，menu又無寫。 食到7pm就叫我哋賣單，無問題可以賣單先，食到7：20分，同我哋講有5位到在會坐我哋張枱，但係佢起碼有10-12個吉位。算喇，我哋都好合作，真係7：30起身，但係我見唔到有佢所講嘅5位客人囉！無客就唔好催啦！ 我都唔明點解單點係限時，平時放題先會限時囉！唔想趕頭趕命，而且唔值所以唔會再去。

見到報導有介紹師傅去日本學藝，所以特登黎試下。 星期日1：00左右去到，預左要等。去到前面有大概10個人，鋪頭都係得12個位，所以我兩個人等左差不多一個鐘。差不多有位時先點菜，我哋叫左一個清湯烏冬，一個廣島蠔烏冬，再加一份牛肉。烏冬真係夠彈牙煙韌，湯底都好重鰹魚味，牛肉就正常，不過不失，因為清湯無餸所以叫嘅。炸廣島蠔真係好食，夠大隻香甜，唔厚粉，同個烏冬好夾，仲有個流心蛋，真係煮得剛剛好，又夠入味，值得一試。

見到附近新開，今日早放6點幾就去試，坐低無耐都陸續有客入。 我哋兩個人淨係叫左小食雞翼，同每人一個main course bbq雞翼香脆肉嫩，附有一小碟醬仲好香，令雞翼更可口。 rib eye 同filet mignon都好抵食，建議食medium可以食到軟嫩質地同肉汁 另外，鋪頭每日3-7都係happy hour, cocktail買一送一，佢哋cocktail$55左右一杯，而且無加一，真心抵！ 有機會會去試lunch 同埋cocktail。

成日見到人影相幾靚，所以特登去試。去到發現其實都好少位，而且影啲位唔好坐，最入係比較好，有梳化位，其他都係鐵櫈。 我兩個人叫左兩個意粉，味道還可以，不過唔值呢個價，份量係女仔食量，不過我見佢寫住可以免費加底，如果男仔去記得加底。 松露帶子意粉ok,大蝦意粉就差啲，兩隻蝦煮老左，我expect係會開背，咁會易熟同易剥殼啲。 最後因為想襯返佢個粉紅主題，所以揀咗櫻花梳打，但呢個真係好難飲，不止藥水味，仲要係淡嘅藥水味。 不過佢地嘅招呼就唔錯，好有禮貌。

係喜薈入面有好多新餐廳，有啲連鎖都試過，今次試下日本菜。 呢間而家做緊同款壽司，第二件半價，所以吸引到我地幫襯。 我地叫左兩串燒牛，真係好食嘅，有牛味有口感，不過如果燒嘅時間短啲，無咁熟就好。 12件壽司，賣相唔錯，而且食材新鮮，肥瘦適中，當日最好食係帶子。第二件半價就抵食嘅，如果正價食，我就覺得未到果個level。 最後嘅清酒煮蜆，清酒味香，蜆肉夠大夠甜無沙，而且數量唔算少。 我地算早去，係第一枱客，座位都幾闊，不過佢出餐就比較耐，我地諗住呢啲都好簡單，但係等左20分鐘先開始有食物上枱。

長沙灣區最近開左好多新餐廳，呢間裝修幾有特色，放工去試下好唔好食 睇個menu,好多野都想試，最後叫左芝士菠菜意大利雲吞同法式燒春雞 跟餐會有湯，當晚係周打蜆，我覺得一般，少少稀，唔夠香濃 芝士菠菜意大利雲吞個汁幾好，不過份量少左啲啲。燒春雞係好食嘅，外皮真係脆，而肉係滑同juicy,不過雞髀骨附近唔夠熟，有血水要扣分 最後我要左玫瑰奶茶，真係好香玫瑰味，唔係玫瑰同奶茶分開，真係融合在一起，而且奶茶夠濃厚 呢個價可以再食