一直都好想去深水埗萬發 食佢個招牌 薯仔牛柳粒 但深水埗確係唔方便輪椅。但我最近先知原來大角咀輪椅係入到 雖然輪椅入到，但環境都幾逼。兩部輪椅應該係極限了；雖然依間萬發喺餐廳格局，但係侍應仍然不失大排檔嘅獨特性格。 薯仔牛柳粒果然係名物，薯仔外脆內軟，有甜甜嘅蜜糖漿包住，最利害係凍咗，薯仔仍然保持到外脆內軟。牛柳粒就最好趁熱食哂佢，凍咗就真係麻麻地，亦證明薯仔先係主角。（搵人同我食哂d 牛柳佢！） 另外叫咗套餐 例牌燒鵝 加 豉油王海蝦，同埋單點咗胡椒豬肚雞。 每一樣嘢都好食： 燒鵝皮脆，但未至於肉嫩 豉油王海蝦無過咸，蝦大隻有膏 湯。辣勁足、味濃、分量夠。 下次一定再嚟。

T.O.P 新開果陣已經對依間主打真炭（韓國柞木炭）韓燒嘅餐廳非常之有興，但遲遲都未搵到時間，今日終於嚟到一試 地點輪椅方便，餐廳寬敞 由於一行三人，目標明確想食韓牛，最後叫左個八百幾嘅1++級韓牛套餐 套餐包咗好多嘢，但主要都係睇下依「盒」韓牛，佢包咗三個稀少部位、牛舌、西冷位等等；鰻魚、章魚、魷魚 其中一個缺點就係無介紹過 三個稀少部位究竟係咩肉，食咗咩部位都不得而知 韓牛其實每個部位都好食，當然完全唔夠喉。特別係西冷，咬落去，油花喺你咀裡面四濺嘅感覺，真係極大享受。每人分得一少塊，有咩可能滿足呢 除左1++級嘅韓牛，第二想推介比大家嘅係鰻魚。套餐跟半條，由職員親手燒製，皮脆肉嫩，魚油香十足，唔會有魚腥味。 其他食物普遍都在水準之上，用料新鮮。 但有個重點必須講一講，以柞木炭作招來，但我個人認為燒出來嘅食物，反而炭燒應有嘅香味好似無乜。依一點有d 失望。 #paralyfoodie #hongkong #wheelchair #wheelchairaccessible #無障礙 #♿️ #旺角 #柞木炭家

早一排，上網見到好多人都去咗一間餐廳shake shake海鮮。今日屋企人生日終於有機會去試。 客人可以選擇要三款、五款或八款海鮮；再選擇要咩shake shake 醬汁。 今次我哋要咗長腳蟹、翡翠螺、蝦、同埋青口。醬汁就要左檸檬牛油汁。 侍應會喺我哋面前大力shake 嗰一袋海鮮，一打開個袋，檸檬牛油汁嘅香味就湧出嚟。醬汁同埋海鮮嘅味道好夾，海鮮我自己就食唔出係新鮮定係冰鮮。分量貌似好多，但係海鮮嘅份量其實算少，個袋裏邊仲有粟米，薯仔同埋腸仔。 依度海鮮雖然味道好好，但係性價比偏低。 反而小食，芝士煙肉釀雞全翼比到驚喜我。雞翼有三大隻，，雞翼裏面釀咗好多芝士同埋煙肉，外面炸得好脆。絕對可以一試。

霸嗎拉麵 將軍澳貿業路8號新都城中心二期1樓1070-71號舖
喺香港大部分評價不俗既拉麵店，同日本一樣，多數係地舖、地方細，輪椅比較難入；就算入到，都可能得一兩個位岩輪椅，所以一向期望商場開拉麵店，輪椅坐到既機會好似大d。而將軍澳新都城商場終於有一間比較有名氣而且評價唔錯既拉麵進駐。 開業果日，搵到機會就去望一望。同想像一樣，門口大概有兩至三個位係適合輪椅。我同女朋友就試左以下既野： 紫菜灸燒豚肉味玉拉麵 霸嗎拉麵主打醬油豚骨湯底。先試一啖湯。無想想中咁濃郁，但絕非淡口。之前食開豚王果種味濃豬骨湯底，比較起上黎，霸嗎呢個就無咁濃。 P.S. 香港人可能都仲覺得好濃 醬油味同豚骨湯味好融和，無一種味特別突出，淡淡既醬油味，唔會過咸。 將紫菜浸落湯，紫菜就會索哂湯底既味，另有一番風味。 灸燒腩肉，碗麵上枱果下已經聞到好香既灸燒味。食落口，有一陣焦香味；脂肪同瘦肉比例 50:50；件頭都唔細，非常好。 味玉（溏心蛋） 大部分拉麵舖既味玉有個好普遍既問題 如果將蛋放落碗麵到一齊上，如果唔食蛋先，個溏心效果會好快因為湯過熱而熟左。 如果另上，因為溏心蛋做法關係，多數係會凍既，個人黎講又唔鍾意。 霸嗎蛋味濃，蛋黃部份就算浸左喺湯差唔多成五分鐘，溏心效果依然喺度，非常唔錯。 至於麵就不過不失。 另外一碗係白雞湯。叉燒改為「雞叉燒」。 雞湯好飲，但唔係日本濃雞湯果種；而係類似中國式雞湯。如果鍾意清淡或者雞湯既你，可以一試。 至於雞叉燒就無左灸燒既香味，或者店家可能想保持清淡感覺 羽根先 一塊薄而脆身既麵皮，香口。 餃子皮薄，餡就多菜少肉，可以一試。

阿元來了 (觀塘) 觀塘鴻圖道28號地下 聞說阿元落戶喺觀塘，當然要去試下。 沿住觀塘道 行到麥當勞個位落鴻圖道，轉入工廠內街就到 今次黎之前，其實已經摸左兩次門釘 首先，原來逢星期日唔會營業，面向鴻圖道嘅商鋪全部都關了 第二次，平日夜晚 則見到門牌上寫住阿元來了嘅鋪頭 落左大閘，亦失望而回 至於今次，出發前先打個電話去確認有開，但係去到同樣見到果個鋪位係落左閘，但門上「阿元來了」嘅招牌就唔見左。最後，終於發覺一路搵錯門口，原來要轉入工廠內街。 呢度既魯肉飯同焢肉飯做得非常出色 魯肉飯 望落的的骰骰，魯肉不是免治肉碎那款，真材實料地用上五花腩肉切粒滷製而成。起初以為魯肉分量較少，好難撈哂成碗飯。但發覺細心位，碗底都有魯肉汁。撈哂成碗飯不成問題。 至於焢肉飯，有兩舊分量剛好的滷製五花腩，肥瘦比例接近50:50。 兩碗飯都係咸咸甜甜，惹味；習慣食得健康既香港人，相信對呢兩碗飯都應該有投訴---非常油膩，兩碗隻底都會有明顯的一層油（特別是焢肉飯），但我卻非常享受，美味既豬油撈飯，買少見少。建議怕油的食客，可淺嚐魯肉飯或者食米粉應該比較容易接受，亦唔會浪費食物。 另外叫左鹽酥雞、台灣腸同埋芝士蛋。 鹽酥雞香脆，放入口微微滲住九層塔既香味。至於香腸亦有跟住好多蒜頭粒，一齊食都唔錯，但如果烤到微燶帶香就好；芝士蛋一樣，蛋餅唔夠燶，亦欠蛋香，芝士味尚可。 另外叫左杯皇室奶茶加咖啡啫喱（珍珠賣哂，可見珍珠每日新鮮製造）。本身叫左走甜，但黎到變左走冰，味道唔錯，無少甜都唔太甜 必定會再黎食個焢肉飯！

鴻師傅 (觀塘) 觀塘成業街7號東廣場地下26-31號舖 07 May 2017 阿鴻小吃既鴻師傅，近年喺觀塘紮根。除左阿鴻小吃搬左去喺鴻圖道，亦喺東廣場開左間「鴻師傅」，主攻打工仔一族。 地點鄰近APM, 輪椅方便。 今次叫左 女朋友推介既叉燒飯 個人對叉燒要求都幾高 依度可以叫做符合要求，夠厚，蜜味夠又唔遮蓋到肉既味道 分量亦足，加埋煎蛋 真係無得彈 女朋友就叫左碗 碗仔翅 同埋 叉燒煎蛋軟包 味道亦好，翅有濃郁金華火腿味；湯底略稀 漢堡麵包鬆軟，叉燒亦大塊 足料 總括黎講，食物質素好 但對於打工仔黎講，價錢亦唔可以用個平字形容 但係依個價錢，有保證既味覺享受，分量亦夠 現今香港其實都越黎越難搵 我寧願比多少少價錢，好過又唔平又難食

三多炸肶 (旺角）
地址: 旺角 山東街88號地下
January 2017 久仰三多大名好耐，今日終於有機會試到啦 位置離旺角地鐵站輪椅出口就比較遠 我建議先於HSBC 過馬路 (橫跨彌敦道） 然後沿彌敦道 行到山東街街口 轉入去 咁就可以避開大媽唱K 鬥大聲團 再一路直行 直至見到麥花臣球場，餐廳就喺附近 但餐廳門口有一大級，輪椅入去就麻煩d 就算入到去，其實都你無位坐的 最後只好大聲呼叫店員幫手 落order 要左隻炸髀 同 柯檸 外賣已附帶手套 香、脆、味夠、嫩滑 非常好食 只有嫌價錢貴，$28 一隻炸髀 可以話非常貴 不論係價錢同健康 耐唔耐食一次半次就足夠啦 柯檸，比想像中好飲 飲唔出落左奶 但始終覺得偏甜 有機會試埋檸茶。

祖樂比 (旺角）
地址: 旺角 亞皆老街16號旺角商業中心1樓
January 2017 走到旺角街頭唔知食乜好 行到阿皆老街同彌敦道十字路口抬高頭就望到新開既Jollibee 一於上去睇下方唔方便輪椅 位置係喺HSBC 隔離，以前小肥羊座大廈 有一部lift 上一樓就係目的地 適合輪椅既位 其實唔算少 但人多關係都算擠迫 但不得不提佢地既服務，見我地坐輪椅 經理以至清潔員工都即時幫我地搵位 仲幫我地買埋食物，比錢找錢 再將食物送回座位 食緊期間，甚至會黎問你食物點樣 仲有冇野需要幫手 我喺度諗 其實Jollibee 都只係一間快餐 香港其他快餐 我用番KFC 同 McDonald 做比較 我真係未試過接受如此高質素既服務 行入KFC 麥當勞 會否有員工幫我地輪椅客搵個適合既位置？主動提出幫手買餐？ 係究竟無心做？唔願做？無培訓？ 其實做多一步，食客感受就大不同 講番食物 皮脆肉嫩走唔甩，味道夠 離不開會同行比較 以KFC 原味雞比較，我覺得Jollibee 更好 但我始終偏愛 KFC 辣味炸雞 女朋友的意粉餐 茄汁味道大眾化，偏甜，如果酸味重番d 就仲好 另外要提既係餐飲轉既檸檬茶，如果你鍾意食檸蜜糖就岩哂你！！！ 同細個果隻蜂蜜糖味道非常接近 滿足的一餐

港畔餐廳 (尖沙咀)
尖沙咀梳士巴利道18號香港洲際酒店下層

一間全香港訂價超級高嘅自助餐，坐擁無敵維港海景，但係食物質素未能與價格相稱。今次集中講下有咩問題。

輪椅朋友可以由尖東站J出口搭𨋢上地點， 尋找酒店職員，要求經職員通道前往港畔餐廳就可以。

記得第一次光顧，每一位都會有一杯welcome drink ，可以揀cocktail or mocktail或者新鮮生果汁，依家就轉左每位可以一杯紅酒或者白酒，場內有特製果汁任飲。雖然依家有任飲，但係冇咗cocktail or mocktail 選擇，感覺始終有啲失望。最搞笑嘅係，我屋企人唔飲酒，問經理可唔可以將杯餐酒轉汽水，竟然係唔得？！

其實我食自助餐，主要食冰凍海鮮、熱葷同燒牛肉。海鮮方面，我眼見只出過一次麵包蟹蟹蓋。之後嘅都只係refill 蟹身。麵包蟹嘅重點絕對只係在於蟹蓋。

其次係皇帝蟹腳亦都好少見到refill, 檔次較低嘅長腳蟹refill 速度明顯快好多

雖然龍蝦會不停refill，但係鮮味不太好，無咩膏，至於龍蝦鉗以前係會去殻，今次只係被輕輕鎬碎便算。

熱葷方面（冇影相），種類較為少，大部份味道其實冇乜問題，只係在於性價比。如果同其他酒店自助餐相比，例如帝苑酒店、JW、Hotel Icon，呢度反而貴得嚟，種類比較少，味道又唔及人地好。

燒牛肉反而最見水準，夠生而不肥膩（好多地方唔敢煮得太生），牛味都唔錯。鵝肝配以菠蘿，效果唔錯，但係略嫌鵝肝唔夠鵝香。酒店收得呢個價錢，但係整體食物質素越嚟越差，酒轉汽水又唔得，管理層係咪應該正視問題？

Table 18 Bar & Restaurant (觀塘)
觀塘觀塘道418號創紀之城五期(apm)UC-1號舖

呢間嚟食咗好多次，最鍾意食呢度嘅Ribs。但係今次個ribs真係好唔掂。

地點方便，搭地鐵去到觀塘站，經APM搭𨋢去到UC層就可以順利去到。

因為有優惠卷就嚟到期，所以今次諗住又來食好好食嘅ribs。今次由朋友發板，叫左以下嘅野食。

免費嘅餅乾條，每次水準都一樣，香脆。由於真係好勞氣，不如就講咗大為失望嘅ribs先，但係對唔住，唔記得影相

今次個ribs 同煲湯豬骨完全冇分別。ribs 嘅做法係應該放落一大煲湯到煮熟先，再用焗爐焗或者燒烤架燒，煮一陣就要再搽醬，重複好多次。

但係呢一次，我相信焗嘅次數好少，我只係感覺到燒烤醬求其搽喺表面，完全冇燒烤嘅香味，好似食緊煲湯豬骨。

食過好多次，每一次都好好，基本上每次都係為咗佢，今次係差到我下次唔知會唔會再叫。

其他嘢食都OK，費事篇文章太長就唔多講，睇相吧