我同班同事每日最緊張就係食乜嘢午餐，為咗食，我哋今日坐電車由中環去到灣仔，就係想食依間冰室。 呢間冰室好乾淨，座位寬敞，最重要係啲侍應真係好好。我見到有個韓式辛辣麵餐，乜嘢都有好鬼正，可惜我唔食辣，侍應提議幫我辣粉另上，等我可以自由落。 真係唔好講笑，成個套餐加埋嘢飲都只係$61 ，但係就有齊我最鍾意食嘅丹麥方包、煎雙蛋、煎豬扒、仲有韓式拉麵。 雖然我只係落咗好少辣粉，但係個湯加埋芝士都已經好好味，食到我好滿足。仲有杯凍檸茶，我叫走甜少冰，侍應真係幫我加好少冰，同埋啲檸茶好香濃，最後我哋帶着開開心心嘅心情繼續返中環返工。

中環有好多咖啡店，近來發掘左blue bottle, 之前飲咗Cafe Latte，今次飲Cafe Cappuccino, 真心覺得唔錯，所以要同大家介紹。 Cafe喺石板街再向上行，偏僻中帶一點寧靜。 Cafe裡面有好多咖啡精品，當中設計好獨特，好有美感。Cafe好大，有兩層。地下主要係買精品，有少許座位，同埋有店員製作咖啡。2樓主要係俾大家嘆咖啡嘅地方，有望住窗外嘅位，又有圓枱比三五知己坐埋一齊吹水。 Cafe Cappuccino $45: 好舒服嘅咖啡香，天氣凍令人飲得好溫暖，可惜未能提供Slim Milk，一次半次冇所謂啦～

以前同事話永樂園係中環蛇竇，好多中環bankers都會去食。咁我都回歸返中環工已經一年，大家講到咁勁，當然要搵一次機會去朝聖一下。 因為我今日下晝冇時間食lunch，所以就鼠左去永樂園食早餐。 今朝叫咗一個早餐A： - 沙爹牛肉米粉 - 腸蛋配牛油方包 - 熱奶茶 雖然上菜速度快，真心講，我覺得味道普通，完全無驚喜。如果下次再喺中環食早餐，我相信有更多更好嘅選擇。 另外，記住餐廳只收現金，同埋嗰度上唔到網，佢有Wi-Fi，但係我發覺上唔到，好失落～～

今朝帶姨甥仔返學，因為之後轉頭11點要去參加學校活動，所以我今日就去左又一城，諗住食住等🥰 其實又一城可以食早餐嘅餐廳選擇唔係太多，所以我就㨂左Exp，貪佢坐得舒服，價錢又適中，咁就可以慢慢坐，慢慢等到11點。 今日嘅早餐：雞蛋牛肉蕃茄湯麵 加 Cafe Latte, 總共$68，麵嘅味道確實唔錯，除咗食得飽，無論牛肉定蕃茄湯，調味確實做得好好，蕃茄湯係屬於杰身，所以更容易沾上麵條，非常入味。仲有杯咖啡，係有質素㗎，完全對得住個價錢👍🏻

今日去左傳說中嘅中環長龍店 - 珍姐。嘩，午市時間排好長龍，為左食，我地唯有耐心等下啦。 因為大家都好合作食完就走，所以大約等左15分鐘就入得。 午市餐牌好簡單，得幾樣野選擇🧐 出街食好少有羊排，所以我就叫左咖喱羊排飯 $85。 味道簡直係驚為天人，唔辣，咖喱同羊排好夾，羊排好入味又林，真係食到停唔到口。又話減肥，但係啲咖喱汁撈飯簡直一流，我唔小心食曬啲飯😝 我今日無叫野飲，如果飲野就大約$10-15，或者下次試下啦。

今日由中環行到去上環，就係為咗同班同事去試吓食依間冒喜。裝修乾淨，座位舒適。 我最後揀咗呢個六餸套餐： 餸嘅份量都算多，胡椒豬肚湯好啱我依啲食唔到辣嘅人，我覺得味道ok 呀。不過飲品方面就好可惜，飲水要買佢地$9嘅礦泉水，我原本想加$15飲特飲，但係又話售罄。因為我唔想飲罐裝飲品，所以最後成餐忍住口渴，之後去樓下其他店舖買台式飲品😅 不過大家要留意，我同事叫咗重慶辣湯，佢話真係好辣，大家真係食到好辣先叫啊😂

今日第一次去食老撾菜，講真，我初時以為係泰式餐廳😅老板娘好熱情，令到餐廳氣氛好開心。 餐牌選擇多，價錢以中環來講叫做中間啦。 我今日叫左： 香茅妹豬扒檬粉 $78 南薑香茅水 加$3 豬扒檬細細碟啱曬女士食，本身已經落左酸汁，好方便，而且味道唔錯喎😋香茅飲品好清新好特別，我估計係低卡路里飲品，飲完一啲都罪惡感都無😂 埋單連加一$89.1，食物質素唔錯，又坐得舒服，食完又唔趕人走，所以我都會向大家推介呀👍🏻👍🏻

同事之前因為開投注戶口，所以收到一張Lady M coupon, 咁今日就等佢帶我去威威。👀 呢間Lady M好特別，係要經過投注站入口，所以18歲以下嘅朋友就冇得去啦😂😂 沿途充滿好多馬場有關嘅公仔，好chill😛😛 終於行到Lady M嗰層 環境唔錯，好舒適。所以都揀咗一個Normal Set 2 Courses $198: - Beyond Bolognese Fettuccine - French Rose Tea Latte +$8 - Strawberry Mille-Feuilles 玫瑰奶茶超級好飲，天氣咁凍去飲真係好舒服。意粉份量好大，未食甜品已經好飽。甜品方面，我都係覺得千層蛋糕好食啲

今日中午同同事喺中環搵食，周圍都係人，見豚王相對少啲人，於是同事就提議不如食豚王啦😀 排咗一陣間終於有位，豚王店鋪有點細，所以大家都會坐得有啲迫😅 其實餐牌選擇唔多，最後我揀咗： 豚王拉麵 $92 溏心蛋 $19 等左一陣，拉麵到喇～發現拉麵配料唔係好多，所以最後都決定加溏心蛋。但係碗拉麵已經$98, 再加溏心蛋$20好似有點小貴，不過無左溏心蛋就好似無咗拉麵個靈魂，所以最後都加咗。 拉麵最重要嘅叉燒都係無嘜驚喜，我個人覺得較為薄同埋肥，所以今餐真係普普通通😂

中環食午餐已經食到好悶，有時時間許可，我會坐車去銅鑼灣搵食。 今日就去咗金百利，隨意搵咗間越南餐廳試吓。打開餐牌，午市套餐都好多選擇，價錢仲好經濟😀 最後選咗我以下嘅午市餐單： 火車頭湯檬，洛神花茶 $64 酸辣鳳爪$22 價錢經濟，但係份量一啲都唔失禮，全部都係大大碗大大碟。火車頭仲好大份量好多料，真係食得好滿足，杯洛神花茶都真材實料，好掂👍🏻 鳳爪又係好大碟，整得好入味。 埋單88，無加一，喺中環一定食唔到👍🏻👍🏻