呢間餐廳嘅位置都有少少隔涉，係位於怡和大廈嘅地庫嘅canteen入面，而我最估唔到嘅係呢個canteen仲有兩間好出名嘅拉麵鋪。餐廳主要係食刈包、炸物同壓餅，但部份食物可能太多人嗌好早就售馨！ 韓式泡菜炸雞刈包 $68 呢個刈包嘅份量真係超級多，舊炸雞超級大舊，相當抵食！醬汁係泡菜芝士汁，係有少少膩少少邪惡，但間唔中食一次會好滿足！大大舊真係好難一啖食到，不過好彩係有張紙包住成個包，唔係就好易食到污糟邋遢。 抹茶忌廉芝士壓餅 $45 呢個壓餅又係一個必嗌嘅小食。本身以為會好膩，因為係抹茶同芝士呢個組合。但實際上係甜度適中，冇出面食嘅甜品咁甜，抹茶同芝士味道好夾，抹茶仲要係流心嘅添。

據我所知，香港係得兩間非洲人主理嘅餐廳，一間喺重慶大廈，另一間就係呢間。呢間餐廳相當隱蔽，喺黃竹坑一座工廈入面，出𨋢果陣仲以為行錯路！餐廳係可以睇到無敵大海景，亦有好多特色畫作，好chill！ West African Chicken & Jollity rice $125 呢個飯嘅米粒偏長身，口感相對較硬，而且用蕃茄、洋蔥、辣椒製成，好有風味！雞槌上面係滿滿嘅醬汁，醬汁係點到即止嘅辣，好味得嚟又唔會過辣！而其他配菜之中，啲豆又係辣辣地，反而係啲菜同蘿蔔就比較dry! Smoked salmon Rolex & house salad $118 呢個卷物相對重料，有三文魚、洋蔥、三色椒等，味道唔會散收收，係blend得埋一齊。卷物有好輕微嘅香辣味，味道唔算特別但份量真係超級多！但如果只係嗌呢個做lunch又好似有啲dry，建議可以同朋友share嚟食！

上次食完呢間日式撈麵覺得好好食，而且香港甚少鋪頭可以食到日式撈麵。今次有期間限定 - 四款麻辣撈麵，就即刻去幫襯。最辣果款甚至係用左卡羅萊納死神辣椒，10分鐘內食完就叫做挑戰成功，最快完成嘅甚至可以贏到去日本嘅機票。不過我自己平時食譚仔都係食三小左右，就無謂去挑戰喇！ 肉之地獄 山椒胡麻冷撈麵（中辛）$119 呢款撈麵相對黎講唔算太辣，加上賣相最吸引，有啲似丸京嘅拉麵，全部都係肉！唯一問題就係有芜茜，我唔記得叫店員走，上麵嘅時候我第一時間就挑走曬。醬汁有啲似四川果種麻辣，mix埋青檸汁、洋蔥同炸蒜，味道好豐富！至於麵質係比較粗身，亦好掛汁，出色！不過我食到最尾先知啲麻醬喺曬最底，大家記住撈勻啲先食啊！

荃灣區好多出名嘅Cafe，今次呢間就位於荃新天地嘅地下。餐廳主打荷蘭鬆餅、咖啡、薯條同埋Tiramisu。佢嘅all day breakfast又係好特別，都係將啲配料放喺鬆餅上面！ Baked eggs & potato w/chili con carne $88 第一次食荷蘭鬆餅，係將啲薯仔同辣肉醬mix落鬆餅，感覺好新穎，有少少似食緊nann包住咖哩果種感覺！辣肉醬嘅味道好突出，但薯仔同鬆餅感覺上味道唔算濃，如果落多啲spice就應該會更加好味！ Dirty Triamisu $58 Tiramisu係呢間餐廳嘅其中一個招牌菜，Tiramisu嘅造型好似一舊磚頭咁，非常打卡able。味道唔會過甜，酒味亦都少濃！mascarpone cheese好細滑，但稍嫌咖啡味唔太足夠！

有一排冇食過出色嘅意大利菜，今次簡左間喺西營盤好chill嘅意大利餐廳，試下佢啲晚餐。食物嘅價錢都頗貴，但service好好，環境一流，好有高級餐廳嘅格調！ Lasagna $238 lasagna係期間限定，亦唔似其他鋪頭果款，係將啲千層麵捲到雲吞形狀咁，相對會較容易去夾起！味道方面，千層麵非常creamy，微微嘅燶味亦都令千層麵更惹味。反而肉粒就味道較淡，可能想突出番主角！ Eli he Genovese $198 呢個牛肉螺絲粉嘅賣相係比較唔吸引，牛肉係慢煮嘅所以會好似醬汁咁，但係都幾濃味，食嘅時候不妨可以撈埋底下嘅醬汁，會更為惹味！而螺絲粉嘅口感非常彈牙有口感，一食就知係手打意粉！ Burrata Tomato $188 去到意大利餐廳食前菜，一係就嗌凍肉拼盤，一係就嗌burrata!今次呢個burrata嘅配菜得蕃茄係有少少失望，好想有埋啲沙律菜！味道方面，蕃茄真係好fresh，而burrata亦都冇落橄欖油，奶酪味好重！

大角咀嘅地理位置係麻煩啲，但有好多好嘢食！其中埃華街就有兩間高質台灣嘢，上次試左老厝邊，今次試埋那個ㄋㄚˋ ㄍㄜ˙ 。食物嘅價錢都好平，便當多數都係60-80蚊！ 玖香啤酒豬軟骨便當 $76 本來想食最出名嘅滷排骨便當，但驚太熱氣所以嗌左呢個，原來呢個係期間限定！豬軟骨好有咬口感，雖然只有微微酒香味，但加左辣粉之後好夾！材料上都幾多，有好多蔬菜、粉絲、粟米等等，非常抵食！

荃灣有間日系cafe，朋友好耐之前已經推薦，bookmark左好耐終於食到！呢間cafe有兩層，今次就喺上層，環境闊落好寧靜，又有啲日光照射入黎，好啱傾計！ Dirty tiramisu $78 Tiramisu亦有兩款可以選擇，另一款係海鹽焦糖，今次就試左原味先！賣相非常邪惡，好多朱古力醬同可可粉，咖啡味好濃郁！Triramisu亦加左Oreo同朱古力捲，味道好豐富，係必嗌嘅一款甜品！ 慢煮美國安格斯牛板楗新奧爾良飯 $158 呢個係其中一個人氣之選，新奧爾良飯嘅味道好似risotto，材料有露筍同磨菇等。牛板楗煮得啱啱好，唔會太韌。醬汁方面，係輕微嘅辛辣嘅，加埋牛肉好match！

西貢有一間好靚嘅木系cafe，雖然位置唔多，但係非常文青，好適合deep chat傾長偈！但係留意番呢間餐廳只係會做晚市，想試嘅就記住早啲去喇！ 烤比爾芝士配吐司 $68 喺出面嘅餐廳好難會食到比爾芝士，比爾芝士嘅味道係比較柔軟香滑，可以直接塗於麵包上進食，雖然吐司嘅味道比較普通，但塗上芝士之後好惹味，份量又多，讚！ 黃豆粉年糕 $68 見到有咁多甜品可以簡，梗係要嗌黎試下喇！呢間餐廳係serve荷蘭pancake，同普通餐廳嘅pancake好唔同，餅底會比較薄而脆，而落左黃豆粉所以好濃豆香味！

好鍾意食啲唔同國家嘅菜式，順便去了解下佢地嘅文化。今次就去左試秘魯菜。呢間餐廳有兩間分店，一間喺中環另一間喺灣仔！店內嘅侍應都係秘魯人，亦都有好民族風嘅壁畫，感覺好似去左旅行咁！ 招牌秘魯烤雞（半隻） $140 想試多啲唔同食物，所以嗌左半隻雞，雞肉好嫩滑但味道唔算太特別，反而係芥末醬同烤雞嘅味道出乎意料地夾。份量亦都好夠食！另外加左個飯，個飯落左啲炸蒜同蔥花，口感同平時食嘅有啲唔同，係比較硬身嘅！ 海爐魚他他薯蓉 $98 賣相唔算吸引，本身見到仲以為少伏，但味道不錯。同牛肉他他唔同，落左沙律醬名類似黑豆醬嘅醬汁，味道微辣而豐富。薯蓉亦打成條狀，口感會比較綿密細滑！至於主角海爐魚他他，係好fresh又好鮮嫩嘅！ 秘魯特色芝士餡餅 $128 餡餅有三款可以簡，另外兩款係牛肉同海鮮，我地就簡左最邪惡果款 - 拉絲！雖然係得兩舊，但份量好足好夠飽，真係成舊都係芝士，而餡餅嘅皮非常脆口，好惹味！

尖沙咀可以話係最多居酒屋嘅一區，今日就試一間相對昂貴但質素幾唔錯嘅居酒屋。入面嘅格局係可以好清楚睇到師傅準備壽司同食物，係都好有feel! 不過可惜當天有幾款食物都售罄，冇得試曬所有想食嘅嘢！ A4岩手和牛海膽卷 $210 見到和牛同海膽呢個組合，就知一定係好食！海膽配埋魚子醬非常juicy，入口即融亦唔會腥。和牛嘅油脂分怖亦好平均，好出色！份量方面，六件亦好容易同朋友分配！ 鳶之極上壽司盛 $280 想試多啲唔同類型嘅壽司就可以考慮下嗌呢個set，有吞拿魚、帆立貝、魷魚、三文魚籽等等，其中吞拿魚非常肥美，但如果可以試埋三文魚腩就最好！