早排睇《香港燒賣關注組》，見有人推介紅磡嗰間燒賣小店，已經好想一試，咁啱今日嚟開呢頭，當然唔可以錯過。
餐廳門面非常搶眼，以橙色為主調，店內地方不大，以外賣為主，但亦有少量座位可供堂食。
燒賣口味一共有 10 款，分炸同蒸兩大類，有魚肉、豬肉及牛肉；另外亦有腸粉、炸饅頭、碗仔翅同撈麵等供應。點咗 3 款燒賣，2 蒸 1 炸👇
蒸：日式紫菜魚肉燒賣 ($24)  燒賣質感煙韌，食落魚味都幾濃郁，加上紫菜，風味獨特，配店舖嘅自家製辣油吃，倍添滋味！
蒸：秘製豬肉燒賣 ($24)  燒賣蒸得啱啱好，入口爽滑有汁，餡料實在，很有彈性。秘製醬汁味道偏甜，質感滑溜，同燒賣好夾。
炸：日式大阪魚肉燒賣 ($26)  日式大阪仿照章魚燒嘅做法，喺燒賣面層鋪上了紫菜同及木魚碎，燒賣炸到外脆內軟又唔乾身，配埋啲燒汁食，令味道更有層次。
另外仲加點咗一客秘製腸粉 ($24)  腸粉滑嘟嘟，食落好有米香，撈埋啲甜醬同麻醬一齊食，口感一流！
飲品：韓國菠蘿梳打 ($12)、日本粒粒橙汁 ($12)

同朋友嚟深水埗買嘢，搞掂就順便喺附近食個下午茶餐。上網搵到呢間「雪山冰廳」，據說餐廳創立於1956年，至今已有60多年歷史〜〜
店舖地方不大，但檯櫈擺放得好整齊企理，拼配牆上嘅魚躍噴畫同舊式茶記嘅標誌性地磚，裝修新穎得嚟又帶點復古，滿有心思💕
點咗 2 份下午茶餐 同 一客椒鹽豬扒飯。
避風塘生炸髀配紅豆冰 ($45)，雞髀即點即炸，上桌時仍熱辣辣，雞皮超脆，雞肉嫩滑不韌，加上面頭微辣惹味嘅炸蒜，呈現經典避風塘滋味。
紅豆冰用料十足，椰味、奶味同紅豆非常夾，入口甜度適中，飲完成個人充實晒。
經典芝蛋牛肉漢堡包 ($40) 配樽仔奶茶 (+$9)，牛肉好 juicy，煎蛋半生熟、咬開有蛋汁流出，麵包鬆軟富牛油香，配埋塊熱溶芝士一齊食，超正 。
奶茶用咗三種茶葉炮製，入口茶味好香濃，絲滑得嚟又唔苦澀，啖啖回甘，絕對值得一試。
始祖椒鹽豬扒飯 (炒底) ($72)  豬扒新鮮即炸，肉味濃郁又富肉汁，加上椒鹽作點綴，夠晒香口惹味！飯底炒得很有鑊氣，色澤金黃且粒粒分明，食完好有滿足感。
甜品點咗客榛子醬西多 ($32)  西多即叫即炸，送上時仍熱辣辣，切開見到入面包住一層厚厚嘅榛子醬，入口味道好香濃，外脆內軟，甜而不膩，唔使點糖漿食都已經好夠味。

同朋友嚟 D2 Place 逛市集，行完就過咗去香工搵食。喺地庫 food court 見到有間「Viet越」，餐廳主打越南料理〜〜
有撈檬、「犇犇」湯河、喇沙、越式椰香黃薑飯、香茅大雞扒同小食等供應，選擇都幾豐富，一於坐低試下。
點咗手撕雞湯河 ($58) 同 扎肉絲喇沙 ($58)，跟餐+$5 可以配一款飲品，有可樂、忌廉等。
湯河大大碗，湯底味道好鮮甜，香濃又不油膩。手撕雞份量十足，啖啖肉又無骨，肉質好滑，配煙韌滑溜嘅河粉食，充滿越南風味。
喇沙嘅水準亦唔錯，湯頭香味醇厚，入口帶陣陣咖喱香。扎肉絲幾有口感，味道又唔會過鹹，豆卜索曬啲湯汁，好味。檬粉彈牙爽口，而且沒有浸得太腍，伴著喇沙湯吃，雙重口感，十分滋味。

有事要嚟大角咀辦，搞掂就順便喺附近食埋晏先走。
喺富多來商場見到有間「TAZA Cuisine」，駐足一看，有薄餅、漢堡、卡巴、炒飯、咖喱同餃子等供應，選擇好豐富，一於坐低試下。
餐廳地方不大，以外賣為主，不過亦有少量座位，供客人作堂食之用。點咗👇
雞肉餃子 Chicken Momos ($45)  餃子一客有 8 隻，外皮唔會太厚，內餡飽滿，入口啖啖雞肉，超 Juicy，點埋佢地嘅特調醬汁食，辛香微辣，令人食慾大增。
土耳其燒肉什錦卷 Mix Kebab ($75)  卡巴大大條，外形脹卜卜，皮薄煙韌，入面嘅材料好豐盛，有雞肉、羊肉同牛肉，夾埋啲蔬菜同醬汁食，好味又飽肚。
咖喱牛肉炒飯 Beef Biryani ($70)  牛肉加入咗香料同香草調味，米飯用正宗印度米嚟炒，飯粒分明又唔會過乾，入口香中帶辣，非常惹味。
至於飲品就點咗杯芒果奶昔 Mango Lassi ($25)，質地濃稠綿滑，好香芒果味，好似飲緊乳酪一樣，酸甜醒胃。

朋友推介觀塘呢間酒吧餐廳「House FiftyEight」，趁放假專登同閨蜜過嚟食個午餐。
餐廳面積頗大，擁有特大露天陽台，室內設有桌球檯、飛鏢機、Stack Cup 和 Beer Pong，適合同一大班朋友嚟玩；而戶外座位更可以帶埋寵物一齊用餐，環境好 chill。
餐廳午市有 Set Lunch 供應，價錢由 $98 起，2pm 後惠顧，更可享 8 折優惠。另外餐廳設有專門畀寵物食嘅寵物餐，非常推薦主人們與朋友帶埋毛孩閒聊休憩。
我哋點咗 2 個午餐，套餐配有是日餐湯、餐包及熱飲。今日嘅餐湯係蘑菇湯，非常足料，蘑菇味道好濃郁，食到啖啖蘑菇碎粒。
慢煮美國安格斯頂級牛板腱 ($148)  牛板腱有兩大塊，非常厚身，以慢煮方法炮製，肉質柔軟細嫩，入口完全無渣，保留到食材嘅原汁原味，點少少燒汁食，更添滋味。
香煎紐西蘭魽魚柳 ($118)  魚柳煎得啱啱好，魚皮香脆，魚肉嫩滑，入口帶淡淡魚油脂香，配上白汁，帶出魚肉嘅鮮美！配菜有薯蓉、翠肉瓜，蘑菇和車厘茄，非常豐富。

朋友話好耐冇食過串燒，咁啱今日約咗喺銅鑼灣見面，就一於帶佢嚟呢間串燒名店「Grill ขุนทอง」 試下。
餐廳嘅門面非常搶眼，充滿火辣感，再配以店內嘅高身檯櫈和特色塗鴉牆，環境好有 vibe。
午餐有四個選擇，包一杯嘢飲，另外亦有沙律、湯、小食、串燒、甜品及飲品等供應。我哋點咗👇
去骨泰國海南雞飯 ($69)，雞件香軟嫩滑，皮彈而脂肪少，入口啖啖肉又有雞味，蘸點黑豉油和泰式辣醬吃，味道一流！油飯亦做得非常出色，軟硬度剛好，入口顆粒分明又富油香。
至於另一客泰式串燒配炒飯及雜菜 ($72)  亦屬水準之作，用料好豐富，有豬牛雞串燒各一，而旁邊更伴以香噴噴嘅炒飯。
豬肉串醃得好入味、牛肉串肉厚唔韌、雞肉串外脆內 Juicy，配濃郁沙嗲醬，神級惹味。炒飯夠乾身，調味亦啱啱好，香中帶微辣，讓人一口接一口。
跟餐飲品點咗凍檸茶同熱奶茶，檸茶冰涼解渴、奶茶有紅茶香。
另外仲加點咗幾款串燒，有白鱔 ($68)、牛仔骨 ($48)，豬肉串 ($20) 同 有機蘆筍 ($22)。白鱔肥美豐腴，鱔肉彈牙爽口，醬汁好惹味。
牛仔骨肉嫩鬆軟，豬肉串肥瘦適中，咬開有肉汁流出。蘆筍非常嫩口，完全無燒到過火，內裡依然充滿水份，入口清甜爽脆。

幫人攞啲嘢嚟田灣，搞掂就順便喺附近食個午餐。喺石排灣道見到有間叫「甜仙姐」嘅街坊小店，門面乾淨企理，一於試下。
揀咗個靠牆嘅座位，餐牌選項好豐富，有8款是日午餐，另外仲有特餐、炒粉麵飯、咖喱類同三文治等供應。
點咗星洲炒米 ($54) 同 滑蛋叉燒飯 ($53)，跟餐奉送熱飲及是日明火例湯，轉凍飲+$2。
星洲炒米即叫即做，上檯時熱辣辣，配料下得很慷慨，有叉燒、蝦仁、芽菜、雞蛋、洋蔥和辣椒絲等，分量十足。米粉炒得好有鑊氣，乾身不油，入口帶淡淡咖喱香，做到大酒樓水準。
滑蛋叉燒飯味道亦唔錯，蛋花炒得滑溜又夠清，叉燒大大塊，半肥瘦，肉嫩鬆軟，有肉香又唔會過鹹，食落相當有口感！
餐飲點咗熱奶茶同凍檸茶，奶茶順滑回甘；檸茶嘅甜度亦啱啱好，茶底芳香不濁。

之前喺《香港米線關注組》見有谷友介紹太子嗰間「郴州魚粉」，已經好想一試，今日嚟旺角做嘢，發現原來通菜街都有分店，當然唔可以錯過〜〜
據知郴州位於湖南省東南部，鄰近昭關，以魚粉聞名。餐牌選項非常豐富，除咗主打嘅招牌魚頭粉外，仲有棲鳳渡魚粉、三鮮粉、酸辣粉同特別版 8 寶粉等等。
點咗魚腩粉 ($68)、特色肥牛粉 ($70)、醉雞翼 ($25) 同 2 罐可樂 ($10@)。雞翼大大隻，好有肉地，食落酒味夠濃又唔會苦，作為冷盤小吃相當不錯 。
所有嘅米線都可以自選辣度，魚腩粉揀咗唔辣，湯底味道好鮮甜，入口帶陣陣胡椒香。魚腩大大件，灼至剛熟，肉厚肥美，入口嫩滑細緻，鮮味十足。
米線由郴州入貨，較平常見慣嘅幼身，食落超級煙韌，彈牙帶嚼勁，掛湯力極強，每一啖都能嚐到魚香。
至於另一碗特色肥牛粉就揀咗BB辣，湯底辣度啱啱好，微鹹帶辛，好啱我呢挺食辣初哥過下癮。肥牛份量都幾多，口感爽滑，肉質柔軟，食落牛味好香濃。
另外仲加咗 2 隻炸蛋 (+$8@)  雞蛋炸至金黃色，外圍酥香帶脆，蛋黃半熟流心，浸潤魚湯後，別具滋味！

放假嚟黃大仙搵食，喺鳳德道見到有間新開燒臘店～～
櫥窗掛滿了各式各樣燒味，有燒鵝、叉燒、油雞同乳鴿等，燒鵝大隻肥美、而油雞亦飽滿富光澤，令人食指大動，一於坐低試下。
店舖地方不大，但裝修得頗骨子，環境乾淨企理，而且入面更設有卡位，所以坐得都幾舒服。餐廳自設燒爐，燒味全部每日新鮮燒製。
點咗燒鵝髀瀨 ($92)、玫瑰油雞拼瑤柱貴妃雞飯 ($52) 同 一碟蜜汁叉燒皇 ($98/例陴)。隨餐附送是日靚湯，配熱飲+$3、凍飲+$8。
今日嘅例湯係青紅蘿蔔豬骨湯，湯水味道好清甜，飲落完全無味精。
燒鵝髀賣相好靚，大大隻，外皮酥香鬆化，鵝肉夠嫩，沒有鵝膻味，一咬就有鵝汁標出，用嚟配滑嘟嘟嘅瀨粉食，啖啖滋味。
至於另一碟油雞拼貴妃雞飯，味道亦唔錯，油雞皮滑肉嫩，入口帶玫瑰露酒香；貴妃雞結實入味，點少少薑蔥蓉吃，錦上添花。
叉燒燒得非常香口，半肥瘦，肉嫩鬆化，有燶邊，入口帶蜜甜之餘，亦不失豬肉應有嘅肉香。
加點咗碟油菜 (+$18) 是日為菜心，價錢合理，份量十足，食咗咁多肉，吃點菜平衡一下！

Bookmark 咗呢間日系咖啡店好耐，適逢朋友生日，專登訂座同佢嚟試下。店舖主打西日料理，採用日本食材同醬汁，烹調出各式各樣健康又美味嘅菜式。
餐廳以木色為主調，店內面積頗大，環境闊落，空間寬敞，加上以植物同盆栽作襯托，令人有種遠離煩囂嘅感覺。
點咗 2 個晚餐，先嚟每人一杯餐前飲品，紫蘇梅子梳打賣相很吸引，粉紫色澤，入口甜甜酸酸，配上翠綠紫蘇葉，味道清爽。
前菜選了蘋果木煙燻北海道帶子·日本枝豆·有機粉紅玫瑰菇·紅菜頭蓉 同 原隻煙燻鵪鶉髀伴水果車厘茄田園沙律。帶子肉厚味鮮、玫瑰菇爽身有嚼勁、紅菜頭蓉香軟綿滑，同帶子好夾。
鵪鶉髀皮薄肉嫩，入口煙燻味好香濃。沙律菜新鮮爽脆，車厘茄鮮甜多汁，青提皮薄爽口，入口味道好清新。
干邑龍蝦湯：龍蝦湯鮮味十足，入口濃郁順滑，蝦肉爽口彈牙～～
飲完湯店員隨即為我倆送上台灣有機單品茶，用作間場，清一清味蕾。今日嘅茶係迎香烏龍，茶湯蜜黃清澈，入口滋味甘醇。
主菜選了香烤野生虎蝦·蟹肉蟹膏意大利飯 ($398) 同 杜洛克黑毛豬鞍伴焦糖菠蘿·野菌西蘭花苗·鴨油洋蔥烤薯仔 ($398)。
虎蝦好大隻，爽口又彈牙；意大利飯煮得啱啱好，煙韌有嚼勁，蟹膏香味超級濃郁，配埋啖啖鮮甜嘅蟹肉，鮮味大滿足。
厚切嘅黑毛豬鞍肉質滑嫩，脂肪滲透肉內，肉味芳香濃郁；菠蘿輕輕烤過，入口甜美多汁，加上面頭有層好薄嘅脆焦糖，令味道更加昇華。
最後係甜品時間，兩款賣相都很精美，抹茶 Mousse Cake 濕潤鬆軟，入口帶淡淡抹茶香，伴以白朱古力，甜而不膩。
千層酥用料講究，酥皮酥香鬆化，同軟綿香滑嘅吉士簡直係絕配，令人愛不釋口。