呢間一直都人氣爆燈，難得見到唔洗等就入去食下，整體食物質素都好好，價錢唔貴。而餐廳好光鮮，雖然，地方唔算好大，但都大約坐到30人。餐廳係用自助落單，簡單方便。今次兩人叫左兩個餐加三份小食，每人平均百二左右。 ⭐獅城芽菜走地雞飯配輕怡新加坡白胡椒肉骨茶 $85 走地雞既皮肉間完全無多餘脂肪，而且估唔到走地雞都可以咁滑，配埋三種醬，相當惹味。呢款肉骨茶唔係平時藥味個款，胡椒味好濃好出，唔咸飲落仲幾舒服。 ⭐巴東牛肉飯配江魚仔椰漿飯 $75 份量都唔少，呢到既巴東同辣醬係分開，剩食巴東係唔辣仲多左份甜甜地既味道，加埋椰漿魚仔花生，香口又口感豐富。 ⭐鮮油咖央多士 $22 超級邪惡美食，麵包烘過脆面，夾住厚厚既半溶既軟滑牛油，加埋椰香甜甜咖央真係好好食，必食之選。 ⭐炭燒豬肉串 跟餐+$20 跟餐加小食一碟有三串，香口肥美，好Juice。 ⭐魚餅拼鳳尾蝦春卷 跟餐+$22 跟餐加小食大碟各兩件，魚餅香口正常，春卷真係有成隻蝦係入面，非常鬆脆。

好耐之前食過深水埗分店下午茶，今次黎另一分店食晚餐。長沙灣一樣有大大幅壁畫，餐廳光鮮闊落，有四五十個座位。七點左差不多坐滿全場，食物相對要等耐少少，待應好好會主動幫手追下，今次兩人叫左三個餸，每人平均百二左右。 跟餐加左個 滋潤燉湯 +$9 入面有淮山紅棗雞腳豬肉同螺頭，都好足料，個湯幾夠味，無話飲完口渴。 XO醬海中寶西蘭花 $78 好有鑊氣，唔會好油，分量正常，有魷魚魚肉同埋蝦，每樣都有幾舊，對得住價錢。 孜然香燒豬仔髀 $68 一碟四隻髀，一大啖肉，孜然味可以再重啲，但味道唔會好咸，又唔太乾身。 黑松露沙拉一字骨 $78 有六舊，每舊都有黑醬，而沙律醬兜得好均勻，條條骨每面都有，鍾意食沙律嘅我覺得正。 樽仔奶茶 +$9 餐廳皇牌之一，口感順滑，甜度適中，茶味剛好，真係必飲。

深水埗有兩間素年，要留意兩間嘅餐牌都有啲唔同，而風格就一樣文青路線，但相比之下另一間分店大啲寬落啲坐得舒服啲。假日一點左右去到排隊，大約等半個鐘多少少就入得。今次兩人兩個Lunch Set，飽到食唔哂☺，平均每人一百蚊左右。 豆腐竹碳漢堡包 $98 好特別，中間係一大舊炸豆腐，外酥脆內濕潤，當中配上醃漬蘿蔔，再加上燒汁，好惹味，不過包底汁濕。甜蕃薯薯條甜甜地真係好好味，唔洗茄汁已經好夠味。 日式咖喱吉列豬扒意大利飯 $109 分量相當多，成個飯好濃咖喱味，而植物肉味道唔會好怪，同真吉烈豬扒差唔多，表面脆脆地，不過質感就偏淋。

餐廳環境簡簡單，白色牆身，天花整左藍天白雲。今次直接叫個二人餐$638，食物好豐富，有一點要留意呢到係岩哂想慢慢食下傾下計坐下嘅朋友仔黎。 蜜桃鴨胸黑醋沙律 鴨胸厚切相當有口感，鹹味適中，配黑醋酸上蜜桃甜，味道平行得好好 義大利風乾火腿水牛芝士配無花果黑醋汁 火腿唔會好鹹帶少少油香，配軟綿綿水牛芝士，愈食愈香口。 北海道帶子配波蘭汁 煎香帶子，下面蘿蔔煮得夠淋味道甜甜地，一咬好多汁，成個味道配搭得好。 秘制龍蝦湯 熱辣辣暖笠笠，分量唔多，但味道好濃味，一般嘅濃縮版。 新西蘭鱈魚配泡菜茨茸 魚外香脆內軟滑，仲係有濕度唔乾。泡菜茨茸有驚喜，估唔到配泡菜咁惹味，辣辣地好開胃。 西班牙豬扒配香菇意大利飯 豬扒厚實，真係啖啖肉，切開仲有肉汁流出香。飯好濃菇味，味道無咁濃。

一出lift就見到係九龍皇帝筆跡牆，而餐廳入面就有霓虹光管裝飾，好本土特色，而座位大約有2X個左右，唔算好迫澀。侍應會先用消毒噴霧槍幫你全身消毒，令你食得安心。雞翼款式有好多，有成18款揀，西式中式既味都有，如果食得到多可以揀雞翼任食就可試齊哂。今次只叫左個拼盤$268加個小食，拼盤份量都唔少，每人平均$130。 菠菜甘藍沙律配柚子醬
估唔到咁好味，菜新鮮爽口無苦澀，而重點係佢每一塊每個位置都沾滿醬汁，柚子香味濃，而汁酸味岩岩好無過酸，令人食得好開胃。

水牛城醬雞翼
醬汁均勻係成隻雞翼到，醋酸味出帶有少辣，雞翼唔算乾。 巴馬臣芝士蒜蓉雞翼 大量蒜蓉灑上雞翼上，相比下芝士味無蒜味咁出，乾身款雞翼皮會多少許脆口。 日本蜂蜜芥末雞翼 三個中自己偏喜愛呢款，蜂蜜香味好出，有蜜糖關係令雞翼表面熠熠炅，而芥末可以自己選擇加幾多。 甜薯薯條 $55 試過一次甜薯薯條，依家無論邊到有得揀都一定會叫黎食，愈咬愈出甜薯嘅香甜味，而呢到薯條偏向淋身實在，飽肚感十足。

餐廳內外裝修都會令你彷如置身日本一樣，充滿東瀛風格，一入門口已聞到成間餐廳都係蟹味。依家係openrice訂枱仲有七五折優惠，每人平均$380。 三款刺身 $204 揀左三文魚甜蝦同帆立貝，新鮮無雪味，甜蝦同帆立貝鮮甜感滑嫩口感。 味噌蟹甲羅 $136 必食爐端燒一物蟹甲羅，呢到職員會幫手燒，完全唔洗擔心燒過火，燒到濕度岩岩好，啖啖香濃蟹膏配上粒粒蟹子，再加上蔥花喺蟹蓋上面，令到口感更為豐富。 牡蠣 $136 肥美，燒完仲係好飽滿咁，一啲都唔乾。 芝士魚餅 $48 味道甜甜地，燒熱後令到中間芝士溶溶地食時會拉絲，好好味。 海膽蟹肉反卷 $168 超級濃郁嘅海膽， 入口即溶，最特別係將青瓜切成一絲絲，令到口感更爽脆一層層咁，好有驚喜。 牛肉鍋 $198 凍冰冰食鍋物就岩哂，有四大片，牛味濃，個湯鹹甜調得岩岩好。

天氣開始涼，就去打個邊爐暖暖身，餐廳好colorful，有卡位有房，而枱同枱都有距離，唔會坐得好迫。早左去任揀位，一到七點已經坐左大半，建議黎食訂定枱比較好。係收銀旁邊有魚缸位比你揀新鮮海鮮，價錢合理，見有唔少人去揀。第一次黎食一定一定要試花膠雞湯，味道一流。今次一鍋四配菜，連加一每人平均$250。 大笪地花膠濃湯雞鍋 $218 一黎已有半隻雞隨鍋送到，連一碟花膠，侍應即時幫手剪開雞。湯望落好黃，但一攪就見到入面奶白色，飲落好滑口雞味濃，完全唔覺得油唔覺得鹹。煮多陣花膠開始溶溶地，呢個時候個湯就更加濃郁好味，會飲唔停，即刻覺得好補。 蟹籽墨魚滑 $78 彈牙爽口基本，而味道就比一般更有墨魚味道同鮮味，食得出好足料。 豆苗 $40 睇得出原先好乾身，落湯到愈煮顏色愈綠愈有光澤，好嫩無渣，仲帶有甜甜地。 芝士流心牛丸 $42 (6粒) 中間個芝士流心，可以拉到好長，好似平時芝心丸，但配落牛丸到多左肉汁更加好味。 美國肥牛 $78 正常味道，打邊爐必點之一，呢到比平時食既大塊好多。

男友今次帶我黎到文化館入面一間法國餐廳，位於一樓一間外形係紅磚，而內裏係藍白為主，環境相當有氣氛好warm嘅感覺，除左環境正，食物同服務都非常好，真係好岩情侶黎慶祝紀念日，必定會再黎食。今次叫左四樣野，連加一每人平均$325。 餐前麵包 免費 一碟四塊配上兩個黑松露牛油，麵包香口鬆軟，唔會好乾。 香煎半熟黃鰭吞拿魚配菠菜苗 法國羊奶芝士 無花果黑醋汁 $108 分量適中，個羊奶芝士真係畫龍點睛，味道濃厚而且好軟綿綿，吞拿魚一啲腥味都無，仲有粒粒香口松子，無花果夠甜，再加上黑醋酸味，成個配搭好好，非常推介。 澳洲藍青口配白酒雲呢拿忌廉汁 $148 青口分量幾多，粒粒都飽滿，忌廉汁香濃滑口，配有四塊蒜蓉包， 點滿忌廉汁食真係一流。 烤西班牙乳豬 配蘋果醋紅椰菜 印尼燒烤汁 $268 落單時見到差唔多每枱都有點呢個，即刻都揀黎食，乳豬表面乾脆，肉汁滿滿又入味，食落完全無油膩感，難怪人人都叫黎食，誠意推介。 西班牙檸檬撻 $68 細細件，旁邊配上青檸味雪葩，酸酸甜甜好清新，表面滑口得黎帶少少焦香味，中間檸檬餡酸甜剛好，餅底質感實淨，而雪葩係入口即溶完全無渣。

門面睇落唔大，主要係地下一層，落到去就覺得幾寬落一啲都唔侷促，仲見到有幾間房，可以遲下疫情好轉成班朋友一齊聚聚。服務好好，非常貼心。而食物選擇有好多，兩大頁揀，價錢唔貴。今日兩人叫一個雞煲同四款串燒食，平均每人$150。 招牌川味香辣雞煲 (半隻) $168 望落唔大，但食落就覺得份量唔少，食完已經飽飽地。呢個雞煲同其他有少少唔同，其他係乾身，呢個係湯煲住，但煲完啲雞肉仲係好滑，仲吸收左湯，好香既辣味，但食落唔會好辣。
燒韭菜 $15 好好味，食落唔乾仲好爽口，面上孜然粉同烤汁帶有甜甜地既味道。 燒特色孜然羊肉 $28 孜然配羊肉是完美配搭，相當惹味，羊肉無乜膻味，無燒到乾爭爭。

燒豬頸肉 $26 一咬好Juice好香口，但一啲肥膩感都無，豬頸肉有少少彈牙口感。 招牌金銀蒜燒原條茄子 $40 呢個食串燒必點既一款，濃濃蒜香，大量蒜蓉炸蒜係茄子面到，底同邊都好有味道，茄子啲肉夠鬆，好易就夾到。

餐廳一出電梯就會見到，餐廳店面好大，座位闊唔逼，仲幾有feel，好岩情侶或朋友傾計。我地7點左右到，已經有幾枱人。而Menu種類有好多，仲會有素食可以揀。 餐前包 有我最鍾意香草包配黑醋，包好軟熟，真係幾好食。 水牛芝士pizza 相當好吸引，表面有厚厚一層芝士，濃濃芝士味，岩岩出爐夠哂熱辣辣，如果你係芝士控，絕對要試下。 蟹肉甲羅燒risotto 一點都不平凡，味道非常濃郁，店家好足料，成個蟹殼都係滿滿的蟹膏，蟹肉加蟹子， 三樣再加埋一啖飯，比我想像中更夾。而飯粒唔會太淋，硬度岩岩好。 德國腸拼腸拼盤 有幾款唔同嘅德國腸，份量十足，再配上Mayo sauce，味道好唔錯。 Refreshment (Pineapple & Strawberry) 賣相好靚，味道幾好，底仲會有果肉。 因為太飽無叫到甜品食，但見到隔離枱食apple crumble，好吸引，下次會再黎試下。