今日沙田搵野食，身為大胃王既我緊係搵間自助餐廳或者放題黎拆返餐飽，經過牛摩門口，俾個餐牌寫住$109自助餐吸引住左，即刻問身邊女友想唔想試下，最怕諗食乜野既佢去到呢間舖門口，見到入面又有汽水機又有蔬菜吧又有日式打邊爐，緊係話冇問題啦，誰不知準備入門口之制，待應講返清楚，$109只係包括自助蔬菜吧同甜品汽水吧，仲要係9點後，當時仲有30分鐘先到，同埋要包括豬肉雞肉牛肉就要加錢，果一刻心諗，反正都問左女友話冇問題，唔諗喇，食左先算，跟住就直接入左去坐低。 因為我地2個人，所以我地可以叫兩個湯底，一個係豬骨濃湯，另一個係壽喜燒湯底，野食好快就上左枱(因為好明顯係切左先🤣)，我見D湯未滾，所以出去蔬菜吧攞野先，蔬菜吧有好多種菜，真係諗到乜有乜，連我最鐘意既玉子豆腐都有，我攞左幾舊粟米、金針菇、玉子豆腐就返去枱，因為用電磁爐，所以個湯好快就滾，我以9秒9既速度放晒d牛肉落湯，跟住就以9秒9既速度就夾返上黎，D牛肉真係超正，肉質鮮嫩，有牛味，仲要係肥瘦適中，冇5分鐘就俾我地2條餓鬼清晒，待應見唔對路，跟住就轉眼攞過另一碟出黎俾我地，個份量仲要多成倍😍，但又係因為食得太快，所以我地又唔夠半個鐘就飽到想死，人類祗會犯同樣既錯，唯有下次再食慢少少啦，眼見我同女友都冇乜戰鬥力，我就叫埋單。 三百幾蚊2個人有靚牛肉食算係咁，下次應該會再黎，不過會餓返三日三夜先😆🤣

今日一條友on居居行深水埗，經過欽州街俾我發現新大陸，原來黃金電腦中心附近有間真正印度人開既咖哩餐廳。間餐廳門口係有個印度人煎薄餅，抬頭望一望佢地掛到頭頂咁高既餐牌，發現五六十蚊一個咖哩連飯/薄餅，當時感覺好似貴左少少，但心諗，反正自己今日對食午餐都咁有要求，把心一橫就洗多比平時二三十蚊去試一試真正印度人親手整既咖哩。 間舖唔大，得果十幾個位，待應加埋廚房都係兩個人🤣🤣不過可能因為過左食飯時間，所以我可以好隨意咁行入去搵個卡位坐。餐牌上主要食物除左黃咖哩同埋菠菜咖哩，仲有燒春雞，咖哩角同埋牛肉卷餅等等，我因為今日口淡淡，所以揀左個咖哩羊再加一杯印度凍奶茶。 亦都可能因為過左食飯時間，制作過程非常之快速，我攞起手機㩒左兩分鐘message就有得食，對於一個餓到好似非洲兒童既我實在完全係差唔多喜極而泣。 個咖哩羊賣相還可以，只可惜份量少左d，只有屋企食飯碗咁既份量。同埋我係鐘意食羊so味既食家，不過呢個羊一d都唔so，唉，冇so味既羊真係大打折扣呀！ 不過好彩個薄餅都夠熱同香口，加返少少分啦。個奶茶就一般般，同我屋企自己用Lipton 沖既奶茶冇太大分別，如果要我讚就可能唯有讚佢冰夠凍囉！🤣🤣 最後埋單承惠$70，我覺得比起重慶大廈果d既價錢，呢間餐廳真係算平，午餐食個quick lunch黎止一止條印度咖哩痕都還可以。不過下次就應該食返個牛或雞會穩陣少少喇🤪🤣😆