今晚夜收工, 唔想煮就揸車去大埔搵食, 見到呢間DAS BIER 德國菜又未試過咁就入去了, 車泊旁邊條路都幾方便。入到去見到MENU, 除左德國野原來仲SERVE埋西班牙菜, 不同款式的西餐都有。 我諗住咁唔專注的西餐廳，都係揀食牛扒穩陣，朋友選了CARBONARA亦係穩陣之選，另外仲有得飲近期大熱芝士奶蓋茶，我揀左桃味。好啦, 坐左唔夠5分鐘, 野飲黎先，奶蓋好香濃牛奶味，真係飲得出用新鮮鮮奶打成豐厚泡沫，桃味綠茶亦不會太甜，整體黎講係非常OK! 朋友碟Carbornara 亦上桌, 份量十足, 目測比起一般餐廳應該多出50%份量, 我當然唔執輸試一啖, 一試竟然覺得個芝士味極有力度, 好足夠的芝士, 仲有蛋香!! 意粉還算AL DENTE, 實在係驚喜!! 我份牛扒亦都來了, 叫的是GRILL RIB-EYE, MEDIUM, 10OZ, serve board 上, 一眼見到就知OK啦, GRILL紋呈斜格狀, 剛剛好, 再切開睇下係呼MEDIUM, 見到亦無令我失望! 另外牛扒配菜是大量有連皮炸的薯條，飽到我呢! 甚是驚喜, 這絕對不是在普通屋苑樓下可以食到的質素!而且價錢亦算相宜, 選擇甚多，可以容易滿足一家大細需要, 下次必定會再來!

之前食過飲茶麻麻地、事間半年以上再試下，估唔到好食左，仲值得再去，星期六中午時段都唔多人等，上面果間就超多人等位。腸粉唔錯，但不少酒樓已轉為長碟，切好6件，變相份量少左！ 流沙煎堆仔，剛剛做好熱辣辣，一咬便流心，整得超好、好好食！ 紅棗糕，紅棗味濃而不會過甜，煙煙韌韌，正呀！ 平時蒸排骨，骨多過肉、墊底既芋頭多過排骨，呢度既蒸排骨大大舊，啖啖肉，醃得好食、個個都讚好！ 燒賣唔係一般交來的點心，似自己做，夠大粒，味道唔錯！

位於沙田區石門京瑞一，二期好多餐廳，中，日，西餐都有，今日去左第五街冰室，個名夠哂懷舊，入到去都幾大，岩岩趕到lunch hour前，所以大把位，未到12點就去到，早餐7:00-11:30，下午茶14:30-18:00。 我呢個雞脾餐，雞脾大少適中，味道普通，牛油蒜香厚多士，公仔麵湯底好清，好像啖啖的雞湯味！ 到12點左右開始人多，好快就坐滿，不過出餐快，趕時間的就岩曬啦

約左住元朗既朋友食lunch，佢次次都比我話事，我就想食茶餐廳或者冰室，叫佢帶我去，我地未食過喜友此里就決定去試下！地址唔難搵係以前都幾中意食既車仔麵後面街，大家一講就知係邊！ 設計非常懷舊風，是昔日香港！牆身畫上即日放映都看到當年很紅的電影，李小龍，女殺手黑玫瑰，東方不敗等等！ 喜友百搭套餐B雞扒，洋蔥汁腸仔！隻碟大過一般的蒸魚碟！份量十足只是$43，難怪呢度咁多中學生喇～滑蛋蔥花鋪在飯面，非常滑口，雞扒兩塊皮脆肉質嫩有肉汁，配洋蔥汁超夾！仲有煎腸仔無敵了，有埋條生菜，好均衡呀！

元朗形點食晚飯一向多人等位、想快快食完餐飯周圍行下，元朗學記粥麵唔洗等位就衝去拎位、因為食客唔會坐得耐，食物快上檯、岩哂我！ 鮮牛肉撈麵$50，鮮滑牛肉好多片，夠滑口有牛味，蔥花超多鋪滿撈麵，仲有幾條菜，$50蚊份量超足，女仔一定食唔哂！ 芥蘭$30，加左腩汁既介蘭，仲帶點牛腩肉絲，食極都有，出街食飯都想食得健康d，呢碟菜抵食！ 鮮蝦雲吞麵$38，麵底都幾多，雲吞大少正常，有爽口感！ 酥炸鯪魚球$24，好大粒成粒魚腐咁，食落比魚腐煙韌，不是太好食！！

7點幾係EMax行完街，唔知關唔關今日係平日，好多食店都無人同埋收左鋪，諗住去食拉麵但經過蕃滿門，第一次見咁得意，專食蕃茄既菜式，又見食客既蕃茄濃湯，焗飯幾吸引！（感覺幾健康） 鮮茄蓉芝士豬扒焗薑飯$63,加$3轉意粉，要等大約15分鐘，新鮮出爐剛焗好的豬扒意粉，豬扒好嫩滑，蕃茄同芝士比例完美，起初見$63有點貴，但食後覺得好值得！ 酥炸脆雞，賣相似酥炸生蠔，有泰式酸甜汁，味道好夾 咖哩牛腩自家蕃茄焗薑飯$66，個汁鋪滿個飯，芝士咖哩汁超美味，牛腩好大舊又夠腍！

匈牙利牛肉湯，$58超濃又多料,加意粉食都幾好喎!配上果仁牛油餐包好正,兩個人可以share呢個湯暖一暖肚先食d煎炸野! 黑松露芝士薯條，用煲仔上檯,份量好多,我地三個食唔哂,薯條佈滿芝士同黑松露,最緊要呢個煲仔非常保溫!! 香煎腸配香滑薯蓉及酸椰菜，$138,6條腸仔,味道普通,酸菜同薯蓉好好味 鄉村肉批，$79鋪上煎蛋的肉批似午餐肉,墊底的煎薯餅好香脆 煙三文魚薯餅，$79同肉批一樣有煎脆脆薯餅,雖然細細碟但一樣有擺盤,有d沙律菜食下,煙三文魚唔錯!!

全新裝修了不久,每次去都系飲茶,今日試下晚飯,睇睇餐牌真系嚇親,抵食選擇多,我地兩個人本來想叫4個餸,因為太多款想食,落單姐姐同我地講唔好叫咁多食唔哂架!!! 咁就叫3個餸食～$58蒜蓉炒什菜,碟菜好大碟,色香味俱全! $58沙嗲粉絲肥牛煲,肥牛唔少算大塊,唔會變左碎哂既肥牛,呢個撈飯超正,仲有d酸菜粒好特別,但成個煲既食物又唔會酸,最後先放落去,很細心! $68菠蘿生炒上肉排,最後呢個我地食淨少少,粒粒肉排都大大舊,伴菜又多,呢度真系超抵食,好想快d再去! 之後見到隔離檯全部都有糖水!!紅豆沙!問問姐姐先知有糖水送!太正喇!食得非常開心

銅鑼灣時代廣場13樓有間澳門菜，我地好耐無去澳門，一於入去食，星期一紅日8點幾唔洗等位，呢度坐得舒服，兩個人叫三款菜。 烤焗盲鰽魚伴檸檬牛油汁煮海蜆，$178唔算大條適合2-4人食，有紅黃椒，洋蔥，火腿粒，橄欖，牛蒡伴碟，好豐富，味道唔錯。 小島椰香葡國雞配飯或蒜茸包，$138葡汁美味開胃，雞件大舊夠滑，點少得薯仔，葡汁送飯無得頂！！ 葡式西洋腸炒雜菜，$72每款餸菜都有橄欖、臘腸，味道亦非常配！炒菜更一流，有椰菜，菜心，粟米仔，好味呀。

香港越來越多台式飲品店，每家都有自己招牌野去吸引大眾去，但好飲大家先會再買，天仁茗茶好岩我，最初飲，最常飲的是913茶王，有時唔想飲甜野，出到街食完飯飲杯茶就最正，因為佢夠甘香，所以好好味，如果買佢地既茶葉我會推薦313~佢比913味道更甘甜，用少少茶葉可以沖泡多次，味道超好！最正就係帶茶葉去飲茶，同屋企人，朋友邊食邊嘆靚茶，個個大讚，真係飲多過食！ 今日又經過天仁見到出左一星期左右既913黑糖珍珠鮮奶茶，沒有抱太大期望，只見新產品岩飲就試下，下午茶時間好多人買，等左10幾分鐘，拎上手上凍下暖，奶茶整熱左好香，再加返冰，攪一攪飲得！黑糖珍珠超級煙韌，滑口～而且真係有黑糖味，奶味香濃，由於奶多過茶飲到一半己經好飽，下次飲要少奶多茶！