自己一個叫外賣就棄用🐼，改用黃色logo外賣平台，因為最低消費額唔洗咁高🙈 叫左個蒸飯套餐，包一個蒸飯加一個燉湯 之前都叫過呢間蒸飯，嗰次味道都唔錯，開頭幾啖都還好，可惜越食越覺得咸。今次味道就剛剛好，無咁咸好食好多。面層嘅飯蒸出黎都係粒粒分明，唔會濕立立，不過底層嘅飯因為啲汁所以濕左啲。 燒賣～味道都可以，啖啖肉唔會有好多肥膏。 過左幾日之後都有再叫多次呢個餐，食落唔係好咸，但食完都係勁口渴。。。。。

隔左成個月，終於補返個食評 當日揀左髒髒朱古力🍫，伏 雪糕係白色嘅，門口擺左張banner係北海道牛乳雪糕買一送一，斷估係牛奶味掛。但食落只知食緊雪糕，但完全食唔出係乜味。佢banner寫住北海道牛乳5.0雪糕。用5.0仲高脂過3.6，飲呢杯野預左肥，但又肥又難食，浪費quota先最衰。 杯野飲就只有微弱嘅朱古力味 如果質素咁樣好難生存落去，難飲到唔知有無能力去改善。不過都真心希望可以改善飲品質素，如果唔係啲新客買完返嚟冇轉頭，只有等執笠 唔知經過一個月時間，水準有無進步到呢 但為免再伏，都唔想再試

一人前套餐 包一款小食，餐飲同主食 豚肉小籠包～本來對玩fusion嘅食肆整嘅小籠包都無特別期望，但有出乎意料嘅驚喜。 小籠包質素比我預期中出色，好多食肆嘅小籠包都敗喺塊皮度。 張相望落好似好厚皮，但實際唔係真係咁厚，雖則未算係好薄嗰隻。皮係偏向煙靭，食落唔會好糊好黏，加分 千層豬扒擔擔拉麵~湯底爭啲香味，同埋可以再辣多少少，不過而家都唔差嘅，但有進步空間 千層豬扒～開頭諗點樣千層法😂，原來係好多塊薄切豬扒卷埋一齊炸。不過吉列皮唔夠鬆脆，肉質唔係好嫩滑。 好彩上openrice望過下，見到塊豬扒係放落湯度，落單時同店員講豬扒分開放。 切記：如果唔想豬扒浸到淋晒，記得同店員提出分開上 咖啡～呢度咖啡一般，不過唔算係特別好飲。不過唔想飲茶嘅話，又有多個選擇 為左個小籠包，過左幾日又黎食多次 不過今次質素同上次比，差左啲🥲 今次個包底食落濕+淋左啲，有少少糊口 唔知係咪蒸得太耐

對上一次食lady M蛋糕都已經好耐之前 以前堂食蛋糕，要排好長龍先有得食 而家分店多左，食蛋糕方便左，唔洗去尖沙咀先有得食 其他分店唔知點喇，沙田分店就唔洗點排隊，慳返好多時間，呢樣非常重要 cappuccino ~正常，無乜特別 千層蛋糕keep到水準 啲cream好綿密，好滑 每一層皮都一樣咁薄、咁平均 海鹽焦糖千層蛋糕🍰～因為焦糖，所以會偏甜，但焦糖味好香，老公鍾意焦糖多個原味 原味千層蛋糕🍰～最簡單，最原始嘅味道，可以食到忌廉嘅奶香。 我自己反而鍾意原味多啲，一嚟相對冇咁甜，二嚟食到香濃嘅奶味

鋪頭唔大，座位唔算多 呢度有客飯 晚市客飯，包飯🍚、湯/豆漿 其實有好多野想試，但喺揀食乜野期間，聽到隔離枱話個鱔糊幾好食 聽到人地話好食一於照跟😂叫左個炒鱔糊客飯+湯 湯都算幾咸下，如果下次再黎食，唔會再揀湯 炒鱔糊味道其實唔錯，但啲特別幼嘅部位超級腥，不過好在大部份都粗啲嘅位置。張相望落好似係炒芽菜咁款🤣其實夾開啲芽菜，鱔嘅份量都有大約十幾塊。我都幾鍾意食芽菜，所以呢個份量比例對我個人黎講都接受。不過最衰就係咸，開頭第一啖覺得味道唔錯，係咸左少少，但越食越覺得咸 食完餐飯勁口渴，勁辛苦，要狂灌水🫖🫖🫖🫖🫖🫖 要改善嘅地方： 食物偏咸，如果啲野食可以無咁咸就好喇 白飯比較濕同淋左啲 可能純粹今次調味重手左啫，都會想下次返轉頭試下佢其他野掂唔掂

唔掂，好失望 第一次幫襯，不過都唔會有下次 黎屯門睇戲，研究下有乜好食，又係睇完openrice伏左🫠 見到好多好評，諗住黎試下就。。。。。。 蟹粉扒豆苗～都幾咸，又無鮮味 本來想食津白，但老公見到有蟹粉扒豆苗就話要食，唯有放棄津白 菜肉雲吞麵～湯底淡茂茂無味，啲面淋之之 小籠包～皮偏厚，肉有雪味，唔叫唔會係損失 炸饅頭～正常味道，但係已經係全餐飯最好食嘅野😵‍💫 但太細粒 好彩唔係叫左好多野，如果唔係又多幾碟令人失望嘅菜色 p.s. 食食下聽到後面枱客話：從來未食過咁難食嘅口水雞

冬陰公湯～好味，唔會死咸 黑醋芒果蟹肉沙律～ok 馬拉盞炒通菜煲～正常，通菜唔會煮到淋之之 泰式燒豬手～幾正，皮巧脆 配蝦片，用黎送酒一流 墨魚脆豆卜～送酒非常好，不過要點返啲汁先夠味 泰式炒蜆～正常 咸肉炒椰菜苗～ok，正常發揮 椒鹽粟米～唔夠香口，爭梗啲椒鹽，可以加多少少椒鹽 脆爆芒果園～有爆谷又有粒雪米糍 味道無驚喜，但真係好大杯，大滿足 椰子雞船～推介 呢個雞船絶對唔講得笑 係朋友話想叫，最初睇少佢，心諗會有幾好食⁉️ 咬左啖雞嗰一刻，瞬間打倒一秒前嘅自己 濃濃椰汁🥥味，真係好好味，啲湯都唔放過，ko晒 下次都一定會再叫 豬頸肉炒河～唔知係飽得滯食乜都無味，定係本身唔算係好出色🤣 蝦餅～打咭able，打咭📸影相一流，味道正常，唔似個樣咁有驚喜

之前夜晚黎到見到出面排滿晒人，最終打退堂鼓。。。。 今日六點前黎到，見到鋪頭無乜人一於試下 雖然鋪頭𥚃面冇乜人，但係門口已經擺滿晒外賣 蒜蓉麻辣狗仔粉～對我黎講都幾辣下，但又唔係好食得到『麻』，又或者辣到我已經無晒感覺🥵 開頭以為係麻辣湯底，但原來成碗都係辣油浸住，同我預期嘅唔同 狗仔粉食落似煮到淋左嘅上海麵/噹噹烏冬 雞翼～ok, 係成碗野之中最好食 楊枝甘露～亦都同我預期有啲出入，味道唔似平時食開嗰啲楊枝甘露，芒汁底嘅味道有啲似芒果雪糕

一黎到就有位仲以為都唔係好多人幫襯，點知等緊野食嘅時候就有一堆人喺出面等位。。。。。。。 好彩早丁丁咁多入黎啫😛😗 花生醬煉奶香蕉窩夫配香芋雪糕～窩夫味道正常，不過窩夫略嫌過脆，由外而內都係脆。個人偏好外脆內軟，如果烘嘅時間短返少少，做到外脆內軟會更加好 紅豆栗子朱古力窩夫配朱古力雪糕～呢個配搭有啲漏 明明每樣野分開都好食，但一齊食就有啲漏，尤其係栗子蓉 不過同原味窩夫一樣，朱古力窩夫都係太過脆 芋圓～ 正常發揮，都可以一試

見到門口無乜人，以為唔洗等位，原來呢度係可以留低電話等餐廳打黎，唔洗企門口呆等 唔洗企定定等實在太好，就趁等位時間去禮品中心換禮物，換完返去餐廳途中就收到餐廳通知話有位喇 開頭以為得咁少位，但原來仲有上層 抹茶咖啡～朋友叫嘅 青青青瓜咖啡～見到menu上推介，叫黎試下 可能自己衰叫左少甜，feel唔到清新感覺，只覺得青bb，如果叫正常甜可能會好啲 蟹肉明太子流心西班牙蛋餅～其實就係一堆圓圓嘅滑蛋，裡面有啲少少蟹肉、薯仔 味道ok，但唔會係為左呢個蛋餅回頭😂 刺身帶子三文魚子明太子貓耳朵～本身Menu上面係手捲粉，但落order嘅時候店員話冇晒手捲粉，而家轉咗貓耳朵 明太子汁味道唔錯，不過叫嘅時候冇考慮到兩款食物兩個都係明太子，食食下先發覺自己叫錯咗野，食黎食都都係咁上下味道 大部份貓耳朵個心仲有少少硬，係間唔中食到一兩粒煮得剛剛好，如果可以煮耐多少少咁就好喇 雖然食物未算好突出，但如果同朋友想揾個位置坐低吹下水，呢度都唔錯，但可能有時間限制唔坐得太耐 快樂嘅時間過得特別快。。。食完繼續吹水都無留意時間過左幾耐，店員拎單上黎話要埋單走人，我地唯有閃人喇