放假行過紅磡置富都會，想食個平靚正嘅飯，可以試下紅蔥頭。主打港式西餐，價錢亦都幾經濟實惠，晏晝幾十蚊有主菜有湯有野飲。 餐湯係經典羅宋湯，好足料，酸酸地幾開胃。 主菜叫咗白菌汁牛扒飯，薄牛扒雖然比較多筋，但相當有牛味，個汁都調得唔錯。 而朋友叫嘅burger都分量十足，漢堡扒好厚肉juicy，夾住生菜同蕃茄，食一個都好夠飽，另外仲配埋薯條，外脆內軟。 至於坐嘅位置都幾闊落，坐梳化亦都好舒服，仲有窗口位可以坐，整體性價比幾高。

復活節想食上海嘢，於是去咗青衣城樂天皇朝。之前食過佢嘅小籠包，覺得質素唔錯，今次就主力試其他菜式。 🥢擔擔麵 擔擔麵非常香濃，湯底有好濃厚嘅花生醬，麵條亦都相當掛湯，兩個人食一碗啱啱好 🥢沙拉骨 見到隔籬枱叫咗沙拉骨，賣相睇落唔錯，於是我哋都叫一碟試，味道果然有驚喜！排骨用咗上海排骨製法，炸得金黃軟腍，每一件啖啖肉，得一兩成係骨，加埋濃厚嘅沙律醬，超級邪惡！ 🥢花雕醉雞 醉雞整得好入味，每一啖都充滿花雕香，而雞胸肉亦都唔會好嚡👍🏻 整體質素都唔錯，青衣分店都好大好多位，遲啲帶長輩去食吓先！ 另外樂天皇朝有一系列10週年活動，分三階段推出$10優惠菜色 第二階段: 3月25日至4月7日- $10 原味小籠包 (6粒) (原價: HKD$78) 第三階段: 4月8日至4月30日- $10 週年限定口味小籠包 (6粒) (原價: HKD$88)

大圍站新開嘅商場圍方，出面有一條開滿餐廳嘅食街”積富街”，有一間喺出面已經聽到音樂，即刻入咗呢間西餐廳。 我哋揀咗個Signature Beef Wellington Set For Two，有3個前菜、1款湯、2個主菜同2款甜品，$1,088 超抵食！ 前菜🍽️ ▪️生蠔4隻 唔會太重海水味，加埋檸檬汁，好新鮮。 ▪️巴馬火腿配蜜瓜 鹹火腿加甜蜜瓜，配黑醋沙律，非常開胃。 ▪️香草牛油田螺酥皮盒 酥皮超鬆脆，加上好香牛油味嘅田螺，唔錯。 湯🍽️ ▪️招牌蟹肉龍蝦濃湯 超濃郁龍蝦味，仲有啖啖蟹肉，好飲。 主菜🍽️ ▪️香煎日本帆立貝蕃茄醬意大利麵 大大粒帆立貝同酸甜嘅蕃茄醬混入麵條，口感豐富。 ▪️5小時慢煮美國威靈頓牛柳 酥皮薄脆，入面牛肉非常軟腍，中間夾住蘑菇蓉，又嫩又多香。 是日精選甜品🍽️ ▪️朱古力慕絲 帶有少少苦味嘅朱古力，完全唔膩。 ▪️士多啤梨布甸 有酸酸甜甜嘅士多啤梨同果醬，酸甜軟滑。 餐廳現場有live music，加上復古裝修，好有feel💕

葵廣有好多食肆，競爭相當之大，但係呢間孖寶車仔麵就做到冇停手，星期五晚都有勁多人食。 車仔麵三餸$52包熱飲，有幾十款送選擇，一般大路嘅餸都有得食，湯底亦都有得揀腩汁、辣汁、秘製汁等等。 我要左個三餸麵，雞翼、煎蛋、魚肉春卷配烏冬，加腩汁。雞翼撈得相當入味，而煎蛋亦都煎到蛋白窿、蛋黃留心，都幾出色！至於魚肉春卷，表面睇落稍為燶咗啲，原來入邊係鯪魚肉，難怪咁深色。 朋友都係要三餸麵，餸菜揀咗咖喱魷魚、牛腩同埋豬頸肉，米粉加咗腩汁同秘製汁。秘製汁相當出色，有啲似咖喱沙嗲汁，而咖喱魷魚亦都好出色，個汁好惹味！而牛腩同豬頸肉都好爽口，呢個價錢收貨。 飲品揀咗熱奶茶同熱檸蜜，唔使另外加錢，抵飲👍🏻百零蚊就食得飽，終於明點解人氣咁勁！

半山有一間幾清靜嘅居酒屋，主打日式串燒、炸物等下酒菜，由於位置比較隱蔽，星期六晚7:30去到都唔算好多人，有個清靜嘅環境俾我同朋友食嘢👍🏻 📌牛舌芯 一串有3塊牛舌，燒到好Juicy 📌雞腎 雞心 雞肝 朋友比較鍾意食雞內臟，所以就叫咗呢三串，粒數都好多！ 📌雞皮 燒到卜卜脆，勁邪惡！ 📌雞翼 一串有兩隻雞中翼，燒到雞肉好嫩滑，唔會好乾身 📌油揚豆腐 日本銀杏 秋葵 豆腐外脆內軟，銀杏有驚喜，而秋葵就正常發揮 📌炸墨魚咀 一份都有好多粒，炸到好脆口，而且仲有附上自家調製嘅沙律辣醬，點左更惹味 📌豆腐沙律、螢光魷魚 豆腐好滑，面頭仲有金菇醬，味道幾得意！螢光魷魚就比較重口味，送酒會適合啲

以前去T Town 嘅天鳥居酒屋都係食壽司/日本料理，覺得幾高質。最近睇到佢推出100分鐘任食火鍋放題，即刻試試佢。 佢有4款套餐、9款湯底任選配搭，我哋今次就揀咗美國牛頸脊套餐，湯底方面就揀咗招牌胡椒豬骨同椰子雞鴛鴦鍋。 揀得美國牛頸脊套餐，率先就試佢嘅2款牛肉一美國牛頸脊&美國牛板腱。牛頸脊係厚身肉切，牛肉爽口，就算煮耐少少肉質都唔靭，好味👍🏻而牛板腱都唔輸，脂肪分布均勻，食落一啲都唔油膩。 招牌胡椒豬骨嘅胡椒味極香，但又唔會好辣同嗆口 ，加左個索湯汁嘅響鈴同公仔麵，吸晒濃湯精華，味道即刻升級咗。而椰子雞係清香椰子味，適合想清清地食火鍋嘅朋友。 呢度係用QR code 落單，自己可以喺醬料區調醬，飲品任拎，啤酒同清酒都可以任飲！仲有叫佐酒小食，大快朵頤🤭

今日慶祝朋友生日，揀左一間位於旺角樓上嘅餐廳食西餐，感覺都幾好feel，今次揀左二人餐。 頭盤要左4隻生蠔，侍應話係法國蠔，相當大隻。另外仲叫左巴馬火腿配蜜瓜同埋蒜香牛油田螺酥皮盒，酥皮盒有好香牛油味，夾埋田螺一齊食幾好味。餐湯有蟹肉龍蝦濃湯，好濃蝦味。 主菜就有香煎日本帆立貝蕃茄醬意大利粉，帆立貝有四隻，相當大粒！意粉蕃茄醬偏酸，都幾開胃。另一道主菜就係威靈頓牛柳，酥皮夠香，牛柳夠嫩，個磨菇醬都好香，連墊底嘅菠菜洋蔥都好香，成道都好出色。 是日甜品就係Oreo cheesecake，為呢一餐劃上完美句號。

每次搭鐵經過大圍都會見到新強記個招牌，今次終於有機會入去試！港鐵站一出過天橋就到，地點好就腳。 餐廳裝修好古色古香，好有中式味道。入面主打中式小菜，必食嘅有乳鴿、雞粥同燒鵝，今次因為得兩個人，所以揀左乳鴿、雞粥試。 先嚟一隻乳鴿，炸得外皮好香脆，但肉質唔會太乾！而且乳鴿本身醃得好入味，每啖都好Juicy，果然係名物！ 另外雞粥叫左例牌，都好大碗，夠3-4個人食。粥煲得好綿滑，每一啖都好有雞味，而雞肉亦都好滑，件數亦都好多，抵食又滿足！ 下次帶埋屋企人試多幾樣先~

麗新以前係死場，自從開咗壽司郎之後就起死回生，連帶二樓都旺埋，入左貓Café，連帶附近都開左一間寵物友善餐廳，主打日台式精緻料理，就係今次要介紹嘅梓沐村。 餐廳有唔同套餐揀，今次就揀2個主食+1個冷盤+一碗飯，同埋3個主食+一碗飯，套餐仲包湯品同飲品。 - 溏心蛋+比目魚西京燒+古早味炕肉+日本醬油蛋拌飯 溏心蛋好入味，好溏心！古早味炕肉都燜得好腍，近乎入口即溶。至於比目魚入口嫩滑，仲附上蛋黃醬可以蘸，留意比目魚製作需時，要等耐D先有得食。最難得有醬油蛋拌飯，標榜用日本無菌蛋，食得放心！ 鹽酥雞+忌廉蟹肉餅+醬燒黑豚肉+日本醬油蛋拌飯 鹽酥雞有好多件，炸得皮脆肉嫩，蟹肉餅都係預期中嘅味道，而黑豚肉亦有好香肉味，呢幾樣都唔錯！ 飲品有免費冷泡茶，我地揀左加錢特飲，我要左熱茉香幻白，好香奶味！而朋友叫凍輕芝士岩鹽奶蓋綠茶再加紅豆，個奶蓋都好幼滑。 整體覺得質素唔錯，仲見到幾多人帶狗一齊食添！

大角咀出名多嘢食，今日去咗一間幾抵食、主打越南同泰國菜嘅小店食飯。 呢度有得叫set，散叫都有好多選擇，我同朋友揀咗散叫。主食要咗馬來西亞蝦麵，麵底可以揀摻摻，味道都好有蝦味，好足料。 另外叫左一個香茅豬扒炒飯，平時炒飯冇乜肉，但佢個炒飯有勁多件豬扒，食到啖啖肉。 牛肉紙米卷好正宗，夾住牛肉、生菜、檬粉等配料，加埋酸汁好開胃。生菜包就改良到好溫和，冇乜辣味，店家另附上Tabasco，都幾特別。 飲品叫咗一杯綠豆冰，有好香甜椰汁味，加埋綠豆幾夾！ 埋單$300有找，價錢親民，性價比幾高！