生日要快樂。近來社會氣氛沉重 難得好姐妹生日 一定要對自己好一點 食餐好～ 又想飲杯野 但是又唔想食西餐 上網搜尋左一陣 Foxglove完全滿足曬所有期望～ 餐廳的裝潢好有特色 擺滿英倫風的雨傘 感覺很貴氣～ 要進入餐廳 先要考一考頭腦 破解小機關。 內裡燈光柔和 吧枱適合知己傾下計飲下野 8:00前的happy hour 大家千萬唔好錯過 中環的高級餐廳 卻平民價錢飲到特色cocktail 真是好驚喜。 Menu裡面冇mocktail list 只要同店員講你想要既口味 佢就會推介俾你。 我呢杯酸酸甜甜 以berries為主 清新醒口 非常適合飯前享用。 前菜 麻辣牛腱。川菜的味道 很醒胃。帶點麻油香 辣度適中 卻不油膩。牛腱爽口 質感不錯。再加上花生碎&芝麻 好想有碗米線撈一撈 唔好浪費左個辣汁。 陳醋燒香菇。陳醋味道很香濃 香菇帶點脆口 好juicy 完全唔似食緊菇菌。酸酸甜甜 令人胃口大開。 燉湯 松茸竹笙燉雙蓮。松茸、竹笙爽口 配搭杞子、蓮子和桃膠，水準之作。清甜又有益 讚！ 主菜 花雕粉絲蒸阿拉斯加蟹肉。色香味俱全。遠遠已經聞到花雕酒香。啖啖蟹肉 鮮甜又彈牙。 酥香惹味豆豉雞。豆豉炆雞就食得多 炸豆豉雞都是第一次試。熱辣辣 豆豉很香。雞肉比想像中香滑有肉汁 很特別的配搭呢。 素蟹粉炒蛋白。蛋白非常滑，素蟹粉幾可亂真，其實係用南瓜蓉整嘅，感覺像吃賽螃蟹一樣。 香蔥和牛炒飯。炒飯夠乾身 粒粒分明。和牛肉味香濃 每一粒飯都沾滿和牛的香氣，實在大飽口福。 甜點 一頓完美的晚飯點可以缺少甜品呢。三款一口甜品 最驚喜的莫過於黃金脆奶卷 外脆內軟 配搭上鮮奶的滑溜 美味可口。玫瑰棗皇糕 一向係我嘅糕點至愛，軟熟而且帶有濃濃的紅棗味。 Foxglove 確實是一間特色的餐廳。中西合璧卻沒有違和感。無論想品嚐一頓舒適而有高級嘅中菜 還是跟三五知己把酒談天，都係一個好地方。

雖然天氣熱到飛起，但係都阻唔同我同閨蜜堅定要打邊爐嘅決心！哈哈！已經唔係第一次去「老鍋」，不過呢間分店係第一次黎，尖沙咀站B出口一出就係，方便到爆炸！之前次次都點「美人鍋」，今次轉一轉，食「季節限定」嘅「瑤柱海皇冬瓜鍋」！未打邊爐之後飲左兩碗湯，好甜好正！湯底村料十足，除左有成「圈」冬瓜之外，仲有蝦、帶子、蟹柳、金華火腿、雞肉，再加大量瑤柱，唔怪得湯底咁甜啦！「老鍋」主打台式火鍋，台灣小食又點可以少得「鹽酥雞」呢！呢度嘅鹽酥雞炸得香脆，個炸漿唔會太厚或者太咸，雞味雖然唔算好濃但雞肉就夠嫩滑！脆鯇魚片係my favorite! 魚肉鮮甜爽滑，十個like! 鮮蝦水餃大大粒、脹卜卜，蝦肉新鮮彈牙，加上爽口嘅木耳絲，好味道！ 其他配料，好似肥牛、響鈴、手打烏冬、菜呀呢d，無論質素同份量都係正常！唔錯！ 飲品叫左杭菊露，清清地唔會太甜！大大杯都唔錯！食到臨尾先睇到原來餐廳做緊推廣，憑一張買「御茶園冷山茶王」嘅飲品嘅收據黎呢度打邊爐，除左可以參加大抽獎，頭獎係台灣雙人自由行套票之外，仲可以送一客「雪花一口牛粒」或者「極品黑毛豬梅肉」！好抵呀！真係有d衝動即刻落7仔或者超市買一樽囉！哈哈！ 整體餐廳環境舒服，空間感十足，食物質素不俗，價錢合理，可以推薦！

好耐冇打過邊爐，今日忍唔住同老公去試下新野，去左朋友介紹嘅「火鍋私房菜」，由上環站行過去大約兩分鐘，入囗喺一條巷仔入面，地點好方便，搭𨋢上4樓就到左呢間「湯煲」。 我地係平日放工大約六點半左右去，目測大約七八成滿，座位與座位之間空間都算足夠！湯底我地本來打算點椰子雞湯，不過見隔離枱椰子雞湯嘅雞件份量好多，怕食唔到其他野，所以點左「芫茜皮蛋」拼「沙爹」。湯底味道正常，食完唔覺得口渴，唔錯！火鍋醬料一大盤，餐廳特別推介呢款蟹膏蝦米醬，非常鮮味，用黎點所有配料都好食！今日冇本地手切牛，所以點左平d嘅「蘇格蘭安格斯肥牛」半份，份量比想像中多，肥牛嘅油脂分佈非常平均，肉眼已經睇得出，淥兩淥就可以食，牛味不單止非常濃郁，而且入口十分嫩滑，絕對高質素！蝦丸亦十分推介，超足料，又彈牙又鮮甜，非常正！墨魚丸食到一粒粒墨魚，亦係高質素之選！脆鯇骨腩非常新鮮，爽脆鮮甜，魚味十足一啲腥味都無，超級好食！每次打邊爐都會點餃子，我地叫左比較特別嘅「川色麻辣牛肉餃」同埋「味噌大根黑豚餃」。牛肉餃皮薄，又麻又辣，牛味濃，夠惹味！黑豚餃味道甜甜地，加上蘿蔔絲嘅爽口同黑豚肉嘅甜味，好味得黎仲好特別！ 蔬菜拼盤大大兜，款式多、份量亦足夠！ 呢間樓上火鍋店食物質素非常高，服務亦一流，侍應除左有主動推介食物之外，仲會主動斟水執枱，價錢雖然唔算平，但亦喺合理範圍，我地食左兩個鐘，絕對係滿意嘅一餐！

日式放題食過好多間，次次感受一般，唔係食物唔夠熱就係瘋狂漏單。朋友推薦一樂 平時成日爆好難book枱，咁岩又俾我地walk in攝到枱，咁一於試試啦。 食物種類乜都有。烏冬、天婦羅、串燒、蟹粥⋯連花膠都有得你食！所以岩曬我！因為我就是唔食魚生既朋友 所以平時好少食放題。 Like & share Facebook, 送生蠔或即燒帆立貝一隻。我揀左香蒜焗 雖然唔係好大隻 但勝在幾鮮甜 入味。 推介！炆花膠～ 配上花菇 回本之選。 天婦羅🍤 食左唔少 都幾大隻 炸粉唔會太厚。雞翼試左芝麻和柚子 芝麻正呀，香脆！ 炒牛柳粒 食左2碟。入味 肉質幾腍 熱辣辣 即叫即炒。 海膽茶碗蒸 蒸蛋都算滑 放題來說 質素不錯。 講真 熟食款式多到我其實試唔曬 連即叫即炒菜、意粉都有。 飲品 最欣賞有鮮榨橙汁 飲左幾杯。 如果以我淨係食熟食來說 一樂都算幾多野食 幾抵食。推介呀！

好耐冇去將軍澳，今日同阿妹走左出去行街順便搵食，心血來潮想打邊爐。將軍澳打邊爐嘅地方唔多，最後揀左呢間「彩興來來火鍋」。 職員推介黃金雞鍋做湯底，有花膠鮮淮山呢d湯料岩哂女士美顏。平時打邊爐都係原個鍋底直接上枱，呢度就「即席表演」比你睇，伙計話佢地用生鐵鍋，平時冇用嘅時候會搽d生油「養」住個鍋，到有客人黎既時候就先喺我地面前用清水沖洗鍋，再即席烹煮湯底。先放蒜頭薑片爆鍋，再落新鮮雞件，炒到雞件表面微微轉色後就放入花膠鮮淮山同埋蟲草花，再加入預先淆製嘅雞湯，用大火加蓋煮滾，伙計會留意住等到雞件全熟之後就會示意我地可以飲湯喇！湯頭又甜又濃，真材實料呢！雞肉嫩滑唔「鞋口」，花膠厚身口感亦唔欺場，不過最愛都係入哂味又夠健康嘅新鮮淮山！ 餐廳提供嘅醬料九宮格，款式亦多，不過後來發現湯底濃郁，食材唔點醬汁已經好夠味，所以呢個九宮格只屬於錦上添花的一環吧！ 打邊爐點可以缺少牛肉呢！order左一碟例牌嘅牛頸脊，油脂分佈平均，牛味濃郁之餘口感亦嫩滑，最重要係份量夠多，岩哂我地呢d牛魔王狂擦呢！ 響鈴熱辣辣兼脆口，好食！ 醬爆四寶丸都唔錯，黑松露牛肉丸嘅黑松露味好「出」好香，反而柚子墨魚丸嘅柚子味就相對淡左少少，不過整體四款手打丸嘅質素都高，食落新鮮之餘亦各有各特色同味道，唔似一般火鍋店嘅手打丸粒粒都一樣味，放湯之後已經分唔出乜嘢打乜嘢了！ 其餘蔬菜、菇菌類等正常價錢、正常質素、正常份量！ 喺將軍澳呢個連鎖餐廳食肆壟斷嘅地方，能夠試到一間有質素嘅小店火鍋，好滿足呢！有好嘢就想開心share吧！

食啲傳統式打邊爐食到悶悶地, 放假決定同朋友去試下呢間火鍋! 呢度好近油麻地地鐵站, 又係正彌敦道隔離, 答巴士都原來好方便 ~ BOOK左六點左右, 職員安排左個窗邊位俾我地, 望住個海打邊爐別有一番風味, 仲要個天未黑, 食食下可以望到黃昏靚景添! 呢度環境好舒服, 環境寬敞, 唔似其他火鍋店咁又迫又大煙 傾計都唔怕隔離檯會聽到哂~ 因為我唔食辣, 所以同朋友揀左打邊爐, 無試雞煲 原來呢度湯底都好多選擇! 調味料都係, 店員會拎埋黎俾我地慢慢揀~ 最後揀左沙嗲湯底同莞茜皮蛋湯底 沙嗲湯底一D都唔油膩~好夠味! 首先, 我一定要推薦呢個自創爆芝響鈴! 真係超級好食 ! 本身我麻麻地響鈴, 但呢個加埋芝士, 真係味道一流, 芝士味又夠濃!! 邊爐一定唔少得肥牛啦, 估唔到叫左一碟都咁大碟 ! 呢度D肥牛唔會肥到得D白色肥膏~ 都好夠肉味 !! 另外呢個四寶丸都好推介, 如果想試多D唔同既丸, 可以叫呢個~ 有哂蝦丸, 牛丸, 墨魚丸, 黑墨丸 ~ 同朋友SHARE一流, 唔會食丸食到飽哂, 又可以試齊哂咁多款 !! 蔬菜方面, 我地點左呢個菜菜籃, 如果大家一大班朋友黎食都可以叫呢個, 又係有齊哂唔同款式既菜,唔洗怕有人唔岩食, 而且比我想像中多好多 !! 仲有邊爐必點既魚皮餃, 都無令我地失望~ 呢度既職員都好主動過黎收碟, 又好禮貌 環境服務都好令人滿意~ 下次一定要再約一大班朋友再黎呢度打邊爐!

朋友生日 我間中都會揀旺角Doux~ 勝在價錢唔算太高 但食物質素好 而且甜品都做得好靚好出色。 提早左放工 仲可以欣賞埋日落 雖然係大廈中的日落 都是另一番香港味道～ 法國活藍青口香檳汁意粉～ 我本身幾鐘意食藍青口 不過試過有些餐廳 唔新鮮既 真是會腥臭 但Doux既食過一次 覺得幾有水準 今日再試 依然係幾新鮮 肉質好軟熟。香檳汁處理得好好 濃度適中 剛好每一口意粉和青口都沾上香檳汁 yummy~ 烤黑毛豬鞍配黑醋蜜糖汁～ JUICY!!!! 厚厚既豬鞍 肉質一點都唔老 肉汁豐富。黑醋蜜糖汁 幾配搭。配菜好健康 紅黃小蕃茄鮮甜多汁 仲有紫蕃薯 粟米芯 秋葵 全部焗過～ 甜品款款都吸引～ 最後揀左呃like值好高既Peach mousse! 粉紅色 女生至愛 賣相好靚～ 香桃味mousse 一切開 有流心桃味啫喱 酸酸甜甜 夏日清新之選～

一年四季都愛打邊爐既兩姐妹 之前試過銅鑼灣尚鮮 覺得幾正又抵食 今次唔過海 試下佐敦呢間～ 環境唔算大 但勝在服務貼心一流！特別一讚 用環保menu落單👍🏻 湯底必揀血池麻辣 因為家姐至愛。湯底辣得黎夠香 又唔算太油膩。另一邊廂揀秘製土鄉清湯 勝在夠清甜 煮海鮮蔬菜一流。 鱆紅魚刺身 過下口癮 彈牙甘香 幾甜。打邊爐唔嫌浪費都好好味喎 勝在鮮甜～ 牛肉拼盤～ 必食！牛柳粒 超級軟熟 煮內左都冇有怕。手切安格斯 牛味濃郁 肉質夠嫩～ 黑豚肉片都唔錯 肥瘦適中 肉質唔會太鞋～ 美國桶蠔 大大隻 肥美鮮甜 推介！ 鮮炸響鈴 正！熱辣辣 夠曬脆口 唔會太油膩 火鍋必吃～ 海鮮～ 蟶子超爽甜 彈牙冇沙。海蝦生生猛猛 又係新鮮之選。 雜菜籃～ 處理得好乾淨 大部分都新鮮 配上清湯夠曬鮮甜。 飲品 記得試青檸梳打 解渴又唔太甜！ 兩個女生 再食埋個手打烏冬 仲要一份係兩個 真是捧住個肚落樓～

落大雨既日子。心情特別煩惱。買完野 在尖沙咀諗住求其搵間野食晚餐 突然間聞到有臭豆腐味 即刻搜索 哈哈～ 原來係食臭臭鍋 二話不說 即係入去 好彩仲有最後一張枱 yay $118 一個臭臭鍋 好多款式揀～ 我揀左招牌。台灣貢丸 黑豚肉個d基本野都好正。特別的有米血糕 煙煙韌韌 幾好食。豬大腸夠曬入味又腍 臭豆腐夠臭 口感厚厚實實。正～ 配上粉絲 索曬d汁 一流。 台式麻辣鍋 另一風味。配料都花上心思。牛柏葉 鮮魷卷 麻辣餃等等。湯底好香濃 辣度適中 帶著牛油香味。今次唔係粉絲 係我打邊爐另一至愛 公仔麵。Yay 臭臭鍋配台式百香果芒果梳打。清新 唔會太甜 配臭臭鍋岩曬。 有時想打下邊爐 又唔想任食咁heavy 臭臭鍋都是唔錯既選擇。女生特別適合。

* 自創湯底。靚海鮮 * 成日聽同事講倫哥火鍋抵食又好食，今日就約埋佢帶我去食好西。 訂左位，去到唔洗等之餘仲有得坐房同埋窗口位。雖然閒日，但7點零鐘已經開始坐滿人。 一開始有開胃小食麻辣雞腳同雲耳，酸酸辣辣，幾好。 *刺身拼盆* 整體上都好新鮮，最欣賞係八爪魚，爽口彈牙又鮮甜。 * 水果沙律 * 新鮮水果配上秘製生果醋，幾特別。 主角到～～ 小辣麻辣雞煲。雖然小辣，但味道夠香辣夠濃。略嫌雞件較大，有點難咬。 食完雞煲，店員就拎左呢碗好似水晶咁靚既甜品比我地食。咁快食甜品？原來係鮮草涼粉凍，用黎"洗下條脷" , 清下口腔，再食火鍋！ 見到牆上既相已經好好奇，究竟時令水果鍋係咩玩法。 水果煲一到，見到真係有西瓜 蜜瓜 木瓜等，我覺得好得意 哈哈。估唔到佢又意外地香，個湯底好清甜。 * 牛肩脊 * 呢個部位既牛真係好好味。牛味好重，油脂既香味好濃，加上有入口即溶既感覺，我好中意！ * 海鮮拼盆 * 某d海鮮如蝦，魚，蜆等可以無限添加。另外蟶子，貴妃蚌，鮑魚等都係人頭計上一次的。最出色係蟶子，條條都好肥美多肉，好鮮甜。 *手打魚滑 * 超彈牙，手打係唔同d. 黑色既墨魚滑好特別，好味！ * 雜丸* 誠意推介白魚旦，魚味重而無腥味，彈牙，掂！ 食埋呢個北海道牛奶燕窩就完美！又滑又唔會太甜，正。 同事果然無誇張，倫哥係抵食又有質素既！可能再試～