有朋友介紹尖沙咀開咗間好正既炸雞 雖然唔記得book位，但當日星期三去到都好易搵到位坐。
座位唔算寛敞，２人位都夠放２盤嘢食既。
７月份做緊promotion，買一送一既炸雞，於是我哋就揀咗２隻味。 上菜見到份量好大，我哋２個人食唔晒，仲可以一人一盒外賣帶走添！ 但係我想講２隻味都好好食呀！ 首先啲炸雞炸得好好食，又脆但又唔厚粉。 餐廳有附上透明手套，方便用手食，貼心。 食炸雞其實應該配啤酒，不過因為朋友唔飲，唯有下次再嚟啤啤佢。 配梳打其實都好夾，非常滿足！ 1. 青陽辣椒MAYO炸雞
餐牌上呢款係有一隻辣椒仔，事實上佢個醬都係唔算好辣，少少辣味，我覺得反而仲吊起啲甜味添呀！好惹味，食到慾罷不能！ 2. CORN-SO AMAZING 炸雞
而另一款我哋揀咗粟米炸雞，炸雞上面撒咗啲糖粉（勁邪惡）！但係呢個配搭我覺得不得了，粟米配啲糖粉超好食！

有朋友生日，我哋喺觀塘一聚，就揀咗呢間餐廳。有人見佢午市好多人排隊，我哋即管試試佢
環境都寬敞，我哋四個人坐既卡位都幾大張枱。侍應們都好熱情同helpful，我哋問佢有咩好食都有介紹，而且我哋覺得全部都有喜出望外既感覺講真，我就未食過凱撒沙律係成棵菜上咁raw既，但加咗腐乳入去，又唔知點解出奇地夾架喎呢種fusion好得意然後，明明係一個墨西哥烤餅，但食落去好有東南亞風味，啲醬汁好似泰式既咁，好開胃，而且好多料，夾埋一齊又唔會覺得奇怪再嚟無論侍應同呢度啲食評都推介既慢煮黑毛豬，真係要比手指公食落去有少少似叉燒，有少少甜，肉質都好稔好嫩呢個意大利麵相比之下就冇咁出色啦，不過不失。佢哋當日有特別既cocktail，已經唔記得咗係咩嚟不過印象係幾清新既，食物印象比較深刻。然後到甜品，睇得又食得，除咗擺盤好靚之外，佢冇用到cream反而用咗吉士，我哋覺得好夾。提到因為係有朋友仔生日，預先同咗餐廳講，佢話可以幫手寫字，但冇預期佢哋會送多一小份甜品比壽星，好貼心呀，我哋又食又影，過咗一個愉快既晚上。

朋友帶去食日式居酒屋，位於尖咀諾士佛臺，氣氛不錯。
一行四人訂咗卡位，係日式要除鞋既和式座位，好有日本Feel，環境裝修都幾有心思，好有日本居酒屋既味道。周圍都被唔同既酒樽包圍。
枱面仲有個小月亮，我哋係黃光色，見到其他有啲枱係白光色，加添咗啲情調。
食物方面，其實我哋都幾滿意，CP值幾高同埋鍾意佢哋多選擇，好多唔同小食，可以同朋友慢慢傾同埋飲嘢吹水。特別想highlight介紹下 #炸吉列蠔配海膽汁 首先個醬真係冇得輸，仲要辣到佢少少微濃；然後個炸蠔勁juicy，一啖放入口真係不得了，好邪惡
其次特別推介係個甜品，有桃同菠蘿雪葩，成個上，唔會太甜，又唔會太冰，啱啱好。睇得仲食得。 然後到個刺身盛合，本身每樣３片，可以加錢至每樣４片，咁每個人都可以試到，呢個咁flexible既安排幾好熱食好似清酒蜆、牛肉鍋同雞翼都OＫ，但就冇話好特別。 不過都有嘢要彈既，就係呢個好似叫韓式小碟定乜，賣相又一般，食落都麻麻地。 overall嚟講，我哋叫咗好多嘢食，坐咗都幾耐，傾咗好耐偈，以呢個價位呢個地段呢啲質素，其實真係幾抵食！ 臨走出面仲有夾夾機，我估係因應消費金額比幾多個token你，其中一個朋友夾到優惠券！下次可以再嚟啦！

嚟咗荔枝角返工之後，第一次食呢間隱世好好運餐廳。隱世，因為佢個位置都好隱秘，要喺半島大廈再捐入去，唔係有同事帶一定搵唔到。地方唔算細，但坐無虛席，仲會有條龍等，不過都唔算等得耐，而且會同你落單先，幾乎一坐低就有得食。 $52包麵同嘢飲（凍飲都唔洗加錢），真心講，非常抵食！影呢張相無專登撩啲牛肉出嚟，但其實個碗入面係超多會食唔晒果隻。仲可以加2樣餸，我揀咗煎蛋同紅腸，兩塊紅腸厚切到司華力腸咁，真係好驚艷！ 仲要啲沙嗲牛肉超濃味，啲汁係無慳到，非常濃郁，肉質都好食，淋既唔會好多筋。同埋茶記嚟講，佢都算好乾淨企理，都好多OL嚟食，不過好似只開11am-5pm，喺附近返工既朋友仔有時間真係推介去試下！

有日收工即興同同事去搵嘢食，平時因為行去香工有啲遠，就趁晚餐時間嚟試下。 本身唔係EXO fans，純粹想食韓菜同有湯嘅，就揀咗呢度，原來地方都好大下，如果閒日冇預約佢哋好似收7/8點。 同朋友一人叫咗個晚餐火鍋，一個部隊鍋，一個壽喜燒牛肉鍋，估唔到份量好足料同事叫嘅部隊鍋有齊晒韓式公仔麵、豆腐、泡菜、魚餅、香腸、芝士，辣度適中，正值收工肚餓，我同同事都覺得非常好食我叫嘅壽喜燒牛肉鍋除咗有牛肉，仲有豆腐、冬菇、秀珍菇，同埋一啲雜菜，湯底偏甜。侍應建議先食咁啲餸，到咁上下再加湯先落烏冬同雞蛋，真係好飽肚同埋好有滿足感。第一次嚟幫趁又眼闊肚窄，叫多咗個芝士肉醬薯角，份量我覺得係超大，淨係食呢個當一餐都唔止，食完火鍋都飽到攬住個肚，呢個薯角唯有打包返屋企，不過都有食幾條，熱辣辣炸起其實幾惹味。呢度飲品匙羹係吉他仔好靚，有心思除咗前菜、飲品，跟餐仲有雪糕，見到侍應姐姐喺雪櫃拎獨立包裝既拆開再放落碗，唔知係咩牌子嚟嘅呢 晚餐時間可能係閒日真係唔多人，大家要去記得訂位哦。

已經嚟過呢度好多次，都唔係第一次寫，佢嘅甜品同main course以至小食都好出色，今次再嚟佢轉咗餐牌，但水準依然，值得繼續讚！ 轉咗餐牌好多選擇，見到人哋點果個沙律餅好正咁，於是就點咗一個Fleur Lover 同埋一個Meat Lover。 Fleur Lover ($138) - 左下 首先賣相非常之靚，色彩繽紛，淨係影相都影一輪。佢有個hot cake喺底，甜甜地，仲有忌廉、雜莓、生果、堅果、糖漿、食用花等，我覺得好似集合前菜同甜品於一身咁！hot cake有少少似pan cake嘅，配生果好夾。平時我怕油淋淋嘅忌廉，但呢度啲忌廉好OK，即使加咗芝士都唔肥膩，配埋啲nuts真係好正架，又有咬口！生果都配新鮮適時嘅，呢樣嘢雖然好正路，但好多餐廳，求其放生果，又生又酸都唔出奇。 Meat Lover （$128） 呢份簡直係是日驚喜，睇menu都唔知道，原來咁大份！要拎上手先感受到份震撼！手上嘅只係其中一件，成份係有2件架！由鹿兒島豬扒、竹炭麵包造成，配紅椰菜、青蘋果椰菜沙律、是拉差沙律醬同食用花，果件鹿兒島豬扒真係不得了！厚切到咁都咁juicy，真係外脆內軟，配烘過既竹炭麵包，女仔一口真係無辦法咬到！但係真係見到都開心笑晒，最後我放棄咗一塊麵包，盡量食晒塊豬扒，已經飽到攬住個肚豬扒真心有質素，鹿兒島嘅豬扒冇得彈啊！
仲配咗個薯蓉（$48）
其實好creamy、好滑，不過估佢唔到兩個主菜咁大份，只係食咗兩啖試下個味就完！ 最後，嚟得呢度梗係想要chill下，我點咗蘋果肉桂花茶，朋友點咗Earl Grey，兩杯都咁靚，又無限refill，坐幾耐都得啦。加上好鍾意紗廠呢度animal friendly，經常見到好多可愛貓狗周圍走，或者好似人仔咁坐喺度好奇咁望住你，真係好得意，相信我隔一陣又會再嚟！

朋友帶我去呢間食個生日lunch。鮨政有幾間分店，聽聞中環果間full晒，我哋就去上環呢間。
因為佢開12nn，我哋早咗少少等開門。入面雖然地方唔大，但好日系和風，一入就見到師傅嘅吧枱，我哋lucky坐到四人卡位，chill住慢慢歎。
估唔到雖然只係set lunch，但一啲都唔馬虎！我同朋友各點咗一個set，我要壽司set，佢要天婦羅set，其實兩個都已經非常豐富啦！ 壽司set包括：前菜沙律、湯烏冬、9件壽司、茶碗蒸。（只係$158）
天婦羅set包括：前菜沙律、湯烏冬、5件天婦羅、6件壽司、茶碗蒸。（好似都係咁上下價錢）

主要想讚下佢啲壽司，以呢個價錢嚟做都一啲唔求其，全部都好新鮮！海膽雖然未去到北海道海膽級數，但都已經好夠新鮮；吞拿魚軍艦亦都好有驚喜，加上佢wasabi醬都似係自家製，唔係支裝吱出嚟咁，刺身又唔會凍冰冰，壽司飯size適中，配合酸薑又鮮又開胃！
三文魚、劍魚等同埋我最愛嘅帶子都係above average，魷魚尤為驚喜，出面食到既都有渣，呢度就冇嘅。仲有大大塊甜蛋，好滿意！然後配佢既湯烏冬，朋友甚至覺得係佢哋自家手打添！
我最深刻印象係個茶碗蒸，因為平時我唔鍾意食呢個item，通常一大舊菇同蛋搶味，怪怪地。但呢度既茶碗蒸真係唔錯，係我食過最好嘅，佢都有冬菇，細細舊，仲有雞肉同其他配料，味道好正常，心裡面先覺得茶碗蒸可能根本就應該係咁嘅味。當晚返到屋企咁啱睇到個日本節目講解日本人食壽司配茶碗蒸係因為茶碗蒸嘅蛋係可以將壽司飯嘅糖份轉化為能量，無咁易積聚喺人體，都幾有智慧呢！
配茶唔係綠茶粉，而係有淡淡嘅煎茶香。 最後想講店嘅洗手間都好乾淨，有潔癖嘅我好滿意，服務都算有善有禮，推介比大家！

先唔講食物質素，講員工比人印象。星期四晚無咁旺，所以我到場時係第一個客，但講緊都7點3，果位員工出嚟應門唔戴口罩我有啲愕然，但到我坐低、朋友嚟到、到我哋想點菜，都一直唔戴係咩玩法？🙄  都7點半呢啲時間，又唔係落場時間，呢埋喺櫥房唔出嚟，原來煲煙，咁都得。已經有唔好嘅感覺，不過本住呢度多人話好食又黃店即管試下，但試過後，大概好多水份，甚至我估有買like 情況🤷‍♀️其實薯條好難整得唔好食，近年真係未食過唔好食既薯條，係即炸、係熱辣辣架，但無味架囉！🙄 黃金喎，啲咸蛋味呢？都唔好話咸蛋咁advance，咸味都無，問個店員攞鹽，佢可以答無，廚房可以無鹽架？魷魚圈外面有少少味椒鹽，推翻樓面話無鹽，都算，入面都係無味既😅牛舌就叫好啲，有返啲味，但都偏淡，乜串燒唔係好惹味架咩？😩 豚肉腐皮卷係ok 既，幾得意，有少少甜味，不過就唔多食到豚肉既味（可能因為太薄）呢個原條燒茄子，係大家既大熱門，都算ok，可能因為前面既失望，都只覺得呢款合格only，畢竟只要唔燒燶，比足夠既蒜都好難唔好食既至於呢個玉子燒...整得太耐，好實下，唔好食海鮮嚟講，因為我哋有咗經驗，叫啲辣既醬嚟食，就有味啦，中規中矩呢個虎蝦，好意思收$68/隻，又細隻，又唔好食，燒過晒龍，只係食到啲醬既味，我覺得唔新鮮，真係想叫回水！烚菜無咩好評，個黑豚肉反而都OK，至少唔韌先我唔食饅魚既，但朋友食咗話好食，因為就好似出面買返嚟然後拎入微波爐叮咁，收$59，你話啦諗住嚟呢度可以啤啤佢，點知連基本生啤都可以sold out，焗住飲手工啤，我同朋友都一般般，早知叫可樂算啦 我都唔想話太片面，但我哋真係有晒誠意試咗佢哋好多樣食物，但係完全唔值呢啲價錢，非常非常之咁失望，希望提到啲好似我咁以為多人話好食既就中咗去中伏啦。

Lunch at Burger Land，鎬賞一下星期六要返工既自己😏 好好好食😋👍🏻 最欣賞佢兩塊包都係烘過，乾身得嚟又唔會硬👏🏻 啲餡勁豐富，有菠蘿🍍、番茄🍅、青瓜🥒、生菜🥬、洋蔥🧅👉🏻我最愛既配搭，雖然主角豚肉有少少韌，不過juicy 得嚟個sauce 都好好味☺️ 薯條新鮮熱辣，唔會過硬過脆啱啱好😘👍🏻 不過個柚子茶就略嫌淡味水太多，比例問題

呢間Hero's Friday係荃灣新開既分店，聽聞荔枝角分店好食，於是今日喺荃灣就專誠去試一試，門面清簡整齊，右邊仲貼心有四張櫈，可以比人買咗喺度食，不過都係要用外賣紙袋，其實可以唔用紙袋，可以環保啲。暫時只收現金，堂食中途都好多街坊嚟買外賣。呢間店有首創將漢堡包用班戟取代，好新奇🤩，所以專登嚟試下，我揀咗豬柳蛋班堡，$48包埋汽水🥤同薯條🍟。 大概等咗都係十分鐘左右就出餐啦！我比滿瀉既薯條吸引，新鮮炸起真係好難唔好食，收到即刻食返幾條先！不過啲鹽就唔係灑得好勻，所以食到底愈來愈咸。 至於主菜個豬柳蛋班堡🍔，兩塊鬆軟既班戟，食落反而有少少甜甜地，芝士同豬柳就無乜特別，而個炒蛋真係唔錯，成熟度啱啱好仲有蛋漿流出，又夠晒足料，好飽肚！ 不過本人覺得配班戟有少少怪，因為蛋、芝士、豬柳都係屬於咸既，而個班戟甜甜地咁有啲漏，又咸又甜有少少奇怪，但都係個新奇既嘗試！好評絕對係比個薯條同炒蛋！ 下次會試下佢其他漢堡，見到大大份都係賣$6/70度，幾抵食！不過真心薯條漢堡真係要堂食先好食，拎返屋企始終爭啲，除非真係住好近啦！