呢一間《強記小食》係葵芳 存在左肯定都有10年以上 因為細細個係葵青區讀書 放學返屋企前 都會同一班同學拮返一串魚旦先走 今日再經過食 係非常之有童年回憶！ 黎到唔使講野 一定係整返一串陳皮魚旦！ 一串唔夠 食完再整強一串！ 我比較鍾意食辣味的。 魚旦一咬呢外皮煙煙韌韌 幾有咬口！ 食落有一種微微的甜味 跟著就到辛辣的味道出場 非常醒神 又唔會太辣 搞到冇晒味覺 魚旦咬開之後 仲有一浸陳皮的香！ 陳皮魚旦 本身唔太常見 烹調到咁出色的更加買少見少！ 正！

同朋友出完街 準備上佢屋企睇波 咁就喺樓下附近覓食 睇吓有咩好西可以JapJapJap 去朋友屋企 一定係聽地膽介紹有咩好食㗎 今次就食 《德利酸菜魚》 老實講 價錢幾親民 同時質素都唔錯 口水雞米線 一個餐有主食配個米線 口水雞 係雞髀位🍗 雞肉嫩滑 同埋個汁酸酸辣辣 好香好惹味 估唔到晚市 HK$55 可以有咁既質素！ 好食！ 麻辣豬手 底味個汁都同口水雞接近 酸酸辣辣 好香好惹味 豬手好多肉又爽口 唔似坊間有D成舊骨咁 喜出望外！ 胡麻茄子🍆 簡直係好似漆黑中嘅螢火蟲咁出色！ 餐廳用白茄子 切粒上炸粉 除左個皮，成粒茄子都上晒炸粉 外皮炸得金黃香脆 入面茄子肉多水嬌嫩 必定要推介！ 酸菜魚米線 正常發揮！ 魚肉滑身 酸酸辣辣咁 但魚肉量偏少 但都唔錯！

早幾日係網上睇到有推介 餐廳位置非常之近公司 所以喺下一個工作日中午嘅時間 就一定嚟試一試 《食口福》 餐廳除左 門面同內部設計都非常懷舊 而且落單方式都係 食客係門口落單後 有一張手寫飛 食客自行交到廚房 後等出餐 係十分懷舊的運作流程黎 今次為主要係食炸雞髀 首先炸雞髀非常大隻而且厚肉 估計都係先整熟一部份 收到訂單是再炸香外皮 雞髀外皮香脆 內裡雞肉嬌嫩 即使好好好厚肉 但最深入的肉 依然嫩滑 沒有overcook 雞髀上碟用最簡單嘅淮鹽調味 已經好出色！ 另外再落咗一個肉絲炒麵 因為我好鍾意呢種脆脆嘅炒麵 見一個要食一個 雙層肉絲銀牙係正常發揮 麵底炸得非常之脆 餐廳好細心 知道炸麵炸完之後會成舊捆綁埋一舊 特登用鉸剪喺中間剪咗幾刀 夾起嘅時候 容易分散容易夾 非常好👍🏻

今日朋友帶我去西營盤嗰度 探索一下特色嘅咖啡店 順便去 chill 一 chill 先😎 門口可以停車，都算係方便 入到咖啡室裝修 / 環境/ 音樂 都令我覺得舒服！ 朋友特登推介一杯 hashtag coffee 係呢間舖頭嘅特色咖啡 亦都得獎無數！ 咖啡係由Espresso/ 檸檬汁再加Tonic water 而成 上咖啡之前店員會再燒一燒個檸檬 令到佢檸檬香味更加突出 視覺效果上亦都唔錯！ 第一啖飲落去 口腔充滿非常之清新嘅檸檬味 有一種微酸的檸檬果 接着落嚟咖啡嘅味道就到 咖啡味唔會太濃同檸檬香非常之配合 Tonic water 亦都提供好好嘅口感 同平時坊間咖啡十分不同 非常之有特色！ 特別得來係好好飲！ 咖啡好飲環境舒服 非常適合同朋友嚟傾偈 或者拎部Notebook過嚟做嘢嘅好地方 正！

朋友知道我好鍾意食蕃茄焗豬扒飯 就趁住今日放假 特登帶我過嚟 非常之有我心，而且冇失望呀！ 好食！ 呢一個茄汁焗豬扒飯 係我食過最好食嘅三甲之一 炒飯飯底做得唔錯 炒飯炒得粒粒分明，但係唔係太油 食落個飯底有口感有蛋香！ 厚切豬扒夠厚身 醃得好好食夠味道 豬扒食落去軟嫩彈牙，唔會乾身鞋口 個茄汁都做得好好 酸甜味道拿捏得好好，而且唔會過甜過鹹 濃稠程度亦都係恰好 整體配搭係好均衡好好👍🏻 因為個平衡一做得唔好 飯太多汁太少就唔好食 豬扒太薄太鞋又唔好食 呢一個焗豬扒飯係非常之好食 一定會為佢再嚟食過 炸雞髀配金鏄多士 呢一個下午茶相比焗豬扒飯係相對失色㗎 雞髀冇乜點醃過 就點一點咖喱汁做個底味 再炸 金磚多士 唔夠花生醬 外皮唔夠蛋漿 所以炸起身唔夠脆身 麻麻哋 但係個焗豬扒飯已經超出預期 完全彌補到另一樣嘢嘅失色 整體都非常之滿意 期待下次再途經筲箕灣 一定再食個焗豬扒飯！

啱啱今日嚟到筲箕灣同朋友食嘢 朋友就介紹我去食蕃茄焗豬扒飯 咁食完之後，我介紹返佢去隔離 搵一間《印尼沙嗲屋》食沙嗲串燒 互相分享一下好西 每一次都想食下啲沙嗲豬扒飯牛扒飯咁樣 好想試吓佢個沙嗲醬配攞飯底 會係咩效果？ 但係嚟到次次都想試多幾種唔同嘅串燒 所以都冇機會試吓個飯底 因為怕太飽食唔到其他嘢 今日叫咗牛扒 / 豬頸肉/ 牛舌 輕食一下 炭燒牛舌 喺舖頭門口基本上你都見到佢 用炭火燒串燒 牛舌係充滿炭香味 牛味都好濃厚 配上佢哋沙嗲汁係好惹味！ 每次到筲箕灣都係必食推介！ 牛扒 牛扒燒到外皮係焦香脆口 食落水份並沒有流失 肉質軟嫩 牛扒係都好好食！ 豬頸肉 豬頸肉脂肪比較多 燒出嚟有一種油脂香 食落口感爽口 配搭上沙嗲惹味 係完美嘅配合！ 可以不停咁樣瘋狂吸入 正！好食！

承上一篇食評 今日係因為工作關係黎到長洲 一定要寓工作於娛樂 食完晚飯，但又未夠鐘上船 喺碼頭附近行吓行吓 飲埋杯咖啡作完美結束喇！ 店員係非常之細心 幫我落單前溫馨提示問我：有冇15分鐘呀？ 可能好多遊客都會趕船 而製作一杯咖啡 連埋享用可能都要15分鐘 所以店員落單前都會細心問定 有冇足夠時間？？ 如果有就嚟啦 費事落左單遲出菜 又要要趕船，就會心急如焚 店員細心，值得一讚！ 餐廳環境非常Chill 咖啡亦都非常之好 十分喜出望外！ 今次叫咗一杯《椰皇冰滴咖啡》 非常之好飲！ 之前飲過其他椰子類咖啡 其實係非常之高風險 因為椰皇嘅甜度 係會有唔同 再配落咖啡度 配搭得唔好就會又酸又苦 但係一杯非常之好飲 一入口就感到椰皇的香味同清甜 跟著清香嘅咖啡味就到達味蕾 椰皇同埋咖啡配合得非常好！ 強！ 如果再嚟長洲，一定會再飲！

承上一篇食評 今日係因為工作關係黎到長洲 完成工作後 就食埋晚餐先離開長洲啦 上網有推介過 呢一間餐廳 《餃子冰室》 到達餐廳時間大概5點半左右 未到6點 餐廳人流唔算多 入座後發覺餐廳 每張枱都至少有一部風扇 幾細心！因為真係有少少熱 風扇柔和風速啱啱好 非常可以幫助降溫！ 店員坐低後即刻溫馨提示 店內所有餃子都售罄，只餘3款餃子 天呀！我特登黎食 鹹蛋黃黃金餃 冇得食！ 喺剩低嗰三款餃子 我都選擇左兩款黎食 土匪餃子 《餃子冰室》的餃子唔係煎餃 係用一種半煎炸嘅手法去做 餃子皮比坊間餃子店厚少少 如果餃子皮太薄 再用半煎炸去做 出品可能會太硬 呢一種餃子皮半煎炸口都幾鬆脆 入口餡料幾多汁 有一陣陣嘅孜然味 係有少少土匪雞翼feel 成個口感同埋味道 有一種喺九龍城食緊牛肉餅嘅感覺 可以既！ 印第安餃 我未去過印第安 所以都唔知印第安係咩味 我會形容係辣味嘅餃子 外皮都係用半煎炸嘅做法，幾鬆化嘅 餡料多汁到一咬爆曬出嚟 肉汁直接射落張枱度 建議食用時，唔好太大力咬 辣味都算係惹味嘅 總體係唔同坊間嘅餃子 有新鮮感！ 竹蔗茅根甘筍沙冰 食完比較濃味嘅餃子 就叫一杯沙冰作結 平時都係食啲生果味嘅沙冰 今次見到有涼茶類別嘅沙冰 係好有驚喜！ 竹蔗茅根非常之清甜 甘筍又非常之淋 岩我口味 感覺好消暑下火解渴！ 而且我冰沙做得好棉滑 唔會話有好大顆粒的冰塊仲剩低 一大啖啜落去，個頭都冇痛既 正！

難得因工作關係要入黎長洲 一定就 寓工作於娛樂 完成工作就周圍食下好西JapJapJap ! 完成左第一站午餐 《火車頭米線》 馬不停蹄 即係稍移玉步 去拮一拮 長洲大魚蛋 雖然之前都有食過既 但去到長洲唔拮一串又好似爭咁D野咁！ 雖然長洲有好多間都有賣大魚蛋 但我覺得《甘永泰》係比較好食的 長洲大魚蛋 已經演變到有好多唔同味道 有咖喱呀 辣味呀 但我始終最鍾意食 原味！ 原味 最能食到食材本物身味道！ 原味 大魚蛋 魚蛋爽口彈牙 都有魚味既 食完口腔都有魚蛋餘香 魚蛋外表比較多油 兩粒最盡 食得仲多會感油膩

早幾日接到有工作需要入長洲 難得入長洲 決定開始前一於去長洲食個好西 食飽再開始工作 咁上網做下資料蒐集之後 中午係想試下呢一間米線《火車頭》 大約一點鐘到達長洲碼頭 落船行左幾分鐘就到 始終長洲都唔係大 中午食飯時間 餐廳入座率高達100% Full House ! 咁等左20分鐘左右入座 如果唔想等 可以用QR Code 落定單 但只限外賣！ 餐廳 主打三種湯底 有 酸辣 / 蕃茄 / 海蜆紫菜湯 三種都好想試 非常掙扎 最後都係按自己最喜愛口味 試一試 就係 酸辣！ 食物質素算係唔錯！ 酸辣味道唔算太濃烈 米線正常發揮 令人驚喜真係舊 豬軟骨！ 豬軟骨有2 大舊 非常厚肉 同時 好軟嫩 唔鞋口 脂肪同軟骨 煮到好淋 入口即融咁 條脷頂都唔使頂！ 得！ 墨魚春卷 普普通通比較多粉 蝦仔雞翼 主體係炸雞翼 再加上 櫻花蝦同芝麻醬 雞翼炸得脆 同 有汁，唔會太乾太柴 櫻花蝦仔都脆脆地 增加口感 可以的！