之前睇報道介紹全港10大蛋撻，咁啱去大埔揾朋友，就問地胆呢間蛋撻係咪咁出名，佢答係，於是一齊去食啦。 當日叫了叉燒意,太陽蛋，利賓納同蛋撻;朋友的不介紹了。 本身都中意食蛋撻，奈何近年食唔到有水準的。今次慕名而來，好開心冇失望，蛋撻熱熱的，甜度同蛋漿都係同以前香港的味道，想買多2個帶走，但凍咗係冇咁好食同當日落雨，免舟車勞頓完令外賣折騰。 叉燒意的叉燒有D凍，好在湯夠熱可以浸暖，意粉當然有茶記嘅特色，少少發脹同「林」。近年少見的利賓納都可以喺度 order, surprise 值得一讚，伙記叔叔精明地幫我呢個餐包改蛋撻，既省錢了，又唔洗食多個包

見到 restaurant week 有呢間食，見抵就預約午餐，但最後發現自己攪錯了 ，只限指定銀行信用卡，唯有原價埋單 。 平時不時行過都冇特別留意，有日同事話想同未婚妻去呢度慶生，至開始留意下，然後睇過一D訪問及介紹餐廳，終於親身感受，入門口就見到非凡的設計，打卡一流，女洗手間亦都佈置得好有心思。 坦白講，一分錢一分貨，食環境通常都唔平，而且呢度食物賣相都值呢個價，食物presentation 同餐具都好精緻，再一次推薦打卡必到。 味道呢，反而比 presentation 搶了。今次雖然比原價$298/set lunch 未加一，但可以享受到一次咁華麗嘅午餐都係很好體驗呀!

之前都有買過呢度外賣燒味，加上朋友讚過叉燒好食，見有款下午茶餐蜜糖叉燒豬仔包幾特別就入去試下啦。 今日初三下午茶時間都多人，要搭枱，但原來今日冇下午茶餐，由於一心入嚟試個包，於是散叫一客。等待送餐時人潮開始散去，我就問准後由4人枱轉到2人枱了。 食物送到，賣相似餐廳的漢堡包，有支籤拮住，件叉燒都有啲厚度。因為見D蜜糖都豐富，我又唔想食完成手蜜糖，就唯有扮下高貴用刀叉吧。 未落刀前都擔心切落去D料吱晒出嚟，但一切落包，好鬆軟，好輕鬆地去到叉燒，雖然有厚度但冇難道好快落到生菜蕃茄同底層包，反而包底要用有少少力至切開。第一次食呢個配搭，估唔到咁夾，叉燒好juicy又林(美中不足其中一口有DD筋)加上蜜糖...yummmy

一行四人，因為主人家知我愛好，所以帶我黎品嚐，好開心食到有水準嘅上海菜。 由於肚餓，先叫了蒜泥白肉同合桃花燻蛋。蒜泥白肉比較特別，是肉反卷。合桃花香脆，燻蛋亦ok。 填咗肚，有耐性等重點食物: - 生煎包保存住湯汁，襯熱食最正 - 松子魚，酸甜度恰到，廚師將魚肉開，炸後成粒狀，方便夾開。依家好少廚師會咁做，值得一讚。 之後加了脆炸雞，不是我杯茶，味道還可以。 最後出場嘅甜品薈萃都唔錯，4款精緻甜品各2粒，碟上有花作擺盤同寫了餐館名字。

同朋友去soho 揾食，突然諗起好耐冇幫襯呢間，一路依印象走，但揾唔到，終於開google map 帶路，咦，點解去咗中環？一入餐廳，冇留意是位金髮外國人，就自然用廣東話問了「你哋係咪搬咗?」哈，未得切尷尬，那位外國美女就用純正廣東話回答「係呀，搬了6-7年啦」原來真係搬了。 感覺呢度細過舊店，但光猛咗，而且喺寒冬下，人與人之間近咗，感覺暖咗。 我哋2人點了一個傳統湯 share, 磨菇，芝士牛脷，鹿肉同 mulled wine. 湯好好味，尤其中間白色的(乳酪?)。磨菇配西多原來咁好味，開眼界了。芝士牛脷又係超讚，尤其係冬天，食完唔覺「漏」，回味。鹿肉...每個地方有佢特色煮法，我比較中意呢度同煮嘅蔬菜。 mulled wine 的瓶好特別，有個睇唔到嘅孔，yea, 似花茶茶壼，但呢個瓶係冇斟位，我慢手慢腳斟時，倒瀉了一些，嘥咗美酒。 離開時才發現大堂有留言為烏克蘭打氣的牆，加上聖誕裝飾別有一番味道。

第一次去七喜，大約廿年前，就係呢間太子店，一食就愛上，幾乎去親花墟就會嚟食。其他分店都有食過，呢間最就腳。 佢嘅炸鯪魚球係必食，只係人少我改食伊麵，係呀，呢度係少有供應伊麵嘅食店，同埋玻璃樽可樂都係呢度有，要強調玻璃樽呀，個人覺得味道好多㗎! 今次早啲食晚餐，咁啱有卡位就坐啦，叫咗碗雲吞伊，一碟通菜同玻璃樽可樂。雲吞有5粒，皮薄又熟透(有比較就知呢度好)，蝦又爽彈，豬肉份量又啱啱好。未嚟前諗緊油菜叫通菜，佢會跟咩油，哈，原來跟腐孔上，又啱喎!]

食家朋友介紹過幾次呢度，一直等待時機嚟品嚐。襯住有親友又係中意飲飲食食，一於約嚟呢度試下。 未嚟前有睇過 openrice 食評，食傳統嘢咁啦。因為太忙忘記咗訂位，等了半個鐘至有枱。 點了食家朋友推薦嘅雞油蒸原條馬友，真係好，賣相好，魚夠鮮。 餐牌上有好幾款功夫菜，考廚師手藝，例如魚腸，不過我唔識欣賞，所以叫了另一款「藕餅」，咸味ok，食完唔洗猛飲茶/水。 嗰晚有幸，餐館送甜品「白糖糕」，又係考功夫，好食嘅係冇酸味，呢度做到。

見openrice 好多人讚，但咁多年都冇機會嚟用餐，終於最近約朋友飯聚就揀呢度啦。 由於冇留心地址，去了 gateway 嗰邊，大汗叠細汗咁趕住到。我哋被安排坐玻璃窗旁，由於有靚景，心情好快就平伏。 叫了salad, pasta 同 rice 大家 shared, 食物 presentation同味道都ok，cocktails 都可以， service 幾好。呢度最欣賞嘅係個景，我哋好好彩見到好靚嘅sunset。 相信同伴侶嚟會 romantic D. 唯一美中不足係平日分2輪，據說假日有時分3輪。

朋友推薦呢間老自號西餐廳，於是嚟試下佢嘅扒餐。第一次嚟，一入內，佢嘅環境同細細個去嘅西餐廳(好多執了，真係越嚟越少)已經好似，侍應都係白恤衫，好整齊。 我哋點了牛扒同牛柳餐各一， medium ，紅/白湯各一 我嘅紅湯好正，同細個食嘅西餐廳一樣味道；佢嘅餐包同牛油又係好鬆軟。扒呢，依家冇咗當面淋汁囉，冇咗嗰種「炸炸」聲同D煙升上嚟，唔洗用餐巾遮住D汁彈落衫褲，不過味道同質素都係做到細個食嘅，尤其中意佢嘅薯條，超正! 餐飲我哋叫了普通熱飲。但佢嘅甜品又係經典，青檸啫喱上淋滿花奶，啫喱而內有乾坤，有菠蘿粒，呢個係坊間少有喇，不過啫喱實咗D，如果落多少少水軟D好味D(純粹個人意見)。 btw, 呢度嘅客人可能是街坊多，侍應們都親切同客人交談，感覺親切。

同朋友補祝生日，佢中意少肉，於是選食素吧。當晚係平日，不太多人，但我仍是訂定位好D。 呢度嘅湯，真材實料又健康，而且比佢menu 內的糖水仲平，真心推! 芋頭魚就炸皮厚咗D，唔夠鬆化，有待改善。 猴頭菇咕嚕肉，色彩100分，味道ok。 欖菜蒸豆腐，清咗D，個人覺得加D麻油好味D。 我哋一致覺得除咗湯，上海粗炒就最好，雖然油多咗D。 茶嘅選擇亦好正，有少有嘅菊花，所以我哋不停添飲 服務中規中距，環境亦舒適，餐館內有洗手間