佢一開張無耐我就去試了，門面整到好似好地道泰國船河咁....點知，中！大！伏！ 我都好耐未試過食一間野覺得咁伏，極懷疑呢度老闆/大廚有無去泰國食過真既船河，自己食下自己d出品都知極難食！！ 我叫左豬肉丸金邊粉同魚餅 魚餅就係一般炸野，無乜特別 個金邊粉....實在太失望！ 湯底: 無味，唔知係搵水開d咩出黎，點解有顏色但無味！我之後落魚露都食唔到落去， 粉: 大家睇圖，又碎又淋，完全無彈性，湯底又無味，好似食放左好耐既白烚粉，好核突！ 豬肉丸: 成碗野有dd味既唯一item, 都係交黎既貨，無咩好講 唉，門面sell船河sell到咁行，招牌菜都做得咁差，一定唔會再食！

石門食西餐無乜選擇，好多都係茶餐廳野包裝過就當西餐賣... 呢間以前食過burger其實係幾好食的！今日想食炒意粉，叫左個豚肉野菜炒意粉外賣 賣相算ok, 意粉口感非常好，彈牙又唔會痴住一舊舊味道都幾香，肉片比較多，但所謂野菜大部份都係蘿蔔絲 食食下見到個底全部都係油....d油多到浸住底層d意粉....到最後我傾斜個盒，想泌左d油(下圖)，淨係食面果浸，但都係要放棄.... 有無必要落咁多油呢....下次都係食burger算了

見到好多食評話好食，我就去試下...中晒伏 呢度侍應態度非常好，好有禮貌，又有笑容  坐低就叫左半份味噌拉麵加餃子 餃子黎先，無影到，因為似係買番黎既雪藏餃子，好普通 上拉麵，上面油脂比較多，我expect佢湯底應該好香，點知....真係好普通，有鹹味，有少少味噌味，that's it....已經諗唔到仲有咩味黎形容 大家見到張相喇，非常多芽菜，叉燒薄薄一片，筍就係粗條。麵質感都幾好，浸耐左唔會淋晒。但叉燒就係普通灼豬肉片既味，個筍簡直不知所謂，好似浸左好耐，無晒味又多渣 以一句去形容，就係普通food court拉麵質素....係唔係唔應該叫味噌味？究竟其他人食左d咩覺得咁好食呢....

終於有粥舖，病左唔駛行咁遠先有粥食! 今日外賣, 肉丸鯪魚球粥，見佢係門口不停話油炸鬼自己炸，本身自小就好鐘意食油炸鬼，就試一試! 點知....油炸鬼($15) 好貴.....油到不得了，差不多滴出來，特登影特寫俾大家睇下。有其中一邊入晒油，根本食唔到。我用左半盒tissue索油先食到果少少，決定放棄！好心瀝瀝油先俾人啦，仲係門口不停sell =3= 希望大家唔好中伏。 今次無食到佢話攞獎既燒鵝飯，下次會試埋先決定再唔再幫襯....

行開旺角search下附近有咩可以快食就搵到佢了！門口有少量人等位 叫左個魚介豚骨拉麵(佢建議第一次食既人揀呢款，但其實燒蝦拉麵最多人叫) 個湯底都幾濃，大家睇個色水就知喇我個人prefer鹹少少湯底，所以下次會揀"大量"醬汁 麵係粗麵，食到最後唔會淋晒而且有得叫量少/普通/加底。我叫左普通，食食下發覺真係幾多，我都算食量較多既女仔，所以建議一般食量既女仔揀150g就夠了 配菜原來可以替換的，不過我叫完先知 塊叉燒做得唔錯，煮得幾淋，唔會好似出面有d乾到似柴皮！ 半熟蛋都俾一般既好味，流心黃 唯獨塊紫菜點解整咁細塊呢.... 整體唔錯，會再黎試，下次一定試下燒海蝦味拉麵，因為我見到最多人叫！ P.S. 有個女侍應成日自high用極高音係店入面講日文，仲要唱埋日文歌....講番中文既時候把聲會變番正常我明白佢想營造出日本氣氛，但食麵全程覺得佢極度annoying....

呢間小店之前上過雜誌，上黎openrice睇全部係笑笑食評就即刻book黎試下  呢度omakase可以按自己budget定個價，師傅就按budget預先訂好食材，最低$180都有得食！最多人揀$600，我地就跟啦，師傅前一日仲好有心打黎問我地鐘意食咩唔食咩，實在太好了，因為我老公極多野唔食   對食物質素同師傅態度都好impressed!  一般omakase絕大部分都係食生野，呢度師傅製造好多驚喜。
前菜有四款，都好食，仲有好少食到既鮟鱇魚肝
刺身感覺好新鮮，因為我同我老公各有唔鐘意食既野，師傅都分別準備唔同剌身
熟食既蟹膏多士同slow cooked 牛肋骨真係好好味！師傅話牛肋骨用焗爐slow cook左6-7個鐘  焗都可以唔dry，D肉同筋都煮得好淋，好好食。 刺身同壽司都有我至愛既秋刀魚。左口魚壽司係打孖兩塊魚 仲有好多其他野食，都唔記得影相，總之食得好開心 呢間小店既老闆同師傅都好friendly，周不時走出黎同食客傾下計，感覺輕鬆好多。大家黎之前記得book位，同師傅傾下鐘意食咩，好flexible的

每次入登龍街食拉麵都只會去豚王，今日想去試下其他...

黎到呢間金田家！開頭struggle左一陣好唔好入去因為入面無乜人…
我就試下最基本既豬骨拉麵。以往試新拉麵店最怕個湯又淡口又稀。但係！呢個湯偏杰，好濃，好香豬骨味，唔會太咸，但唔會有一片油係面，細心睇其實D油份suspend係湯中，唔錯! 
都係幼麵，我其實叫左”普通”，但係煮得稍為硬左D
叉燒我幾欣賞，有4塊，以呢類日本拉麵黎講算多喇。而且油脂均勻，所以較淋身，唔會好似其他果D一邊肥膏一邊肉，仲要韌到柴皮咁@@

整體唔錯! 如果我既豚王排長龍又多個選擇喇!

一直係openrice見到佢成日上榜,見下午茶時間無乜人就排下。都排左廿分鐘...

個環境都好open，坐得密集，不過都可以接受既

叫左以下幾款:
Oreo milkshake
又話係signature，真係有少少失望。一入口覺得好稀，無出面milkshake 既creamy口感，只係好重忌廉味，唔係好飲到oreo，只係有好輕微好輕微既朱古力味，唔係好甜。飲到底有幾塊好大塊無攪碎既oreo，專登架? 炸薯條
建議想叫炸薯條既朋友們考慮叫雞翼。都係口痕先叫黎食下。左邊果個唔係好食得出咩醬，少少甜甜地。右邊就係加左tabasco既茄汁Banana Waffle
主角黎啦~~ 窩芙~~
上面有焦糖香蕉同朱古力雪糕，旁邊放左糖漿同拖肥醬。塊窩芙整得岩岩好，唔會太燶，外面都好脆，不過味道就普通，只有麵粉味，無蛋香。條蕉上面既焦糖凝固左，脆脆地無苦味。最好味都係個拖肥醬。食物質素都OK既，不過款式真係好普通，無乜創意，是但自己係屋企都整到。應該唔會再去排喇。

上次睇雜誌見到呢間幾得意，去開旺角就試下。去到已經好多人等緊，要買飛等半個鐘。

等左大半個鐘後終於有喇！

個外形真係幾趣緻。上面係frozen yogurt，加朱古力同脆麥片。仲有一串沾左朱古力既提子。下面就係吉士餡既鯛魚燒。

拎上手熱剌剌，即刻食左上面既yogurt先！咦...係有yogurt味但係一d都唔creamy，似食沙冰多d...
由於塊鯛魚燒都幾熱，上面yogurt好快溶晒，噁心既情況由此開始...

D 溶左既yogurt係條魚個口度啷下啷下，d暖暖地既yogurt水核突到我唔想飲左佢...就係咁，個口位浸到發脹，超噁心！我唯有remove個魚頭食下面既鯛魚燒。點知又中伏...完全無味，只食到好重既生麵粉味，同見到一舊未熟既麵粉...d餡係半溶喱狀既吉士，吉士只係微甜，無蛋香無奶味...真係食唔到落去...忍心掉左...

同friend book 左restaurant week，成日都聽人地講呢間，今次第一次試  

呢度既waiter同經理好friendly，我地叫完野，話想知道下佢平時個menu，個經理好有耐性逐樣同我地講，仲教我地兩個女仔點食先最抵。講真，今時今日呢類親民既服務好少見喇，俾個讚佢

Appetizer
Cup of GumboNew Orleans 野，本身已經好鐘意。呢個gumbo比較辣，都幾豐富，有蝦、腸、okra等等。香料味可以多少少，落多些少飯仲好食。

Crispy pork belly呢個好好味! 四四方方既豬腩肉，香脆既外層充滿辣辣地既香料，內裡既豬腩肉少肥膏唔油膩，配埋佢地既barbecue sauce，除左個邊位有D肉炸得硬左少少之外，整體真係幾欣賞。份量亦比想像中多，如果一個女仔可以當main喇...

Main course
Stuffed Blackened Catfish煎釀鯰魚。本身鯰魚係無乜味既魚，亦都係加左香料煎香。塊魚下面其實有蟹肉，有D似煎魚+crab cake。味道配得唔錯

Beef Roulade煎牛柳配雜菌火腿汁，旁邊果個係整粒燒蒜頭。對塊牛有少少失望，生熟度OK煎到medium，唔知係咪我切到果個位，我果塊好多筋，亦唔香牛味，食到少少發脾氣。反而D雜菌幾好食。

Dessert
雖然已經食到好飽，但係對甜品滿懷希望。

Key Lime Pie將兩塊青檸批疊起，個批底好好食，加左椰絲，好鬆化唔會死實實。D餡青檸味好開胃，即刻無咁滯

White Chocolate Bread Pudding徹底地失望，我同朋友都係食左一啖已經放棄。舊野唔凍唔熱，又甜又實。

另外一人叫左杯酒，所以每人$550

整體覺得一般，但原來佢平時係all-you-can-eat，或者會再黎試下佢個ribs