平日路過好鍾意去光榮食下午茶，有時索性買定做early dinner，抵食夾大件。 想食得飽嘅話，個人推介蔥油鴛鴦扒飯，蔥油撈飯好好味，雞扒同豬扒都煎得外脆內嫩，茶餐廳來說無得輸。（餐$44） 另外食過茄汁雞/豬扒飯，味道不錯，若果有返一兩舊蕃茄而唔係得茄汁就更加好。炒貴刁都ok，但感覺就無飯咁抵食。 唔想食飯麪，可以食佢嘅炸嘢，吉列豬扒同吉列魚柳都超正！可以配沙律/薯角/西多士。唔想太肥的話，推介配沙律，我最欣賞佢個沙律有唔同食材，例如青瓜、椰果、蘋果之類，有唔同口感，而唔係好似啲連鎖快餐店整一pat爛蓉蓉嘅沙律就算。（餐$35） 值得一讚係凍飲仲唔駛加錢𠻹！（外賣就每個餐加$2）

去到moko新世紀覺得無咩價錢親民嘅嘢食，而且好多都係連鎖店，無乜選擇，於是朋友介紹我去food court試呢間小店。 呢間小店主打丼飯，款式唔算好多，但係都揀到下嘅。因為無乜胃口，所以揀咗唯一嘅素食，就係野菜天婦羅飯。希望將來會有多一兩款素食就好啦。 天婦羅炸得夠香脆，有唔同蔬菜，食落唔會太寡淡，有唔同口感。餸同飯嘅份量都幾多，跟餐配多一碗味噌湯，女仔一定夠飽。 整體來說，水準不過不失。晚餐時段$59，以旺區嚟講算係咁。

此店開業了一段日子，但見openrice上的評語頗為參差，所以我雖有興趣，卻一直沒敢嘗試。 直到這幾天見某外賣app有優惠，自取有八折再另減$25，即二人餐只需$78左右，好抵食，所以就初次幫襯。 二人餐有拌麪、半隻雞、自選五款配菜。配菜我選了雞腳筋、木耳絲、秋葵、菠蘿、皮蛋，醬料則是原味微辣。麪底分量比預計少，但餸量頗多，女仔一定夠飽，男仔就可能爭少少。 雞肉夠滑，配菜能帶出不同口感，其中木耳好夾，雞腳筋有特色又好味，菠蘿酸酸甜甜，配重口味嘅拌麪啱哂！醬料雖然揀咗微辣但都真係幾辣下，味道幾重，不過食得過癮。下次會再幫襯，想試埋個阿土醬。

三個人閒日去吃晚飯，經openrice訂位有優惠，二人套餐可享半價，另外再叫咗幾份炸物/燒物。 二人餐包括蒜蓉包、沙律、餐湯、自選意粉、自選主菜、甜品、餐飲。沙律同餐湯都好好味，菜夠新鮮，甘荀湯帶少少薑味，好清新。意粉三選一，我哋揀咗藍青口扁意粉，意粉煮得剛剛好，味道唔錯，青口分量幾多。主菜揀咗西班牙黑毛豚肩扒配薯條，豬扒燒得剛剛好，仲好juicy，肥瘦適中，而且有三大塊。甜品拼盤正常，稍為例牌咗啲，無其他食物咁驚喜。呢個餐原價約$600，半價只要$300（照原價加一），十分抵食！ 我哋另外散叫咗炸物/燒物：最為推介燒有機茄子，又大條又惹味。炸竹筴魚幾特別，外脆內嫩，我嫌稍乾但朋友好鍾意。燒雞軟骨就令人有啲失望，$28得兩串好細串，呢個下次可以skip。 餐廳環境唔錯，唔會太迫太嘈，適合朋友聚會。店員服務好周到，好有禮貌，會主動斟水、收碟、上甜品，因為我哋三個人叫二人餐，佢哋有主動畀多個碗我哋分湯，甜品仲上多咗一set，好貼心！

閒日中午路過，見到唔多人，所以即刻去試下呢間深水埗名店。 見到店面有好多傳統特色糕點，我一眼就睇中咗呢盒芝麻卷拼馬蹄卷，兩者都係我嘅最愛，而且只賣$12，相當抵食。 一直喜歡吃黑芝麻甜品，因為黑芝麻可以滋養頭髮、皮膚，仲有抗氧化、補鈣功用。生隆嘅芝麻卷有香濃嘅芝麻味，口感軟糯。 馬蹄據說清熱生津，都係有益食物。呢個馬蹄卷味道清甜，又有馬蹄碎增加口感，作為飯後甜品實在剛剛好，唔會令人有太飽制嘅感覺。 下次希望可以試埋佢嘅白糖糕同埋燒餅

幾間分店對我嚟講都唔太就腳，見到店方提供跨區團購送餐，於是就試下網上訂購，過程十分順利。 不過呢排唔想食太多肉，所以無叫招牌海南雞，而揀咗金不換肉碎茄子同埋冬蔭公海鮮。 金不換肉碎茄子比預期出色，十分惹味，送飯一流，而且分量幾夠。冬蔭公海鮮味道幾特別，酸酸辣辣咁，有沙白、鮮魷、青椒，同湯底好夾，美中不足係十隻沙白入面有三隻無開口⋯ 小菜跟埋油飯，個飯香得嚟又未至於太油，飯量都幾足，埋單$120。下次會再幫襯，希望試埋個海南雞。

尖沙咀好幾間良心小店都要12/12:30先開門，於是11:30左右我第一次幫襯咗光榮冰室。 剛好錯過咗早餐，唯有叫午餐，揀咗openrice好多人讚嘅叉燒炒蛋飯&蔥油雞扒飯，一上枱真係嚇一嚇，因為好大碟，細食嘅女仔記得要叫少飯！ 叉燒炒蛋飯嘅蛋炒得好滑，又有蛋味，叉燒睇落好似麻麻（我平時鍾意食燶邊肥叉），但食落又唔錯喎，比好多茶餐廳/冰室/連鎖快餐店嘅叉燒好食。 試食咗幾啖朋友嘅蔥油雞扒飯，個蔥油真係好好撈飯，好好味，不過應該比較適合喜歡重口味嘅朋友。 另外跟咗兩杯凍咖啡，凍飲好似唔駛加錢，但稍為多奶咗啲，正常水準。 埋單只係$96，以咁嘅質素同份量嚟講，絕對係超值！

閒日1pm左右經過，見唔駛等位，午餐價錢又相宜，於是就初次幫襯。 原本想叫嘅三文魚腩飯已經賣哂，於是改叫雜錦魚生飯（已經係最後一客）。 午餐跟一碗麵豉湯，湯入面有幾隻蜆肉，相當有誠意。 魚生飯上桌，比預計的豐盛，有牡丹蝦、三文魚、北寄貝、吞拿魚蓉、雞蛋燒、芥末八爪魚、魷魚、蟹柳。 牡丹蝦夠大隻夠甜美，三文魚又肥又厚，芥末八爪魚雖然唔係咩貴價嘢，但係我不嬲都鍾意食，雞蛋燒頗有驚喜，有一種微焦嘅味道。 若要吹毛求疵，就係我個人向來唔鍾意食假蟹柳，唔知下次可唔可以走蟹柳換多片蛋呢？ 整體分量幾夠，男士應該都夠飽。環境係街坊小店，算乾淨企理，服務唔錯。埋單$70唔駛加一，性價比高。

幫襯過好幾次，每次都無令人失望。 熱狗： 士林原味熱狗最為經典，又夠惹味。不過我最鍾意田園風味熱狗，配料有蕃茄、洋蔥、青瓜、千島醬、蛋黃醬，配搭特別，口味清新。芝味熱狗就好重芝士，好味嘅，但口感無咁豐富。屋企人鍾意食德國菜，所以酸菜熱狗就最啱佢。 小食： 薯條正常質素，洋蔥圈相對失色，唔係必叫。烤菠蘿就超正，酸酸甜甜又多汁，食完熱狗咬返一口就最為滿足。 太安樓有時都多人等外賣，入面環境又麻麻，所以我通常早十分鐘經openrice落咗單先，咁去到就唔駛等咁耐。

以前一直嫌太長龍，後來疫情關係少去尖沙咀，早幾日先終於有機會試到，趁住午飯peak hour前去到，仲唔駛等位。 兩個人去食，叫咗一個水門雞飯餐，一個豬手飯餐。一上枱以為分量唔多，但食落其實好足夠，飲埋湯和餐飲簡直係頂肚，男人都夠飽。 水門雞好嫩滑，點埋個惹味醬汁真係餸飯一流，果然名不虛傳。豬手又腍又滑，骨膠原滿滿，亦係食唔停口。跟餐嘅湯就稍為鹹咗少少，泰式奶茶甜甜哋夠正宗。 服務意料之外的好，一坐低就有店員主動放多張椅畀我放袋。見到客人周圍望又會即刻問有咩需要幫忙，抵讚！