午市諗住試下，開頭入去畀個普通menu 我，問佢先話有午餐。午餐得四款一律$98中環價錢我覺得對屯門客嚟講有點貴。老實講食物是不錯的，環境亦很舒服好似去咗外國咁，如果想吃高級西餐可以考慮。不過一個沙律午餐要百幾蚊埋單值唔值自己諗。

在日本，食蛋包飯的專門店很易見到，但在香港比較少有。
上次無意中見到屯門有一間新開的蛋包飯專門店，於是就同老公去試。

間嘢可能新，平日六點去到好似冇咩人，點知食吓食吓就滿坐仲要見到門口有人等位，真誇張！
原來係有原因嘅...因為食物不錯又唔係好貴，原來間嘢冇加一...日本嘢真係好少有喎...
一個蛋包飯六十幾蚊...都算合理啦！加錢仲可以要埋湯、沙律同飲品。
因為我唔想食太貴所以淨係加了一個忌廉湯。呢種忌廉湯在日本的餐廳很常見呢！

我叫咗個吉列豬扒燒汁蛋包飯， 個蛋好滑又好多，仲多過啲飯呀！個豬扒唔錯，脆卜卜...不過唔知係唔係啲蛋太多牛油，
食完有幾漏的感覺。

老公叫咗個香蔥雞扒蛋包飯(內有香草飯)，本來有芝士汁架...不過我老公唔食芝士所以走咗...好彩可以走芝士汁，佢先有啖好食咋！

叫咗個小食 - 盛八腐皮糖心蛋，點知十分失望呀！因為點咗豉油都淡而無味...唔好食囉！

甜品係日本紫薯薰衣草雪榚夾餅 - 薰衣草味好濃，最like個黃豆餅湯圓...正呀！難得嘅係連啲蕃薯蓉都好薰衣草味...真係太驚喜！令一向不太喜愛薰衣草的我也對它改觀呢！

餐廳的裝修也不俗，坐得亦幾舒服。以後屯門又多一個食好嘢啲地方喇！

整體上來說呢間店都唔錯，有機會再去食...呵呵~~

本來想叫外賣點知要等兩個鐘就堂食。好彩唔駛等位！

叫了一個堂食的四至五人餐，埋單都係$188，平過外賣呀！

味道方面：香草烤雞Pizza - 焗得好香又脆，等咗十幾分鐘就有得食唔算耐。
食得出加料芝士(I love it!)，第一次食有加蛋的Pizza...好味！

栗米忌廉湯 - 基本上係普通過普遍的湯...罐頭湯可能仲好味啲啦！
好稀...不過係唔想飲氣水的唯一選擇。白里香燒豬排骨 - 薯角夠脆但頗鹹，豬排骨燒得夠香又淋又入味，好香香草味，加埋個醬好好食。
可以畀十個得佢呀！

夏威夷豬柳焗飯 - 個汁無論係顏色或者個味道都非常之怪，豬柳多，啲飯唔好食，又硬又軟好似熟唔透。
難食到我都忘記了影相...炸雞 - 一共有5件，最後一件要三催四請先來，要臨走前兩分鐘先有。
成日話未炸起...唔通得一個炸爐炸雞最多炸四件？
其實味道都唔錯，雞肉滑又夠大件...

要食平嘢就要在服務方面取捨一下啦！一分錢一分服務啊！

星期日在烈日高溫之下行過呢間咖啡店，見到新出了三款口味的星冰樂，於是就買杯飲吓消暑。

本來想買士多啤梨豆奶味不過飲開都係對咖啡類的飲品比較有信心啲。

舊年「領教」過不倫不類的星冰樂奶茶啦！Bad experience!!!

個名係「朱古力咖啡脫脂奶星冰樂」，一問之下原來係冇咖啡成分的！

不過店員話如果我想要都可以幫我加，我一向不太好咖啡，不加亦可。

是不是用脫脂奶造真係飲唔出啦！個名給人家感覺上好似冇咁肥...

其實只係朱古力糖水冰，講真真係飲唔到有咖啡味，不如直接啲叫朱古力仲好。

一啲都唔似Mocha...

三十幾蚊飲杯有cream的糖水...下次都係去台式奶茶店買杯奶茶好過啦！

唯一可以讚的是

啲冰好襟溶，一路去到油麻地的學校仲有得飲...

呢間大排檔在熟食中心差不多是獨市生意，大件夾抵食，所以未夠七點已經差唔多坐滿，真係好誇張！

係唔係真係咁好食呢？今次去有點失望...白飯魚煎蛋($38) - 好大碟，煎得幾香口，白飯魚都好大條但唔算多，仲好油膩。椒鹽鮮魷($50) - 都係勁大碟，色水好似炸得唔夠透同乾身，食落唔算好脆...麻麻地...唔算好食。金銀蛋莧菜($32) - 超大「盆」，皮蛋比鹹蛋多，加了冬菜十分香。莧菜多到好似食極都有...食大排檔其實係食風味，呢度風味係有，不過水準時好時壞。
環境方面，有冷氣唔駛熱住食，雖然地方唔係好乾淨因為價錢平又大碟，間唔中食吓都幾好。

星期六中午十二點幾去唔駛等位，可能是心理影響，真係少咗好多人食。

上次夜晚去最少要等成粒鐘啦！這是奶奶的生日飯，老公一如既住必食火炙三文魚壽司。

仲叫咗好多round，只可惜燒得唔夠香，大失水準。

第一次試三文魚骨腩同魚頭，燒得好香，鍾意食三文魚的不容錯過。個芒果壽司卷幾得意，芒果同壽司好夾。秋刀魚用來做壽司有點像鰻魚呢！不過沒有鰻魚那麼甘香。

好可惜金目鯛賣晒...

其他的壽司還算新鮮，其實所有食品都標名產地，大家都可以安心食用。

有幸再次參加Openice舉辦的試食會，多謝主辦單位和名苑酒家畀機會我嚐試新派的名貴粵菜。老實講，真的很新派，很新鮮...某些菜式好fusion。原材料來自世界各地，食完好似味覺環遊世界一周！打頭陣的是「清宮明火雞煲翅」，未上檯已經聞到雞湯的香濃，聽說是用了大量的雞和雞腳煲餚成，含有豐富的膠質。可見湯面有一層膜，實在是所言非虛。
入口鮮甜味濃，配合爽口彈牙的翅，實在是完美的配搭。接著是「加拿大冰海皇帝貝」，很欣賞雕花裝飾，很精美，單看已經是賞心樂事。皇帝貝夠份量，只可惜有點老，有少許嚡口。燒汁口味很重，如果可以淡少少就完美。紫椰菜造的「貝殼」也很有特色。從加拿大去到歐洲的意大利，來個「意大利砵酒珍寶蠔」，呢味係我喜愛的菜式之一。鮮味的珍寶蠔，配合一個類似豆板醬的汁料。外脆內軟，十分滋味。脆口來自生菜和脆皮，是兩種不同層次的「脆味」。生菜令蠔沒有油炸的油膩，而辣汁帶出了蠔的鮮嫩可口。Perfect Match!好...到南半球的澳洲鮑魚登場！蠔皇扣三頭鮑魚(伴玉掌)
鮑魚炆了六日六夜，很入味。但不夠糖心。
三頭鮑比雞蛋還要大，其中有隻特頭鮑再大幾個碼。
可惜我答不中問題，沒法品嚐如此巨型的特頭鮑！
原來最靚的乾鮑產地除了日本的岩手縣，還有中東啊！真是孤陋寡聞...
吃完濃味的鮑魚要喝一口楊桃檸檬汁清清味蕾...很好喝呢！真想再來一杯...不要讓它停下來吧！澳洲還有大虎蝦等著我呢！
頭抽生煎澳洲大老虎蝦，肉很爽口也很甜，味道也不錯。如果有辣椒醬點食更好啦！殼已炸得很脆口，吃下去也沒問題。
還要讚一下麥芽糖裝飾，簡直是食得的藝術品啊！好了！遊完澳洲要去沙巴游游水...唔係...係同東星游玩遊戲，乾坤沙巴海東星斑出場。呢味菜是一味兩食，有碧綠炒球和淮香頭腩兩種不同食法。其中我比較欣賞香脆的淮香頭腩。聽經理講是為了迎合不同客人的口味，特別是外國人，因為他們比較接受炸的美食。遊完咁多地方，也要來到中國的海南，來試試海南最出名的海南雞。黃金脆皮雞，皮脆肉嫩，肉質雖滑而不霉，但雞味不夠濃。難得炸得不油...忍不住吃了幾塊呢！輪到本地菜喇！金柱鮮竹泡菜苗，鮮竹充滿豆香味，加埋菜苗(皇帝菜)，很舒服的感覺，吃了那麼道濃味的菜式，來一個清淡一點的讓味蕾休息一下。到了今晚唯一的主食 – 生拆龍蝦肉泡西施飯。把用龍蝦殼煮成的濃湯造成泡飯，食之前再加入炸過的飯。本以為會很油膩，點知食落覺得很清爽，脆脆的飯和白飯的比例是一比三，第一次食脆脆的泡飯，估不到飯也可有如此新意。事實上日本也有類似的東西，就是天婦羅碎(忘了日文叫什麼)加入麵食等有湯的東西。龍蝦肉很多，泡飯的湯絕不比之前食翅的雞湯遜色，很鮮甜。

來到甜品時間，一共有四款甜品。奇怪都是一般酒樓會吃到的中式甜品。表面上創意欠逢，其實要食過先知玄機。首先來個名苑的主打甜品「養顏蛋白杏仁茶」。杏仁茶是即磨即賣的，很香杏仁味，蛋白夠滑。十分出色的甜品，難怪成為名苑的招牌甜品。我也是第一次吃到咁好味的杏仁茶，超正啊！燕窩流沙大壽桃，很少見那麼大的壽包。內裡充滿著香滑的奶皇，還有名貴的燕窩，很想立即買幾個和媽媽分享呢！老人家吃到此壽包一定笑逐顏開吧！
雖然燕窩不算多，但奶皇加燕窩也是不錯的配對！鮮製呂宋香芒布甸 – 本來是用北海道3.6牛乳，因為怕我們擔心而改用了荷蘭牛奶。香濃程度稍遜但也一樣滑。芒果很甜，用的甜品杯也很特別呢！

最後是宮廷貴妃榚 – 賣相很吸引，晶瑩剔透的桂花榚加上層層的椰汁榚。有雙重味道，可是椰汁味有點喧賓奪主，蓋過了桂花的清香味。要扣點分！

酒樓很窩心，還為我們準備了生果盆。可惜太飽了我也吃不下啦！

啊！很感謝名苑為我帶來了一趟美食之旅，吃完很滿足呀！有人講笑的話，究竟我們是不是在吃中菜，用刀叉的時候比用筷子還多呢！

好少會因為想食某啲嘢要等位，呢間係有啲例外。食過兩次都要等大半個鐘，到底值唔值就真係見仁見智喇！

必食之選一「古法馬拉榚」點至算係古法我唔係好知，不過呢個馬拉榚真係得架！好香好鬆軟，甜度又啱啱好。

我每次來都會叫，不過由於太大件，次次都飽到要打包拎走啦！

必食之選二「棉花雞」鍾意食味道好魚肚又多又大舊唔係濕濕碎碎，雞又好味又滑。Very Good!

可以一叫之選「奶皇包」普通啦！啲奶皇唔特別甘香，又沒有勁流沙，得兩個太少喇！

必飲「老火湯」好足料的花生眉豆響螺雞腳湯，響螺不少，真材實料呀！唔夠有味精，又夠大碗。$16超值啦！

必食之選三「鳳爪排骨飯」排骨好味多又夠淋，好食到冇得彈呀！如果再要去排隊我還要再去，因為我仲未試燒賣呢！

今日突然想去食茶餐，又去近來最常去的茶餐廳幫襯。因為發覺它的下午茶餐真係好抵食。款式又多，有西式又有泰式粉麵。都係$14起...之前試過熱狗、魚柳包和西多士，都是一般。今次試了沙律吉列魚柳餐，因為上次見好多人食同埋個樣好似幾得。

$19一個餐，真係唔知佢點做。會唔會蝕本架！外賣杯上仲要唔駛加錢，真係好！

沙律份量不少，而且十分足料。有青瓜、紅蘿蔔、薯仔、椰果、生菜、菠蘿。
味道過得去，唔會太乾。有埋椰果好有咬口，特別好味呢！
吉列魚柳炸得卜卜脆，又熱辣辣，正呀！可惜薄了少少，算吧！廿蚊唔駛你想點？

其實醉翁之意不在酒，我係嘆番杯香滑奶茶啦！
杯奶茶真是又濃又滑，係我近來飲過最好的一間，仲好過蘭香園呢！

食茶餐真是一種享受，特別係你覺得好抵的時候...嘻嘻~~

開業沒多久就去幫襯，很少飲台式奶茶，偶爾飲吓都唔錯。

那一晚是大角咀廟會，去趁墟口喝經過就嚐試一下。

$14好大杯...原來可以叫中杯，平$2呢！

味道唔錯，喜歡可以要少糖，感覺上健康啲。又可以去冰...

外賣一杯仙草凍奶茶...

仙草凍即涼粉，都幾多吓，足料架！

選擇都幾多，下次可以試其他。

好驚訝地發現上我們上了鏡，成為此店的招牌相...哈哈！