網上見有報導人人和平飯店開咗呢間嘢。由於人人響北角，我基本上係唔會去的，所以開銅鑼灣啱曬👍🏻 估唔到佢間舖都幾大，食快餐黎講都坐得幾舒服。 60幾蚊個叉燒刈包真係幾貴，好在包個沙律(或汽水)，感覺都好少少。其實佢應該考慮包埋汽水啦。 沙律啲菜都幾新鮮，但種類真係冇乜，大佬其實你加幾粒粟米都好吖，家下真係好菜。個汁酸酸地都幾開胃。 個包就中size, 樣好靚仔嘅。仲出奇地有半隻流心蛋。個叉燒個樣都幾肥，肥瘦分明都幾靚。食落又真係幾好味，出奇地香同唔膩。我呢啲唔食肥膏嘅都覺得唔膩唔油真係幾神奇，連埋啲酸菜一齊真係好夾，唯一係個包比較輕身。男士應該食一個唔會飽。 總結：雖然有啲貴，但都可以考慮再返黎食。

初一睇戲前6點幾搵嘢食。好多都冇開。呢間直入就去試下。啲位係窄嘅，但咁嘅價錢又響港鐵商場，冇咩好講。 啲嘢全部都幾細碟吓。 招牌生煎包係唔錯嘅，好多汁，亦冇祥興記咁油，不過唔係好夠熱。 蒜泥白肉啲肉真係好刀工，好鬼薄，粉皮有啲鞋。 菜飯啲菜仲少過一粥麵。 蔥爆牛肉其實都預咗油，但真係無預過油成咁！油到咁真係大陸先食到！ 總結：食個生煎包。諗唔到點解要返黎。

想食拉麵但中環要食要行上山。Search openrice 見到中環街市food court竟然有拉麵。再查吓間拉麵似係認真拉麵黎喎！日本人拉麵brand 喎！近近地又$88 試吓無妨。 叫咗個九洲背脂拉麵。自己攞到返黎有少少懷疑有冇搞錯咗，因為個樣冇乜油，之前響新潟食背脂拉麵好鬼多油！同埋個賣相真係好food court 拉麵feel. 不過聞到紫菜好香。 第一啖飲湯覺得好似冇乜味咁，有啲懷疑係伏。點知原來浸豬骨味係慢慢滲出黎，有啲家嘅感覺🤣 個湯仲有回甘味，可能就係佢啲背脂油爆出黎嘅小苦味，個湯底真係幾特別。可能個湯唔係重口味版，特別顯得蔥同紫菜都好香，都切得好幼，但份量比較少。我差唔多全碗湯飲曬，我真係好少會飲咁多。 麵好幼所以偏軟唔係彈牙嗰隻。但麵都好多吓，比起香港其他拉麵舖似乎較多麵，男仔食應該都飽。肉好薄但好靚仔，肥瘦適中，完全唔鞋。 食完半粒鐘都無飲過水但完全唔口渴。 是晚有鬼唱歌，都唱得幾好。中環街市好多清潔阿姐所以啲檯都真係幾乾淨。不過就坐高櫈。 總結：呢碗我會形容為豬骨湯嘅鳥華亭。唔想食heavy 嘅豬骨湯拉麵呢度啱曬，仲要唔洗上山。

假日行homesquare 想坐低飲杯咖啡，求其揀咗呢度。入去時叫我哋揀隻酒精噴手液嘅味試吓，試咗木味覺得怪怪地。 裏面都幾靚。雖然檯唔大但同隔離檯嘅距離都算唔錯。坐低侍應攞張櫈黎俾我哋放袋，估唔到cafe 都有咁做(通常已經響櫈底有個籃咁)，加咗分。發覺啲侍應全部都好後生，講嘢好快但都有禮貌嘅，同埋都有笑容。 打開menu 發覺原來佢都幾多分店，未食過真係失覺曬，同埋好似好支持本地創作同慈善團體。 叫咗個花雕單骨炸雞翼配他他醬+美式咖啡，蘋果批+Mocha。 美式咖啡比較細杯，水少比較濃，都幾香。反而好似Mocha 大杯啲。飲嘅好滿意個mocha。 其實對佢個花雕單骨炸雞翼無乜期望，因為出面好多炸咗都冇乜酒味。點知都幾有酒味喎！炸得都好好，粉的厚度適中。點他他醬食亦出奇地不錯，雖然冇特別對個雞翼加分，但食食吓點啲食都幾好。 蘋果批估唔到佢擺盤幾有heart. 個餡好啱香港女仔食，唔會太甜，肉桂味都幾勁，啱曬我。可惜個皮實在太薄，似食紙包蘋果蓉多啲。爆谷好痴牙，冇乜味。 服務一直都幾好。侍應識自動波換碟，加紙巾。 總結：嘢食唔錯。服務加分。下次可以試吓正餐。

星期五book 咗7:30. 位非常細. 坐bar 檯都要貼曬檯坐(頂腳)，因為waitress 要經過擺餸. 但酒吧feel其實我唔太介意. 音樂好大聲，如果真係要傾計要預備聲線. 嘢食係OK 好食嘅，尤其魚taco 舊魚好大，脆得黎個漿唔會太厚. Quesadilla 配啲蕃茄同Guacamole 都食得出新鮮。粟米配芝士個味有啲怪，但粟米幾甜。Churros 就好唔掂，太乾同脆，本身下面個條仲唔夠朱古力醬，要問佢再加過。 食完傾緊計突然阿姐隊張單黎，仲隊埋部機黎。我接過張單冇理佢，佢就問俾visa 定master，完全係黎趕我走。我望吓隔離有4個吉位，出面完全冇人等，條街人影都冇。openrice 寫佢開到12點。 雖然呢間冇旺角ATUM 咁痴線(未夠鐘已經趕你走)，但本人認為呢啲"服務"都非常痴線。我坐響度冇阻你收工又冇阻你收客，你都要趕我走。 成日話咩留港消費。消費我實會，但香港中價餐廳嘅服務真係差到根本接受唔到。下次約人一係上深圳食，一係去Starbucks 食。 總結：再好食都冇用。無可能會返黎。 P.S. 支Moonzen 啤酒(El ? Lager) 好飲，香港牌子黎。

最痴線係出面冇人等緊！唔係淨係我哋檯，隔離檯成十幾人都係咁俾侍應對待。 我個booking 係6:30。Book 前已經睇咗用餐時間係1個鐘頭30分鐘。基本上得1粒鐘嘅餐廳我係絕對唔會book. 坐低呢度同好多香港餐廳都一樣：啲餐牌好矜貴，4個人黎食只俾一個餐牌。多一個餐廳要問的。 嘢食黎得好快。有好多員工，擺盤同嘢飲都好靚，叫啲招牌菜都好食，蝦金邊粉，蝶豆花飯都好食，係金邊粉細碟咗啲。沙嗲都大家都讚好食。蒜容包好捉料。嘢飲都好飲。 一食完嘢食好快就有人收曬啲碟。然後就黎問要唔要甜品。我哋話唔要，嘢飲仲飲緊，已經好快有人放低張單，張單係打開放正中間。我哋呆咗一呆，望一望7:15分。有朋友問係咪即係叫我哋走，我即刻check openrice 係咪我搞錯咗，我冇搞錯佢係寫用餐時間係1個鐘頭30分鐘。我話唔洗理佢，我地繼續飲同傾計。5分鐘後侍應自己過黎講：我哋可以收Visa Master... 我真係好脾氣，內心真係好想爆佢。佢全部員工講嘢語氣都冇問題架，走都有講多謝添，係好好語氣咁趕你走啫！ 總結：嘢食好食都唔會再返黎。去食澳牛好過。起碼你去前已經知係要快走！香港飲食業嘅服務家下真係好多係垃圾級別，自己賺錢大過天。

由於本人係飲奶的，所以本身對植物奶呢啲唔會熱衷，但都試過因為食素嘅朋友所以買過燕麥奶，覺得雖然水咗啲但都可以接受。 呢間嘢中環開時已經幾受歡迎，幾年後我知道已經有好幾間分店，Openrice 仲長期多好評，所以好奇下經過就買咗杯黎飲。 買咗一星推薦嘅焙茶堅果奶茶，微糖。一飲落去：？？水黎？可能有冰所以好淡。繼續飲都水，但開始好多粉... 越飲越多粉。堅果味係有嘅，焙茶味搵下都有嘅... 40蚊。一定唔會再飲。

最鐘意一個人食拉麵。港島拉麵食得太多，過黎九龍試吓。 星期五晚竟然直入。間舖好光猛，吧檯位得幾個，其實仲有一個位，可能佢驚逼，佢就叫其中一檯俾我搭檯。嗰一男一女好似覺得有啲不願/尷尬，響香港食拉麵呢個價你哋唔係諗住唔洗搭檯吓嘛？！不過個侍應又真係唔識做，間舖通道又唔係窄，竟然唔拉開少少張檯。呢啲茶餐廳阿姐都識啦... 隔離叫咗龍蝦拉麵，成隻龍蝦佢拆肉，驚佢批我踭，唯有自己坐過啲🙄 第一次食必食最簡單嘅豬骨底。 碗麵黎到...侍應都好醒放低就話攞筷子俾我嘅...有俾咗杯水，仲放低咗壺水俾我，之但係啲調味料就not accessible 啦。 碗麵個樣好靚仔。湯底出奇地淡味，一啲都唔油，香港竟然有人做淡味豬骨湯底！淨試湯底驚咗一驚，係咪伏黎？！原來碗麵個重點唔係個湯底，係啲餸！我食拉麵好少會覺得個叉燒好食，但竟然覺得呢度嘅好好味！唔係大舊肥膏，唔鞋，唔燒都有好香豬肉叉燒味，好正！拉麵麵身比一般嘅幼，有啲食雲吞麵嗰隻幼麵嘅感覺。蛋好流心，好有蛋香但醃得都幾甜吓。荷蘭豆飽滿新鮮。荀就正常發揮。 總結：諗咗輪俾OK 定笑好。個麵係好食嘅，但服務就麻麻，但碗麵收$88又唔貴嘅，俾笑。

之前睇廣告話呢間羅馬開過黎嘅連鎖鋪已經想試。今日屋企人下午經過買咗，夜返去焗爐焗一陣食。 每次聲稱正宗嘅pizza 我都會叫margherita，因為好食嘅根本唔洗多料都會好好食！只有食xxxxx hut 嗰啲先要揀多料！ 估你唔到真係好好食，真係似響意大利食嘅pizza！個底係半脆半淋但唔韌唔界口。蕃茄新鮮，蕃茄醬唔會好似坊間好多店咁做得太甜，芝士亦好適量，真係食pizza, 唔係食芝士！ 之後食咗CEO 推介嘅Mortadella，又係好正，火腿切得勁薄但有好多塊，加埋個軟芝士同開心果小粒真係絕配。好啱啲唔鐘意食好咸嘢嘅人食。 之後食咗件Italiana，都係好味。蕃茄同塊羅勒葉都好新鮮。個水牛芝士淋得黎都有質感。 最後食嘅反而冇咩特別。唔記得叫咩名但有深色嘅parma ham 同黃椒響上面。個火腿對我黎講太咸，尤其已經食咗之前嗰幾件正嘢... 屋企人都好滿意，但佢話覺得切pizza 嘅員工如果戴返個口罩或半罩會好啲，因為始終佢要對住啲pizza不停講嘢，無罩覺得唔太衛生。 總結：如果水準能維持，會變飯堂。

今日黎到極失望。原來轉咗做賣漢堡，熱狗得番幾款，最鐘意食嘅德國無咗，唔食辣，唔鐘意勁多醬，得澳洲叫揀到。簡單黎講，可以唔洗再黎買。漢堡大把餐廳有做，唔會再專登過黎。究竟點解一間熱狗店會放棄熱狗，唔知佢老細諗乜。