本人account 長期得以個followers, 何德何能會有餐廳款待我寫稿讚好？openrice 真係太睇得起我。 我真金白銀畀錢食野，今次都係！ 入正題！ 新開咗間甜品屋，即刻去試吓！ 首先講吓環境先啦，光光猛猛，同一般甜品店一樣，都係坐得唔係幾舒服同偏逼，不過感覺尚算乾淨，過得去啦！ 叫咗士多啤梨乳酪同黑朱古力窩夫！首先上菜既係乳酪，一睇啲士多啤梨多到瀉咁滯，真係粒粒果，另外一點就係單睇呢杯野，係比我想像中大既！ 第一啖啲士多啤梨感覺略酸，於是我既即連埋底下其他料食，有燕麥片同粒粒Q 彈，甜味中和返個酸味，即刻感覺唔錯，不過最讚既都係個乳酪布甸，唔太甜，奶味好重，但食落又感覺清新，我好鐘意！ 另外個朱古力窩夫都好有驚喜！雖然個窩夫比較細，但算焗得算鬆化，另外最要畀讚就係個雪糕，佢居然畀兩球，其中一球仲要淋咗層朱古力脆皮上去，雖然只係少少唔同，但已經令人覺得好特別啦！ 呢間店鋪好食，店員的服務態度亦好，希望繼續keep 住好，因為好多甜品店一紅質素就差，一差就冇人去，所以點解近年間間都執得咁快，希望粒粒果可以靠新材實料長做長有啦！

睇完咁多好評，對呢間餐廳都滿有期待的。 星期六晚約七點去到，未滿座，一入就有位，座位相隔空間ok, 唔算逼狹。 呢度話係餃腩店，我以為會有啲咩牛腩同餃子既fusion, 點知一睇餐牌，證明我係諗太多，牛腩還牛腩，餃子還餃子。以牛腩唻做菜式既幾乎佔咗餐牌全部，餃子就只有可憐既一頁。 叫咗佢個推介牛腩蝦子撈麵，如果你想嗌最常見既筋腩，要加多八蚊。 一唻到算係賣相唔錯，我一夾個麵，可能擺得耐定唔知咩原因，一夾就痴埋一柱，想少少放落個湯度啫，但始終都唔可以將啲痴纏既粗麵分開，卒之我係要自己咬一口分開啲麵，先可以放落湯。 啲麵算彈牙，湯算清甜，可惜我唔係好食到蝦子味。至於個牛腩係淋，完全冇痴牙，幾靚，可惜我就唔係好覺得牛味濃。 另外個量方面真係太少了，啲麵少到我食完完全唔飽，你話呢啲港式粉麵係咁上下，你賣六十三蚊碗喎，我又唔覺得特別好食，仲要個量咁少，實在係睇唔到咩理由會再encore. 另外我朋友叫咗個韮菜湯餃，完全冇任何impressed之處，唔覺好食亦唔覺難食，所以相都冇影。 最後一提，呢度係坐得舒服，可惜又係望你一食完就走果隻。一食完位阿叔已經急不及待收晒你所有野，然後係你位旁不停徘徊，明晒，咁我地唯有嗱嗱臨飲埋杯野走啦。 可能希望太大啦，雖然唔算難食，但對於我唻講唔係好搞得掂，試過就算，應該冇下次了。

話說本來今日的目標係食蝦匠，點知去到先知已結業，落雨濕濕之下唯有隨便揀間，經過呢間見到門面唔錯，價錢又ok, 決定一試！ 讚吓呢度裝修唔錯，星期六七點去到都冇乜人，兩人可以坐卡位，幾舒服！ 本來係撈檬粉絲，但由於實在太凍，加上一心諗住食蝦，見到佢有個鮮蝦蟹膏札肉湯檬係廚師推介，一於就試吓！我朋友就叫咗半生熟牛肉湯河。 一唻到，發現原來個湯底係番茄湯底，我一直都以為係蝦湯底，料方面札肉，蝦同蟹膏數量都係合理水平。札肉我覺得係最出色既，好彈牙爽口，另外蟹膏我冇諗過係一舊咁上，幾得意，但略嫌冇乜蟹味，至於幾隻蝦都係普普通通咁，冇乜特別。個湯係幾清甜，飲完唔覺口喝，應該冇落味精。 我朋友就話佢個牛肉河啲牛肉幾滑，有肉味，不過啲九層塔唔夠香，我飲過佢個湯，味道清甜，唔錯。 可能太肚餓既關係，一陣風咁就食完，都唔覺好飽，啱啱好啦，大食啲可能都要加啲小食。 今次雨下偶遇，都算係人生插曲，之後會唔會再搵，隨緣啦！

落大雨，諗住見到咩就食咩，命運安排下俾我見到呢間台灣牛肉麵，見有唔少好評，一於就試吓。 叫咗紅燒半筋半肉麵，有粗幼麵揀，鐘意彈牙的我當然揀粗麵。唻到份量算中等，麵食落幾有口感，彈牙，唔錯。湯唔算好濃，但都夠味，不過湯既油量比較多，想品嚐湯既就要注意。 講埋啲餸，牛肉食落係驚喜，好淋，除咗牛肉足之外，紅燒都好入味，個牛肉我比好高分。可惜個牛筋就有啲珠玉在前既感覺，首先個筋唔夠淋，有啲硬，同埋對比起牛肉係非常唔入味，食落好似食緊一舊冇味既膠咁，有啲失望。 最後就係個份量真係較少，食完碗麵走行一陣就有覺得肚餓了，如果大食啲可能真係要加吓啲小食咁。以咁既價錢有啲唔係幾抵，但又唔係差，不過不失，半斤八兩啦。

平時去電影中心睇戲，趕既話都冇乜好食，行過見到新開咗呢間餐廳，又有我最鐘意既喇沙，一於入去試新野！ 餐廳環境乾淨企理，自助斟水，地下仲有個布箱俾你放袋，原本呢個服務通常係拉麵店居多，難得得度都有，值得加分。 本人係非常鐘意食喇沙，佢呢度款式算多，正猶豫緊揀邊款好時，留意到有款叫珍寶喇沙，咩料都有，啱兩個人食，咁就唔使諗啦！ 唻到賣相相當唔錯，同埋值得一提既係佢係摻摻，即係粗麵溝米粉。第一啖試湯，少少辣，但略嫌椰味唔夠，香度亦麻麻，算係一個僅僅合格既湯，麵同米粉普通。不過餸菜非常足，尤其是份雞翼，非常入味香口，強烈推介！當中魚蛋彈牙，魚味不俗，可惜份魚腐就似係炸咗既魚蛋，有啲普通！ 其他料算正正常常，不過坐得舒服，服務搭救，加起上唻算正評！

途經金馬侖道，發現新開咗呢個麵店，上網search都冇乜資料，但見唔係好多人，樓面乾乾淨淨，一於入去試新野。 包剪麵顧名思義主打當然係麵，有肥牛牛展豬軟骨呢啲例牌之餘，仲有羊肉，雞肉，素食既有雜菌同豆腐竹笙，呢啲都係湯麵，另外仲有幾款涼麵，on top 仲可以加餸的。有四款湯底，分別係原味，酸辣，麻辣，同胡椒，辣味係有得揀程度的。當中較為特別既係，佢有四款麵既粗幼度俾你揀，我就揀咗最粗既寬。佢仲特別講明係自製既手工麵，令我非常期待。 點咗原味豬軟骨同雜菌手工麵，一上菜第一個感覺就係好大碗，好足料。首先試個湯底，係用豬骨同雞湯淆，好清甜，飲咗好多啖都唔覺口渴，應該係冇加味精。啲麵入味彈牙，夾落又唔會痴埋，亦加唔會散，呢個手工麵我好滿意。另外豬軟骨唔係好濃味果隻，但軟度適中，唔會似湯渣咁感覺，佢附上一啲金菇同秀珍菇。至於個雜菌，啲冬菇應該係鮮冬菇來的，好食，但就略嫌種類少咗啲，得三款，同豬軟骨即配料比只係多咗一款。 呢碗麵真係好大碗又好食，我完全係捧住個肚走，非常滿足，絕對係強烈推介。 另有一件小事值得一提，就係當日我賣單時唔覺意夾多咗張廿蚊，個店員居然追出唻俾返我，但正正唔似咩大事多錢，就先覺得窩心，咁就更加加多啲分啦。 金馬侖道近年啲餐廳成日轉，水準參差，我希望包剪麵可以站得住腳，係度登陸紮根啦！

懷念泰國美食，今次揀咗呢間倪姐，星期六大約八點入座，唔算多人，唔使等位，空間較大，唔使位貼位，坐得尚算舒服。 叫咗冬蔭功炒飯，燒雞全翼同泰式炒通菜。先上菜既係冬蔭功炒飯，雖然我唔食得辣，但就係非常鐘意食冬蔭功，呢個飯絕對滿足到我，因為就好似係將成個冬蔭功湯底撈落個飯度炒，冬蔭功味非常濃郁，加上配料絕不欺場，有蝦，秀珍菇，同埋平時食冬蔭功既其他香料等，我覺得呢個飯絕對可以encore. 泰式炒通菜，配蝦乾炒，微辣，炒得好香同剛剛好，通菜仍然爽口，配上都算濃味既蝦醬，都係食到停唔到口。 至於個燒雞翼，相比起之前兩個菜，就真係冇乜特別，略嫌普通咗啲，下次可以再試吓其他串燒。 總括唻講倪姐既食物水準算中上，算係真材實料，價錢一般，有加一，我覺得有機會係可以再戰既。

話說想試新野，見到呢間唔少好評，本人又鐘意食雞，就決定唻試吓啦。 星期五晚約七點半唻到都要等一陣，餐廳裝修同餐牌都流露住新派餐廳既格局，即係有啲文青風之餘又sell吓本土咁。 菜單上主力係雞，我就叫咗招牌十三么同大三元，即係一個手撕雞，雞叉燒糖心蛋粉絲米粉，另一個係相同配料但配飯咁解。 主菜未到，先講吓我覺得呢度最特別既野就係每枱都會有免費蝦片，我係覺得奇怪既，因為呢啲免費口立塞通常只會係任食火窩出現，作用係等你食呢啲平價食物填飽個肚，但呢啲餐廳都有認真少見。雖然唔知原因，但你加呢啲gimmick，感覺都真係加唔少分。另外就係杯茶，我從來未見到一杯唔使加錢既茶係隨茶包沖俾你，你係會見到有茶句浮係你杯茶度，令人覺得好有誠意，好揼本，再加多好多分！ 主菜方面，手撕雞油飯，如果唔加鼔油既話，我略嫌淡咗少少 ，同埋佢將雞叉燒同蛋分開上，令我食佢地既時候覺得冇乜味又凍咁。雞油唔係好夠香，雞味亦冇乜，但啲飯就係粒粒都好飽滿，所以食落感覺唔算差，我覺得過得去。 相比之下，佢窩米粉粉絲我就覺得好出色，首先個湯底真係冇味精，好清甜，飲完唔覺頸渴。另外啲料雖然一樣，但因為浸咗湯，感覺有味咗，熱辣辣，所以就好食啲。 總括唻講我覺得呢間餐廳係細節上好有誠意，雖然食物唔算驚艷但價錢上我係接受的，所以我係絕對會再次幫襯呢個內外兼備既十三姨！

再次光顧，都係抵受唔住喇沙既誘惑，再一次叫咗喇沙，不過今次轉叫墨丸魚片，叫做試吓新野，朋友亦點咗雞絲雞蛋！ 雖然覺得湯底冇上次咁驚艷，但都總算出色，喇沙好香，料同麵亦足。粒墨丸真係亮點！因為食得出佢真係用墨魚製作，非常有墨魚味，強烈推介！因為墨丸太出色，令到其實質素都唔差既魚片就相對失色了，不過其實佢都好彈牙爽口。 友人的雞絲量都非常多，我試咗兩啖，覺得啲肉質都算嫩，唔會係死實口感。 我覺得呢間店最有特色就係你可以叫摻摻，摻摻既係將油麵同米粉加埋一齊係同一碗麵度，一次過食到唔同口感，滿足哂貪心既你！哈哈哈！

話說平日好少唻石門，今次同朋友上堂經過，發現原來呢度有好多餐廳，有啲仲平到得人驚！千揀萬揀下，揀咗呢間裝修特別，貼咗唔少雜誌訪問(我認我膚淺)既泰式餐廳-船仔。 呢間餐廳係主打船麵，至於咩係船麵？sorry我都係未聽講，不過佢好似車仔麵咁，餸，麵，湯底都有得揀，一個餸既麵都只係三十蚊，抵到爛！ 我地一行五人，叫咗四個船麵同一個新出既泰北咖喱麵，再加幾款小食，每人仲叫咗啲特飲，我叫咗熱情果蘭花籽。老實講，在下孤陋寡聞，從來冇係其他地方飲過呢款飲品，一飲之下覺得味道清甜，啲蘭花籽口感特別，非常唔錯！ 主菜唻到！原來船麵就係有個好濃既湯底，上面加啲配菜，當中最特別就係佢個辣豬皮，辣得好有層次，炸得酥脆，如果大家想試真呢啲豬皮，可以要求另上，咁就可以保留脆既口感。同埋我懷疑呢款豬皮應該係店中名物，因為佢係提供一包包豬皮另買的。 講返碗麵，金邊粉軟硬適中，十分彈牙，量亦足夠，餸方面亦絕不欺場，啲豬肉丸同樣彈牙，有肉味，以咁既價錢有呢種質素，性價比真係強大到大殺四方啦！ 至於新出既咖喱麵我都試咗幾啖，湯底咖喱味香濃，椰味十分，睇得出個湯用足料淆，重要係唔算太辣，對於喜歡咖喱但唔食得太辣既我唻講，算係好對味！ 最後講吓小食，無論係鳳爪，蝦餅或魚餅，全部都好有水準，鳳爪食落有口感，蝦餅炸得鬆脆，入面仲保留到水份，而魚餅煎得香口，入面啲料都足魚味！ 值得一提既係我當光顧晚市，雖然只有一位後生靚女做侍應，但快手又好態度，獨自應付成個晚市都冇甩拖，後來走既時候再睇吓貼係度既報相，原來果後生女新係老闆娘！真係有眼不識泰山！ 總的來說成間店既水準都唔錯，我地五個食到捧住個肚都不過三百蚊，真係物超所值！食完覺得呢間餐廳點止船仔，將來直情變航空母艦添啦！